Ձեր վստահելի աղբյուրը

Երևանում ավտոկայանտեղիների նոր համակարգի ներդրումը մի շարք հարցեր ու մտահոգություններ է առաջացրել մեքենաների տերերի շրջանում:

Օրինակ, հայտնի քաղաքագետ, «Մոդուս Վիվենդի» կենտրոնի ղեկավար Արա Պապյանն իր ֆեյսբուքյան էջում մի քանի հարցեր էր շարադրել` ակնկալելով պատասխաններ:

«Ըստ նոր կարգի, Երևան քաղաքի փողոցներում կայանելու համար SMS պիտի ուղարկես որոշակի հեռախոսահամարի և այդպիսով վճարես՝ մեկ ժամվա համար 100 դրամ, մեկ օրվա համար 500 դրամ: Ինչքա՞ն և ինչպե՞ս պիտի վճարվի 3 ժամվա, 6 ժամվա համար: Եթե ես բջջ. հեռախոս չունեմ, ինչպե՞ս եմ վճարելու: Եթե իմ հիմնարկությունը չունի կայանատեղի, արդյո՞ք նա պիտի հատուցի իմ ծախսերի համար: Ի՞նչ նոր կայանատեղիներ է կառուցում քաղաքապետարանը արդեն իսկ մեր վճարած հարկերից»,-գրել էր քաղաքագետը:

Խմբագրություն զանգահարած մեկ այլ քաղաքացու համար հստակ չէին կայանման տևողության հաշվարկման վերաբերյալ մեխանիզմները:

Մեկ այլ օգտատեր գրել էր.
«1. Ո՞վ է որոշում փողոցները, գումարի չափը, վճարման ձևը:
2. Ու՞ր են գնալու գումարները:
3. Եթե կարմիր գիծը քաղաքացու տան կամ աշխատավայրի դիմաց է, ապա այդ դեպքում նա նույնպե՞ս պետք է վճարի (Սարյան փողոցում հիմնականում այդպես է):
4. Լրացուցիչ ի՞նչ ծառայություն են ստանալու վարորդը՝ այդ վճարների դիմաց»:

«Եթե, ըստ իմ հաշվարկի, կայանել եմ 4 րոպես 58 վայրկյան, այնինչ կարող է, գրպանակլպիչ սարքերը ցույց են տալիս վճարման գոտի մտցնող 5 րոպե 08 վայրկյան: Ո՞նց են կարգավորվում նման հարցերը»,-նշեց քաղաքացին:

Մտահոգություններն առավել մեծ են տաքսիստների ու այն քաղաքացիների մոտ, ովքեր աշխատանքի բերումով ստիպված են մեքենան թողնել վճարովի կանգառներում: Կան նաև մարդիկ, ովքեր դժգոհություն են հայտնել, թե նույնիսկ տանը գտնվելու ժամանակ են ստիպված մեքենան վճարովի կայանատեղիում թողել, քանի որ դրանք գտնվում են հենց իրենց շենքի մոտ:

Քաղաքացիներին հուզող հարցերի վերաբերյալ Panorama.am-ը զրուցեց «Փարկինգ Սիթի Սերվիս» ընկերության տնօրեն Վազգեն Հարությունյանի հետ:

Պատասխանելով հարցերին, ըստ հերթականության, Հարությունյանը նշեց, որ 3 ժամ կայանելու դեպքում մեքենայի սեփականտերը պետք է վճարի «3 հատ 100 դրամ», իսկ 4 ժամից ավելի կայանելու դեպքում դա ավտոմատ կերպով հաշվարկվում է որպես մեկ օր` վճարելով 500 դրամ:

«Այդ դեպքում դուք կարող եք կայանել մինչև 24 ժամ»,-բացատրեց ընկերության տնօրենը:

Բջջային հեռախոս չունեցողները կարող են մոտենալ մոտակա տերմինալին ու դրա միջոցով է վճարում կատարում:

Հիշեցնենք, որ ավտոկայանատեղիի տուրքը վճարվում է անկանխիկ ձևով, Telcell տերմինալների, բանկային փոխանցումների և բոլոր այն միջոցներով, որոնք նշված կլինեն տեղեկատվական ցուցանակների վրա, այդ թվում նաև sms հաղորդագրությունների միջոցով: Միաժամանակ, վճարողների համար վճարումները մատչելի դարձնելու նպատակով ցուցանակների վրա կլինեն նաև համապատասխան նշումներ տվյալ վայրի մոտակա վճարման տարբերակների վերաբերյալ:

Ինչ վերաբերում է հաշվարկման մեխանիզմներին կամ կայանման տևողության ավել գրանցելուն, ապա կազմակերպության տնօրենը վստահեցնում է, որ հաշվարկն իրականացվելու է ճշգրիտ կերպով և ոչ ի վնաս մեքենայի տիրոջ:
Վ. Հարությունյանի խոսքով, յուրաքանչյուր մեքենայի կայանման համար պարտավոր է վճարել տրանսպորտային միջոցի սեփականատերը:

«Կապ չունի ֆիզիկական անձ է, թե իրավաբանական»,-ասաց կազմակերպության: Նրա խոսքով, իրավական ակտերով  հստակ նշվում են այն տրանսպորտային միջոցները, որոնք ազատվում են տուրքի այդ տեսակից:

Ըստ «Ավտոտրանսպորտային միջոցների կայանատեղերի տեղական տուրքի մասին» ՀՀ օրենքի,
իրենց պարտականություններն իրականացնելու ժամանակ ավտոկայանատեղի տուրքի վճարման արտոնությունից օգտվում են ոստիկանության, արտակարգ իրավիճակների և շտապ օգնությանավտոտրանսպորտային միջոցները` առկայծող փարոսիկները կամ հատուկ ձայնային ազդանշաններ արձակելու սարքավորումները միացրած լինելու դեպքում:

Անդրադառնալով դժգոհություններին, թե մարդիկ ստիպված են վճարովի հիմունքով կայանել անգամ իրենց շենքի հարևանությամբ, ապա կազմակերպության նախագահը նշեց, որ դա հանրային տարածք է, ոչ թե իրենց շենքի սեփականությունը:

«Հարցը կարգավորվում է կառավարության ու Երևանի ավագանու որոշումներով: Դրանցով հստակեցված է փողոցների ցանկը, որտեղ կարելի է կազմակերպել վճարովի ավտոկայանտեղիներ, հստակեցված են նաև փողոցների հատվածները»,-ասաց «Փարկինգ Սիթի Սերվիս»-ի տնօրենը, նշելով, որ տաքսի ծառայությունների համար չեն պատրաստվում բացառություններ անել:

Ընկերության նախագահն ասաց, որ մոտավոր հաշվարկներ ու ընդհանուր կանխատեսումներ ունեն, թե մեկ ավտոնակայանատեղիից օրական ինչքա՞ն գումար կարող են ստանալ, սակայն դրանց մասին նախընտրեց չխոսել:

«Նոր ծրագիր է, ոչ մեկ փորձ չունի, որ կարողանա մեկնաբանել: Շատ-շոտ մոտավոր թվեր են, միայն կանխատեսում ենք, որ Կենտրոնից օգտվողները ընտրելու են 12 հազարանոց դրույքաչափը, քանի որ դա ամենաօպտիմալ ու առավել շահավետ տարբերակն է»,-ասաց նա:

Նա բացատրեց, որ կայանատեղիի ծառայությունից օգտվելու համար պայմանագրեր չեն կնքվելու:

«Դա տեղական տուրք է, վճարվելու է քաղաքապետարանի բյուջե, պայմանագիր չի կնքվում, քաղաքապետարանը հաշիվ ապրանքագիր չի տալիս, դա տուրք է համարվում: Գումարն ամբողջությամբ վճարում ենք քաղաքապետարանի հաշվեհամարին, վերջինս նշված է տեղեկատվական ցուցանակների վրա»,-ասաց մեր զրուցակիցը:

Հիշեցնենք, որ համաձայն Երևան քաղաքի ավագանու որոշման՝ Երևան քաղաքում 2013 թ համար սահմանվել է ավտոկայանատեղի հետևյալ դրույքաչափերը, որոնք ամբողջությամբ մուտքագրվելու են Երևանի բյուջե՝ 1 ժամվա համար՝ 100 դրամ, ընդ որում՝ ավտոկայանտեղում կայանելու պահից մինչև 5 րոպե տեղական տուրք չի գանձվում, յուրաքանչյուր 1 օրվա համար՝ 500 դրամ, մեկ շաբաթվա համար՝ 1000 դրամ, մեկ ամսվա համար՝ 2000 դրամ, մեկ տարվա համար՝ 12 հազար դրամ: Ավտոտրանսպորտային միջոցը ավտոկայանատեղում ժամը 24.00-ից մինչև 09.00-ն կայանելու դեպքում ավտոկայանտեղի տուրք չի գանձնվում:

Վ. Հարությունյանը հայտարարեց, որ մինչև տարեվերջ միայն Կենտրոն վարչական շրջանում նախատեսվում է ստեղծել 10 հազար ավտոկայանատեղի, գործընթացը կշարունակվի մինչև համակարգը գործի բոլոր վարչական շրջաններում:

Նա հիշեցրեց, որ այն հատվածներում, որտեղ չկան կարմիր գծանշումներ ու համակարգեր, կարելի է կայանել անվճար:

Հիշեցնենք, որ ավտոկայանատեղի կազմակերպման ծառայություններն իրականացվում են մրցույթով ընտրված օպերատորի՝ «Փարկինգ Սիթի Սերվիս» և «Լոկատր» ՓԲԸ կոնսորցիում խմբի կողմից: