Ձեր վստահելի աղբյուրը

«Չինարիում երբեք էլ խաղաղություն չի եղել, այստեղ միշտ էլ կրակոցներ եղել են: Մեր համայնքը, հաշվեք, ռազմական գումարտակ է, կրակոցների, հնարավոր հարձակման դեպքում բոլորն էլ գիտեն իրենց անելիքները, այնպես որ մենք պատրաստված ժողովուրդ ենք, առանց խուճապի կարող ենք արձագանքել ցանկացած իրավիճակի»,-Panorama.am-ի հետ զրույցում ասաց Տավուշի մարզի սահմանամերձ համայնքի գյուղապետ Սամվել Սաղոյանը:

Գյուղապետն ասում է, որ գյուղի երեխաների ու մեծահասակների համար հաճախ են դասընթացներ կազմակերպվում թե Արտակարգ իրավիճակների նախարարության, թե ձևավորված հանձնաժողովների կողմից: Պաշտպանության նախարարության մասնագետներն էլ բնակիչներին ցույց են տվել ապաստարանների պատրաստման ձևերը:

«Թե մանկապարտեզում, թե դպրոցում մենք ունենք ապաստարաններ, մարդիկ պատրաստ են: Այնպես որ մենք մարտականորեն տրամադրված ենք»,-ասաց գյուղապետը:

Այգեպարի գյուղապետ Անդրանիկ Այդինյանը Panorama.am-ի հետ զրույցում շատ զգուշավոր է՝ հնարավոր է, թշնամի հարևանը լսի ու գյուղի գաղտնիքներն իմանա:

«Մենք մեր բնակչության հետ համապատասխան աշխատանքներ ենք իրականացնում: Յուրաքանչյուրը տեղյակ է: Հեռախոսով չեմ կարող խոսալ, դա մեր գյուղի գաղտնիքն է, անվտանգության հարցերը չեմ կարող հրապարակել, էդ հարցերը բոլորը կարգավորված են, 100 տոկսով չէ, բայց ինչքան հնարավոր է»,-ասաց գյուղապետը:

Սահմանին վերջին օրերի լարվածությունից հետո այստեղ եղել են նաև արտակարգ իրավիճակների մասնագետները, բնակիչների հետ հանդիպել, խորհուրդներ տվել:

Փրկարար ծառայության տնօրենի տեղակալ, գեներալ-մայոր Նիկոլայ Գրիգորյանը Panorama.am-ի հետ զրույցում հիշեցրեց «Բնակչության պաշտպանության մասին» և «Քաղպաշտպանության մասին» օրենքները:

«Քաղպաշտպանական խնդիրները միշտ էլ եղել են մեր ուշադրության կենտրոնում, բոլոր մարզերում, մասնավորապես վերջին կրակոցներից հետո, բոլոր համայնքներում վերանայվեցին և մարդկանց հիշեցրեցին այդ խնդիրների մասին»,-ասաց Panorama.am-ի զրուցակիցը, ավելացնելով, որ կատարված աշխատանքների մասին շատ բան բարձրաձայնել չեն կարող:

«Երբ կրակում են գյուղի վրա, կամ գյուղը ենթարկվում է ռմբակոծության, բնակիչների լավագույն խորհրդատուն ընդհանրապես փորձն է, և ցավոք այդ փորձառնությունը մենք ունենք»,-ասաց Ն. Գրիգորյանը, ավելացնելով, որ գոյություն ունի ազդանշանային երկու համակարգ, օդային տագնապ և ուշադրություն բոլորին, երբ խոսքը կարող է վերաբերյալ թունավորումների, քիմիական նյութերի կիրառման ու մնացած այլ խնդիրներին:

«Ժողովուրդը երբեք էլ չի կարող լիովին պատրաստ լինել աղետին: Նույնիսկ զարգացած երկրներն ունեն հարցեր այդ խնդիրների կարգավորման առումով: Մենք էլ դեռ ունենք անելիքներ քաղպաշտպանության խնդիրների կարգավորման առումով: Եթե ասեմ, ամեն ինչ արել ենք, ավարտել ենք, կոռեկտ չի լինի, բայց շատ բան է արվել, շատ բան է արվում»,-ասաց ծառայության փոխտնօրենը:

Նրա խոսքով, աշխատանքներ իրականացվում են նաև բնակչության կենսաապահովման հարցերի ուղղությամբ. «Մենք գիտենք որ համայնքի, որ տարածքով ինչ քանակությամբ ծանր տեխնիկա, բեռնատարներ, ավտոբուսներ կարող են անցնել, գիտենք բնակչության տարհանման բոլոր հնարավոր ուղիները: Այս բոլորը մտնում է պլանների մեջ, բոլոր հարցերն ուշադրության կենտրոնում են»:

Ինչ վերաբերում է վերջին օրերին Տավուշի սահմանապահ համայնքներ նախարար Արմեն Երիցյանի այցին, ապա Գրիգորյանը հայտնեց, որ նպատակը ոչ միայն անվտանգության, այլև սոցիալական ու բնակչությանը հուզող այլ խնդիրներին ծանոթանալն էր:

«Նրանք շատ շոյված էին, որ իրենց դարդ ու ցավը լսող, գնահատող կա և ամենակարևորը դրանց լուծման ուղիներ փնտրողներ կան»,-ասաց Գրիգորյանը:

Հիշեցնենք, որ հունվարի 23-ին նախարար Երիցյանն այցելել էր Այգեհովիտ, Վազաշեն, Պառավաքար, Արծվաբերդ համայնքներ, զրուցել է գյուղապետերի հետ, իսկ Չինարիում և Մովսեսում հանդիպել է նաև բնակչության հետ: Քննարկվել են բնակչությանը հուզող բազմաթիվ հարցեր՝ սկսած հարկերից ու տուրքերից, վերջացրած բնակարանների սեփականաշնորհման, նոր ծնվող երեխաներին տրվող նպաստի, հրշեջ-փրկարարական հենակետերի, և, իհարկե, անվտանգության խնդիրներով: Նշվել է, որ սահմանամերձ համայնքները կառավարության ուշադրության կենտրոնում են, և արվում է ամեն ինչ նրանց հուզող խնդիրներին լուծում տալու համար: