Ձեր վստահելի աղբյուրը

Ֆլորենցիայի «Պալացո Սպինելի» վերականգնողական կենտրոնի երկու նկարիչ-ռեստավրատորներ` Ֆաբրիցո Յակոբինը և Դանիելա Վալենտինովը նկարիչ Մինաս Ավետիսյանի «Թորոս Ռոսլինի ծնունդը» որմնանկարը Գյումրու նախկին Էլեկտրատեխնիկական գործարանի ճաշարանից արդեն մեկ ամիս է տեղափոխվել են Ջաջուռ` նկարչի տուն-թանգարան: Այս մասին Panorama.am-ին ասաց նկարչի որդին` տուն-թանգարանի վարիչ Արման Ավետիսյանը:

«Դեռևս մեկ ամիս էլ որմնանկար չի ամրացվելու նոր հենքին. դեռ պետք է նկարը չորանա, որից հետո այն կտեղափոխեն նոր` ցրտից ու շոգից երկար ժամանակ պաշտպանող հենքի վրա, որը բերվել է Իտալիայից»,-ասաց նա ու հավելեց, որ նոր հենքին ամրացնելու համար վարպետները Իտալիայից կրկին կժամանան Հայաստան ու արդեն կսկսեն աշխատանքի գունային վերականգնման գործընթացը:

Նույն աղբյուրի համաձայն, իրենց հմտության և տեխնոլոագիայի միջոցով այնպես են արել մասնագետները, որ հատուկ սոսնձանյութի շնորհիվ որմնանկարը դարձնել է փափուկ կտավ ու հենքից ամբողջական անջատվել: Թեև որմնանկարը, որը ինչ-որ չափով վնասվել էր երկրաշարժից, ևս 5-10 տոկոս վնասվել է տեղափոխման արդյունքում, ինչը, ըստ Արման Ավետիսյանի, անխուսափելի է եղել, «քանի որ աշխարհում չկա այնպիսի տեխնոլոգիա, որն առանց որևէ չնչին վնաս պատճառելու հնարավորություն տա իրականացնել այդ գործընթացը»:

Արման Ավետիսյանը հույս հայտնեց, որ միգուցե ժամանակի ընթացքում նկարչի նաև մյուս աշխատանքները տեղափոխվեն Ջաջուռ: «Տեղափոխման աշխատանքները բավականին թանկ են»,-ընդգծեց նա ու ավելացրեց, որ ծրագիրը ֆինանսավորվում է մշակույթի նախարարության կողմից:

Մինաս Ավետիսյանը 1960-1975 թթ. ընթացքում ստեղծել է 500 մեծ ու փոքր կտավներ, 20 մեծ որմնանկարներ, տասնյակից ավելի թատերական ներկայացումների դեկորացիաներ: Նկարիչը միշտ երազել է մոնումենտալ գեղանկարչության` որմնանկարչության մասին, քանի որ հաստոցային գեղանկարչությունը սահմանափակել է նկարիչի հնարավորությունները, իսկ` «թատերական նկարչությունը անցողիկ է»: