Ձեր վստահելի աղբյուրը

Օրենքի առջև հավասար են բոլորը: Այս պարզ ճշմարտությունը գիտեն բոլոր: Այս պարզ ճշմարտությունն ընդունելի է բոլոր երկրներում: Սա երկրների զարգացման, կայացման կարևորագույն գրավականներից մեկն է:

Սակայն… Հայաստանում կարծես մի քիչ այլ է: Վառ օրինակ` Փակ շուկան: Հայաստանի «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքի 4-րդ գլխի 21-րդ հոդվածում հստակ նշված է. «Հուշարձանների տեղափոխման և փոփոխման թույլտվություն տրվում է միայն լիազորված մարմնի եզրակացության հիման վրա»: Շուկան ընդգրկված է պետության կողմից պահպանվող ցուցակում: Լիազոր մարմինը մշակույթի նախարարությունն է: Նախարարությունը կազմել է նախագիծ, ներկայացրել սեփականատիրոջը: Սեփականատերը չի արձագանքել, սակայն շուկայում «բուռն շինարարական աշխատանքներ են ընթանում»:

«Մշակույթի նախարարությունը Փակ շուկայի պահպանության համար իրականացրել է իր լիազորությունների սահմաններում ամեն ինչ, դիմել է սեփականատիրոջը, քաղաքապետարան, դատախազություն` դադարեցնել անօրինական շինարարությունը, սակայն շինարարությունը շարունակվում է»,- ասուլիսում մշակույթի նախարարության քայլերը ներկայացրեց մշակույթի նախարարության Պատմության և մշակույթի հուշարձանների պահպանության գործակալության Երևանի տարածքային բաժնի պետ Կարո Այվազյանը:

Նա կրկնում էր. «Նախարարությունն իր լիազորությունների սահմաններում է գործում»:

Կ. Այվազյանը տեղեկացրեց, որ իրենք նախագիծ են ներկայացրել սեփականատիրոջը, որի համաձայն ետնամասի պատերը պետք է ամրացվեն, մասնակի քանդման աշխատանքներ արվեն, որպեսզի հետագայում վերականգնվեն կամարները: Պատասխան դեռ չեն ստացել:

Պատասխանելով հարցին, թե ինչո՞ւ հետ չեք վերցնում սեփականատիրոջից հուշարձանը, քանի որ օրենքը դա թույլ է տալիս, Կ. Այվազյանն ասաց. «Մենք սեփականատիրոջ փոփոխման խնդիր չենք դնում, դատախազության, քաղաքապետարանի խնդիրն է: Մենք միայն հուշարձանի պահպանության խնդիր ենք դնում»:

Հայաստանի գործող օրենքները թույլ են տալիս, որ եթե հուշարձանն ունի սեփականատար, բայց վերջինս բարեխիղճ չէ ու չի կատարում օրենքով սեփականատիրոջը վերապահված դրույթները` «ապահովել հուշարձանի պահպանությունը և անվթարությունը, լիազորված մարմնին նախապես տեղեկացնել հուշարձանի նկատմամբ սեփականության իրավունքի, դրա պահպանման և օգտագործման պայմանների փոփոխման մասին» և այլն (վերը նշված օրենք, գլուխ 7-րդ, հոդված 36) հետ վերցնել:

Պատմության և մշակույթի հուշարձանների պահպանության գործակալությունից Panorama.am-ին պարզաբանեցին, որ պետության կողմից պահպանվող հուշարձանների ցուցակում ընդգրկված հուշարձանը վաճառելուց հետո էլ շարունակում է մնալ այդ ցուցակում, իսկ սեփականատերը պարտավոր է համաձայն մեր օրենքի բոլոր պարտավորությունները կատարել. «Քայլեր է գործարկում, որոնք մեր օրենքին հարիր չեն, չեն համապատասխանում օրենքին, համապատասխան օրենքով կարելի է հետ վերցնել: Հավերժ չեն տրվում: Եթե հուշարձան է, կարելի է հետ վերցնել, ամեն դեպքում մի քիչ ուրիշ ռեժիմի մեջ է, սովորական շենք չի, որ վաճառեն ու վերջ»: Մինչդեռ քաղաքապատերանից մեզ ասացին, որ հավերժ է:

«Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենք, գլուխ 8-րդ, հոդված 38, 40. «Հուշարձանն օգտագործողները, եթե իրենց կանխամտածված կամ ոչ կանխամտածված գործողություններով վնասել են հուշարձանի պահպանությանը, կորցնում են օգտագործման իրավունքը:
Հուշարձան օգտագործող իրավաբանական և ֆիզիկական անձինք պատասխանատվություն են կրում դրանց պահպանության ու անվթարության ապահովման համար և պարտավոր են կատարել հուշարձանների պահպանության ու օգտագործման՝ Հայաստանի Հանրապետության օրենսդրության պահանջները:

Այդ պայմանները չկատարելու դեպքում՝
ա) հուշարձանն օգտագործման տրամադրողն իրավասու է վաղաժամկետ դադարեցնել վարձակալական պայմանագիրը՝ Հայաստանի Հանրապետության օրենսդրությամբ սահմանված կարգով.
բ) հուշարձանի սեփականատերը, լիազորված մարմինը, պետական կառավարման տարածքային կամ տեղական ինքնակառավարման մարմինն իրավասու են դատական կարգով գանգատարկելու օգտագործման իրավունքը և պահանջելու՝ օգտագործողի մեղքով հուշարձանին հասցված վնասի հատուցում»:
Պատասխանելով այն դիտարկմանը, թե սեփականատերը գործում է ոչ օրենքի սահմաններում, նախարարությունն էլ թող մի կողմ դնի թղթերը, օրենքները ու կանխի ապօրինի շինարարությունը, Կ. Այվազյանն ընդգծեց, որ իրենք պետական մարմին են ու դիմել են դատախազություն. «Դրանից վերև բան չկա»:
Ի դեպ, նա ասաց, որ ինքն անձամբ մայիսի 7-8-ին եղել է շուկայի տարածքում, լուսանկարել. «Դիմել ենք քաղաքապետարան, որպեսզի դադարեցնեն, պատասխան չենք ստացել»:

Ասուլիսին ներկա Ճարտարապետների միության նախագահ Մկրտիչ Մինասյանն էլ նշեց, որ այլևս որևէ հույս չունի, որ պետության կողմից պահպանվող հուշարձանը կվերադարձվի քաղաքին իր նախնական տեսքով: «Մեր պայքարն արդյունք չի տալիս, քանի որ չգիտեմ` որտեղ է թաքնված գաղտնիքը: Պետական մարմինները` մշակույթի նախարարություն, քաղաքապետարան, դատախազություն ի պատասխան մեր նամակների պատասխանում են, որ կատարվել է վատ բան, որ առողջ հուշարձանը կորցնում ենք, բայց սեփականատերը բոլորին խոստացել է, որ կվերականգնի նույն ձևով ու կվերադարձնի քաղաքին: Բայց այլևս չեմ կարող հավատալ դրանց, քանի որ անտրամաբանական է»,- ասաց նա:

Մ. Մինասյանը նշեց, որ քաղաքապետարանի ավագանու ոչ մի անդամ երբևէ ոտքի չի կանգնել ու չի ասել` թե այս ինչ է կատարվում: Ինչ վերաբերում է մշակույթի նախարարությանը, նա հարցադրում արեց` «Միգուցե մեզ մշակույթի նախարարություն պետք չէ»: Ճարտարապետների միության նախագահը ցավով նշեց, որ ճարտարապետական առումով մեծ արժեք ներկայացնող Փակ շուկան վերածվելու է սովորական խանութի, որի նման կարող է լինել ամենուր ու բազմաթիվ:
«Պետական կարիքների զոհեր» ՀԿ-ի նախագահ Սեդրակ Բաղդասարյանն ընդգծեց. «Մեր երկրում թքած ունեն օրենքների, որոշումների վրա»:

Ստացվում է, որ մշակույթի նախարարությունն իր գործը «լավ» է կատարում` դիմում է այս ու այն մարմիններին, իսկ այս ու այն մարմինները բազմաթիվ առիթներ են ունեցել, բազմաթիվ փաստեր են ունեցել, որ կարող էին հուշարձանը վերցնել սեփականատիրոջ ձեռքից: Սակայն չեն անում, նույնիսկ նրա անօրինական գործողություններում «հանցակազմ» չեն գտնում: Ինչո՞ւ: Պատասխանը միանշանակ է` Հայաստանում ոչ բոլորն են հավասար օրենքի առջև, Հայաստանում կան մարդիկ, որոնք իրենց օրենքից վեր են դասում, իսկ պատասխանատու մարմինները չեն ուզում, միգուցե չեն կարողանում բռնել նրա «ավերիչ» ձեռքը:

Նախորդող նորություններ`
Փակ շուկայում ընթացող շինարարությունը բուռն ընթացք է ստացել... նախագիծ էլի չկա (լուսանկարներ)

Բնակիչները` Փակ շուկայի շինարարության մասին. Պահանջում ենք վերջապես արձագանքեք և շտապ դադարեցնեք ապօրինությունը

Մշակույթի նախարարություն. Ապամոնտաժել Փակ շուկայի նորակառույց ծավալի երկաթբետոնյա հիմնական հատվածն ընդունելի ծավալով

Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 2

Ովքեր չեն ասում ու ովքեր են ասում ամբողջ ճշմարտությունը Փակ շուկայի մասին- մաս 1

Փակ շուկա… Մինչ նախագիծը քննարկվում է, «վանդալը բարբարոսաբար ոչնչացնում է հուշարձանը»