Ձեր վստահելի աղբյուրը

Գազի գնի բարձրացման հետևանքով գնաճն անխուսափելի է: Այս մասին Panorama.am-ի հետ զրույցում ասաց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը՝ հավելելով, որ գազի գնի բարձրացմանը զուգահեռ կաճեն ոչ միայն պարենային ապրանքների, այլև էլեկտրաէներգիայի, տրանսպորտի և այլ ծառայությունների գները:

Տնտեսագետի խոսքերով, եթե պետական տարբեր կառույցների կողմից իրականացվեն անհրաժեշտ միջոցառումներ, որոնք համադրելի կլինեն դրամավարկային քաղաքականության հետ, ապա դրա հետևանքով կարձանագրվի առավելագույնը 1-1,5 տոկոսի գնաճ: Իսկ եթե չհաջողվի ռեալ գործողություններ իրականացնել և միայն սահմանափակվեն դրամավարկային քաղաքականությամբ՝ չի բացառվում, որ 3 տոկոսից ավելի գնաճ արձանագրվի: «Եթե կառավարությունը զսպող մեխանիզմ կիրառի, դա լինի նաև գյուղատնտեսական մթերքների շուկայում, որտեղ խմբիշխանները մի քանի անգամ ավելի գնով վերավաճառում են գյուղմթերքները, որից տուժում է թե գյուղացին, թե քաղաքացին, ապա այդ դեպքում կարծում եմ, որ գազի գների թանկացումը և դրա ազդեցությունը գնաճ վրա շատ ավելի աննշան կլինի»,- ընդգծեց Թաթուլ Մանասերյանը:

Ւ դեպ, Թ.Մանասերյանը չի բացառում, որ գնաճը կնպաստի նաև արտագաղթի ավելացմանը: Միաժամանակ նա նկատեց, որ արտագաղթի պատճառը միայն գնաճը չէ, կան բազմաթիվ խնդիրներ, որոնք բերում են արտագաղթի: Առաջինը՝ երիտասարդության շրջանում գործազրկության բարձր մակարդակն է, որն այսօր հասնում է 58-59 տոկոսի: « Գիտելիքի պահանջարկը առայժմ ապահովված չէ մեր երկրում: Մենք տալիս ենք գիտելիք և դառնում ենք դոնոր այլ երկրների համար: Մենք մեր կադրերին պատշաճ ձևով չենք օգտագործում՝ անգամ այն դեպքում, երբ նրա համար պետական բյուջեից ենք գումարներ ծախսում»,- ասաց տնտեսագետը:

Թ.Մանասերյանը գտնում է, որ ինչ-որ տեղ դա արդարացում կունենար, եթե այդ գիտելիքը տրվեր միայն մասնավոր բուհերի կողմից. «Բայց պետական բյուջեով կրթել բարձրորակ կադրեր այլ երկրների համար, կարծում եմ, անթույլատրելի է: Պետք է ազատ մրցակցային դաշտ ստեղծել, որպեսզի մարդիկ կարողանան իրենց ստացած գիտելիքներով համապատասխան աշխատանք գտնեն»:

Տնտեսագետը նաև անդրադարձավ կենսապահովման նվազագույն զամբյուղին` նկատելով, որ Հայաստանում կենսապահովման նվազագույն զամբյուղը չի համապատասխանում նվազագույն աշխատավարձին և կենսաթոշակին: Թ.Մանասերյանը նշեց, որ իրականում խախտվում է «Կենսապահովման նվազագույն զամբյուղի և կենսապահովման նվազագույն բյուջեի մասին» օրենքը: Օրենքն ասում է, որ պետք է հաշվարկ ներկայացվի կենսապահովման նվազագույն զամբյուղի վերաբերյալ, որը կարող է փոփոխությունների ենթարկվել ամեն տարի, անգամ եռամսյակը մեկ: Մինչդեռ, կենսապահովման նվազագույն զամբյուղի հաշվարկները, որպես կանոն չեն հրապարակվում:

Նախորդող հրապարակում` Գազի հնարավոր թանկացման հետևանքները. «Ցեմենտի արտադրությունը կկանգնի, շինարարությունն ու տրանսպորտը կտուժեն»