Ձեր վստահելի աղբյուրը

Ջոն Կիրակոսյանի անվան թիվ 20 դպրոցում Երևանի քաղաքապետարանի հանրակրթության վարչության պետ Գայանե Սողոմոնյանը քիչ առաջ հանդիպում անցկացրեց Երևանի թիվ 41, թիվ 20, թիվ 10 և թիվ 72 դպրոցների տնօրենների, մանկավաժական անձնակազմի և ծնողների հետ:

Հանդիպման ժամանակ, որն անցավ բավականին լարված մթնոլորտում, քննարկվել են մի շարք հիմնահարցեր, մասնավորապես` աշխատանքային տետրերի, ուսուցիչների` մարտի 8-ի և մասնագիտական տոնի կապակցությամբ նվերների, էքսկուրսիաների, դասարանների, դպրոցին կից այգիների մաքրության և այլնի վերաբերյալ:

Գայանե Սողոմոնյանը շեշտեց, որ բարեփոխումների մասին խոսքերը զուտ հայտարարության տեսքով չպետք է լինեն, իսկ դրամահավաքը դպրոցից պետք է  իսպառ վերանա, ինչին ի պատասխան ուսուցիչները արձագանքեցին, որ որևէ դրամահավաք դպրոցում չի անցկացվում, իսկ, եթե ինչ-որ գումար է հավաքվում, ապա դա միայն Երևանի քաղաքապետարանի կամ Կրթության և գիտության նախարարության հանձնարարականով է:

Մանկավարժներն ու ծնողները բողոքեցին նաև, որ աշխատանքային տետրերը գրված են երեխայի համար ոչ մատչելի լեզվով, չեն համապատասխանում հանրակրթական ծրագրերին և շատ անգամ ծնողների համար խնդիր է լինում երեխային բացատրել այն, ինչ գրված է տետրի մեջ.

«Եթե չունենայի համապատասխան մասնագիտություն, ապա ինչպե՞ս կբացատրեի երեխայիս բնագիտության տետրում պղինձ բառի իմաստը, եթե նա քիմիա անցնելու է միայն երկու տարի հետո»,- օրինակ բերեց և բողոքեց ծնողներից մեկը:

Անդրադառնալով այն խնդրին, որ քաղաքապետարանը հնարավոր է արգելի էքսկուրսիաները, ծնողները շեշտեցին, որ դա հնարավորություն է տալիս դասարանին համախմբվել և դառնալ մի ամբողջություն և ավելի շատ դաստիարակչական իմաստ է իր մեջ պարունակում, քան շատ ու շատ ծրագրեր:

Չմոռացան նաև մարտի 8-ի և այլ տոների կապակցությամբ ուսուցիչներին ծաղիկներ նվիրելու շուրջ աղմուկը և այն, որ համապատասխան գերատեսչությունները դա չեն ողջունում: Ծնողները հայտարարեցին, որ դժվար է պատկերացնել, թե ինչպես ուսուցչին չի կարելի շնորհակալություն հայտնել մեկ ծաղկեփնջով` իր մանկավարժական և դաստիարակչական գործունեության համար: Նրանք նաև հավելեցին, որ   կարևորում են երեխաների կողմից հարգանքի այս կարգի դրսևորումը ավելի, քան՝ այս կամ այն տետրի համար ավելորդ գումար ծախսելը:

Անդրադարձ կատարվեց նաև դասասենյակների մաքրման հարցին, Գ.Սողոմոնյանը առաջարկեց, որպեսզի աշակերտները ինքնուրույն մաքրեն դասասենյակները, թեև մինչ այդ պաշտոնյան պնդում էր, որ բոլոր տարածքները պետք է մաքրվեն հավաքարարների կողմից: Ի պատասխան ծնողների դիտարկմանը, թե` ի՞նչ նպատակով է այդ առաջարկը, Գ.Սողոմոնյանը արձագանքեց. «Դաստիարակչական»:

Նրա խոսքով, դպրոցի տարածքի, բակերի մաքրման աշխատանքները ևս դաստիարակչական բնույթ են կրում, որին Երևանի քաղաքապետարանի որոշմամբ պետք է մասնակցեն նաև ուսուցիչները:

Ուսուցիչների արտաքին տեսքը ևս չմոռացվեց.

«Այն պետք է լինի կոկիկ և զուսպ»,- նշեց Գ.Սողոմոնյանը` ավելացնելով, որ քաղաքապետարանում անցկացված հանդիպումներից մեկի ժամանակ ներկա էին տնօրեններ, ում տեսքը «կանացի էլ չէր»:

Ուսուցիչների անունից խոսեց Լարիսա Մովսիսյանը, ով նշեց, որ վերջին տարիներին ուսուցչի` որպես մասնագետի նկատմամբ վերաբերմունքը շատ բացասական է դարձել և մանկավարժը տարբեր կողմերից քարկոծվում է: Նրա խոսքով, այսօր ուսուցիչը գտնվում է ավելի մեծ ճնշման տակ, քան խորհրդային միության տարիներին և շատ անգամ ստիպված է լինում պաշտպանել դպրոցի տնօրենին՝ այս կամ այն գերատեսչությունից եկող իրարամերժ հանձնարարականներից:

Panorama.am-ի հետ զրույցում Գ.Սողոմոնյանը շատ կարևորեց հանդիպումը` նշելով, որ այն պետք է ավանդույթ դառնա:
Ավելին` նրա խոսքով, նման հանդիպումների կարիքը վաղուց կար` «որպեսզի չկուտակվեին այսքան ցավոտ հարցեր և խնդիրներ»: