Ձեր վստահելի աղբյուրը

«Երևանի Հանրապետության հրապարակի շրջապատն այլանդակված է, հիմա էլ ուզում ենք այդ միջավայրի մեջ սկսել մի բան անել, որպեսզի հրապարակը սկսի համահունչ լինել հետևի կառույցներին»,-Panorama.am-ի հետ զրույցում նման դիտարկում արեց «Հայնախագիծ» ԲԲԸ-ի տնօրեն Գրիգոր Ազիզյանն այն հարցի վերաբերյալ, թե արդյո՞ք Հանրապետության հրապարակը կարիք ունի «արդիականացման», ինչի համար էլ Երևանի քաղաքապետարանը մրցույթ է հայտարարել: Ընդհանրապես նա «տարօրինակ» բնորոշեց այն արտահայտությունը, թե «Ճարտարապետական համալիրի արդիականացման» կարիք կա. «Չի կարելի արդիականացնել հուշարձանը: Չի կարելի արդիականացնել հուշարձանը» (երկար ծիծաղում է): Բացի այդ՝ այսօր մեր հրապարակը սիրուն է»:

Իսկ ինչ վերաբերում է շրջակա միջավայրի աղավաղմանը, ըստ մանսագետի, դա նախկին ճարտարապետների, նախագծողների թույլ տված սխալների արդյունք է. նրանց ներկայացրած նախագծերը հանգիստ անցել են, ինչի արդյունքում ստեղծվել է նման իրավիճակ: «Այսինքն` այդ ժամանակ չի դիտարկվել, որ դրանք կարող են այլանդակել հրապարկը»,- շեշտեց Գ. Ազիզյանը:

Ճարտարապետի համոզմամբ, այսօր Հանրապետության հրապարակը միայն տրանսպորտային խնդիր ունի: Որպես խնդրի լուծում նա տեսնում է Հանրապետության հրապարակից 100 մետր այն կողմ գտնվող Շահումյան հրապարակի տակ կառուցել 500 տեղանոց ավտոկայանատեղի և 300 տեղանոց էլ Սախարովի հրապարակում:

«Ութ հարյուր տեղանոց ավտոկայանատեղին կլուծի խնդիրը: Ի՞նչ պարտադիր է, որպեսզի շատրվան դիտելու կամ միջոցառման մասնակցելու համար գալ ու հրապակարում մեքենան կանգնեցնել»,- ասաց Գ. Ազիզյանը: Նա նաև տարօրինակ է համարում հայտարարության այն կետը, թե հրապարակը «Լենինի արձանի և դրա տրիբունայի ապամոնտաժման արդյունքում, ունի որոշակի դժվարություններ, զանազան հանդիսությունների կազմակերպման խնդրում», ապա հարցադրումներ անում. «Միջոցառումներ անցկացնելու մեջ ի՞նչ կա: Տարեկան 2-3 օր է դա լինում, տրիբունաներ են կառուցում: Ինչո՞ւ է պետք մոնումենտալ կառույց դնել այդտեղ»:

Ընդհանրապես, ըստ «Հայնախագիծ» ընկերության տնօրենի, բավականին շտապողականություն են դրսևորել նման մրցույթ հայտարարելու հարցում: Նրա կարծիքով, նախ մշակույթի, քաղաքաշինության նախարարությունների մասնագետները, Ճարտարապետների միությունը, Երևանի քաղաքապետարանի քաղաքաշինական խորհուրդը պետք է քննարկում կազմակերպեին, որի ընթաքում ձևավորվեր հստակ տեսակետ՝ արդյոք նման մրցույթ հայտարարելու անհարժեշտություն կա, թե չկա, եթե անհրաժեշտ է, ապա հստակեցնեին առաջադրանքը: Նա նշեց, որ պետք էր քննարկվեր, թե ինչ չի կարող լինել կամ ինչ կարող է լինել այդտեղ: «Սա է ամենավտանգավորը»,- շեշտեց ճարտարապետը: Նրա գնահատմամբ, մրցույթի պայմանները սխալ են դրված:

Նախորդող նորություն՝ «Հայտարարված մրցույթը չի նշանակում որևէ կառույցի իրականացում». Պարզաբանել է Երևանի գլխավոր ճարտարապետը