Ձեր վստահելի աղբյուրը

Հայաստանում կրոնական ոստիկանություն ստեղծելու միտքն այսօրվա պայմաններում, այսօրվա լույսի ներքո անընկալելի է և տեղին չէ: Այս մասին Panorama.am-ի թղթակցի հետ զրույցում ասաց Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը` անդրադառնալով Տեր Կարապետ քահանա Կարապետյանի արտահայտած մտքին, թե Հայաստանում պետք է ստեղծվի կրոնական ոստիկանություն: «Այն ամբողջ աշխարհում կա և օրենքով փորձում է աղանդների դեմն առնել»,- ասել էր քահանան:

Տեր Վահրամ քահանա Մելիքյանը նկատեց, որ քահանայի արտահայտած տեսակետն անձնական է, այն չի արտահայտում Մայր Աթոռ Սուրբ Էջմիածնի պաշտոնական դիրքորոշումը:

Ինչ վերաբերում է աղանդների դեմ պայքարին, ապա Մայր Աթոռի տեղեկատվական համակարգի ղեկավարը նշեց, որ կան տարբեր կառույցներ, որոնց գործառույթների մեջ մտնում է ոչ թե պայքարը, այլ տարբեր կրոնական կազմակերպությունների կամ կրոնական դաշտի կարգավորումը: Այդ իմաստով Տեր Վահրամ քահանա Մելիքյանը կարծում է, որ օրենսդրական բոլոր անհրաժեշտ փոփոխությունները պետք է կատարվեն, որպեսզի օրենսդրորեն կարգավորվեն կրոնական դաշտում առկա խնդիրները:

«Իսկապես եկեղեցին անհրաժեշտություն չի տեսնում պայքարի իմաստով սուր առնելու և գնալու բոլոր այդ կրոնական կազմակերպությունների, աղանդների հետևից, ովքեր այսօր բզկտում են մեր ժողովրդին: Ընդհակառակը, եկեղեցին այդ ամենի հաղթահարման ճանապարհ տեսնում է մեր ժողովրդի լուսավորումը: Եթե մեր ժողովուրդը լավագույնս ճանաչի իր եկեղեցին, իր եկեղեցական արժեքները, այն արժեքները, որոնցով դարեր շարունակ ապրել և գոյատևել է, կարծում եմ գիտակցորեն մոտենալով այդ ամենին, լավագույնս պատրաստված կլինի»,- ասաց նա:

Այս դեպքում, ըստ Տեր Վահրամի, ժողովուրդը որևէ գայթակղության չի տրվի և կկարողանա իր կյանքը կազմակերպել ու կառուցել միայն այդ արժեքների վրա` հավատարիմ մնալով Հայաստանյայց Սուրբ Առաքելական Եկեղեցուն: