Արարատի մարզի գյուղերում երեխաներին մանկապարտեզներ չեն ընդունում
Արարատի մարզի մի քանի գյուղերի մանկապարտեզներում այս օրերին երեխաներ չեն ընդունում, իսկ այն ծնողներն էլ, որոնք երեխաներին տանում են մանկապարտեզ, փաստի առաջ են կանգնում: «Ասում են երեխեքին չենք ընդունի, մինչև հողի ու մյուս հարկերը չմուծեք»,- Panorama.am-ի թղթակցի հետ զրույցում իրավիճակը ներկայացրեց Արարատի մարզի Եղեգնավան գյուղի բնակիչներից մեկը:
«Բա ի՞նչ անենք, հարկեր չեն մուծում, բա երեխեքին ո՞նց պահենք», -մեզ հետ զրույցում անկեղծացավ Եղեգնավանի գյուղապետ Հովսեփ Ղազարյանը: Նա ասաց, որ շուտով տարին կվերջանա, բայց գյուղը դեռ տարվա սկզբից կուտակված 15 մլն դրամի հարկ ունի հավաքելու: Այս պահի դրությամբ գյուղապետին հաջողվել է հավաքել 3 մլն-ը: Եղեգնավանի 1900 բնակչից 31 տոկոսն է միայն հարկ վճարել: «Մարդ կա 1000 դրամ պետք ա բերի մուծի չի բերում: Մարդ կա իրա ընտանիքը 1500 դոլար փող ա ստանում ամսական, բայց հարկ չի բերում մուծի, բա մենք ոնց անենք: Թող բերեն 8 ամիսների հարկերը վճարեն, մանկապարտեզ ընդունենք երեխեքին», -դժգոհեց Հովսեփյանը:
Նրա ներկայացմամբ, գյուղում մանկապարտեզը գոյատևում է ստացված հարկերի հաշվին, և թե կառավարությունից, թե մարզպետարանից ֆինանսական միջոցներ չեն հատկացվում մանկապարտեզների համար:
Մեր խմբագրություն ստացված բողոքների համաձայն նման խնդրի առաջ են եղել կանգնած նաև հարևան Լուսառատի բնակիչները: Սակայն այս գյուղի գյուղապետ Դանիել Հակոբյանն ասաց, որ մանկապարտեզն աշխատում է և երեխաները կանոնավոր կերպով հաճախում են: Լուսառատի մանկապարտեզն ունի 3 խումբ, որտեղ այցելում է 85 երեխա: Ինչ վերաբերում է գյուղում հարկերի հավաքագրմանը, ապա գյուղապետ Հակոբյանը չդժգոհեց դրա ընթացքից և ասաց, որ իրենց արդեն հաջողվել է 50 տոկոսով հարկերն հավաքագրել: