Ձեր վստահելի աղբյուրը

Քաղաքապետարանի ենթակայությամբ գործող, 2011-ին անվճար դարձած մանկապարտեզների խմբերի գերբեռնված լինելու խնդրի ու դրա հետևանքների մասին Panorama.am-ը բարձրաձայնել է  դեռ նախորդ տարվա վերջին:

Խնդրին միջամտեց ու քաղաքապետարանի հետ նամակագրություն սկսեց Մարդու իրավունքների պաշտպանի աշխատակազմը: ՄԻՊ-ում հարցականի տակ դրեցին մանկապարտեզ հաճախող երեխաների հանգստի, ժամանցի իրավունքի իրականացման ապահովումը: Ամիսներ առաջ ՄԻՊ աշխատակազմը հայտարարեց, որ ցավոք, չկա բեռնաթափմանն ուղղված հստակ մշակված քաղաքականություն:

Օրեր առաջ Panorama.am-ը քաղաքապետարանի հասարակայնության հետ կապերի վարչությունից փորձեց պարզել, թե ի՞նչ է արվել և արվում խմբերի բեռնթափման ուղղությամբ, ե՞րբ ի վերջո խմբերում կլինեն այնքան երեխաներ, որքան սահմանված է:

Ըստ սահմանված չափորոշիչների՝ խմբում երեխաների թիվը պետք է լինի առավելագույնը 30, իսկ մսուրում` ավելի քիչ: Առողջապահության նախարարի հրամանով սահմանված նախադպրոցական ուսումնական հաստատությունների սանիտարական նորմերից և կանոններից ելնելով՝ մեկ երեխայի համար նախատեսվում է` վաղ հասակի I և II խմբերում՝ 5 քմ, փոքրերի խմբում՝ 7.5 քմ, նախադպրոցականների համար՝ 7.2 քմ տարածք։

Երբ 2011-ին մայրաքաղաքում մանկապարտեզները դարձան անվճար, Երևանի քաղաքապետարանում ակնկալում էին, որ կլինի մանկապարտեզ հաճախող երեխաների 2 տոկոս աճ, մինչդեռ, ըստ քաղաքապետարանի հասարակայնության հետ կապերի վարչության տրամադրած տվյալների համաձայն, աճը եղել է ավելի քան 40 տոկոս:

«Մանկապարտեզ հաճախող երեխաների թիվը կտրուկ աճել է Երևանի քաղաքապետի 31.03.2011թ, 1101-Ա որոշումն ընդունելուց հետո։ Մինչ վերոգրյալ որոշման ընդունումը մանկապարտեզ էր հաճախում 22 500-երեխա։ Այսօր նրանց թիվը կազմում է շուրջ 31 700»,-ասված է քաղաքապետարանին ուղղված հարցերի գրավոր պատասխանում:

Սա թերևս միակ հստակ պատասխանն է, որ Panorama.am-ը ստացել է քաղաքապետարանից, չնայած հասարակայնության հետ կապերի վարչությունից հորդորեցին հարցերը գրավոր ուղարկել, առավել հստակ պատասխաններ տրամադրելու խոստումով:

Օրինակ այդպես էլ անհայտ մնաց, թե ե՞րբ խմբերում կլինեն սահմանված թվով երեխաներ, կամ ի՞նչ երաշխիք, որ այդ դեպքում բազմաթիվ երեխաներ չեն կարողանա ընդունվել նուհեր, կամ այն հարցը, թե խմբերի ո՞ր մասն են գերբեռնված…

Փոխարենը հերթական անգամ ստացանք խիստ անորոշ պատասխաններ, օրինակ.
«Նախադպրոցական հաստատություն երեխաների անվճար հաճախմամբ լուծվել է Երևանի անապահով բազմաթիվ ընտանիքների սոցիալական խնդիրը, ինչի հետևանքով էլ մի շարք մանկապարտեզների որոշ խմբերում չի պահպանվել երեխաթվի սահմանված նորմատիվը։ Ինչ վերաբերում է մանկապարտեզների խմբերում երեխաթվի բեռնաթափմանը տեղեկացնում ենք, որ հարցը օրակարգային է, որի շուրջ համապատասխան աշխատանքներ են տարվում»:

Քաղաքապետարանից նախկինում հիմնավորում էին, թե միանգամից այդքան երեխայի համար չեն կարողանում գույքային հարցեր կարգավորել, հաշվի առնելով, որ հիմա քաղաքապետարանը նոր գույք է տրամադրում մանկապարտեզներին, հարցրել էինք, թե այս պահին կա՞ն ուրիշ հանգամանքեր, որոնք խանգարում են բեռնաթափման ծրագրի իրականացմանը:

Քաղաքապետարանից ստացել ենք հետևյալ պատասխանը.
«Ներկայումս Երևան քաղաքի մանկապարտեզները չունեն մանկավարժական անձնակազմի և գույքի խնդիր»:

 Նախորդող հրապարակումներ`
Մանկապարտեզի մեկ խմբում 40-ից ավելի երեխա կա. Քաղաքապետարանում խնդրին տեղյակ են

Մանկապարտեզների գերբեռնվածության խնդրով ՄԻՊ աշխատակազմը քննություն կսկսի

Panorama.am-ի հրապարակման հետքերով. ՄԻՊ-քաղաքապետ նամակագրությունը շարունակվում է