Պիլոտային ծրագիր. «Քանդում են, ջարդուփշուր են անում»
«Երեք անգամ դադարեցնել եմ տվել անօրինական շինարարությունը: Բայց այս պահին կրկին ընթանում են շինաշխատանքները: Էլի գնում եմ այնտեղ»,- Panorama.am-ի հետ զրույցում ասաց Գառնի համայնքի ղեկավար Աշոտ Վարդանյանը:
Հիշեցնենք, որ «Գառնի» պատմամշակութային արգելոց-թանգարանի տարածքում մշակույթի նախարարության Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի նախաձեռնությամբ կառուցվում է սեզոնային սրճարան: Գառնիի գյուղապետը, բնակիչները դեմ են այդ նախաձեռնությանը, քանի որ, ըստ նրանց, պատմամշակութային արժեք ներկայացնող հողատարածքում արգելվում է այլ շինաշախատանքներ կատարվել, տարածքում ուսումնասիրություններ չեն կատարվել, հետևաբար չեն կարող իմանալ այդ տարածքում հնագիտական շերտ կա, թե ոչ: Բնակիչների խոսքով, տաճարի տարածքից դուրս մի քանի սրճարան կա: Նշենք նաև, որ 2009 թվականին մշակույթի նախարարության գիտամեթոդական խորհուրդը դրական եզրակացություն է տվել «Գառնի» պատմամշակութային արգելոց-թանգարանի տարածքում կազմակերպել բացօթյա սեզոնային սրճարան:
Ա. Վարդանյանն ասաց, որ նախաձեռնության հեղինակներն «արհամարհած» ունեն բոլորին՝ համայնքին, մարզպետարանին, քանդում են, գոնե պահպանեն մշակութային արժեքը:
«Քանդում են, ջարդուփշուր են անում մշակութային արժեք ունեցող քարերը»,- զայրացած ասաց նա՝ հավելելով, որ մեկ շաբաթ առաջ դիմել է ոստիկանություն՝ անօրինական շինարարությունը դադարեցնելու համար, սակայն որևէ արձագանք չի եղել:
Գյուղապետի խոսքով, պետք է շինաշխատանքները դադարեցվեն, մինչև լինեն համապատասխամ փաստաթղթերը:
Մինչդեռ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Վլադիմիր Պողոսյանը մեզ հետ զրույցում պնդում է, որ տարածքում սեզոնային սրճարան կառուցելու նախագիծը քննարկվել է, հաստատվել է մշակույթի նախարարության գիտամեթոդական խորհրդի կողմից, անհրաժեշտ բոլոր փաստաթղթերը կան:
Պատասխանելով հարցին, եթե նախատեսված են միայն տաղավարներ, որոնք ամրակներով են լինելու, այդ դեպքում ինչո՞ւ են նախատեսված տարածքում շինաշխատանքներ ընթանում, Վ. Պողոսյանն ասաց. «Այդտեղ հող չի փորվում: Կա 90 սանիտիմետրանոց հենապատ, որը վերաշարվում է: Նախկինում քարերը հողով էին ամրացվել, հիմա շաղախով ենք ամրացնում»:
Պատասխանելով հարցին, թե հնարավո՞ր է հասարակության դժգոհությունները հաշվի առնվեն և սրճարանը չկառուցվի, ՊՈԱԿ-ի տնօրենն ասաց. «Պիլոտային ծրագիր է: Եթե մենք նախաձեռնել ենք, անում են օրենքի շրջանակներում: Եթե չարդարացվի, բնականաբար, կարող են այդ տաղավարները հանվել: Սա էլ հո կուտակային ֆոնդի հետ չի կապված, ոչ պարտադրանք է, ոչ էլ: Օրենքը թույլ է տալիս, անում ենք: Աշխարհի շատ երկրներում կան»:
Ինչ վերաբերում է այն խոսակցություններին, թե սրճարանի կառուցումը թույլ չի տա, որ Գառնու տաճարն ընդգրկվի ՅՈՒՆԵՍԿՕ-ի ցուցակ, եթե երբևէ պետությունը նման հայտ ներկայացնի, Վ. Պողոսյանն ասաց, որ Գառնու տաճարը մինչև 2000 թվականը ներկայացված է եղել ՅՈՒՆԵՍԿՕ-ի ցանկում ներառելու համար, սակայն հայտը մերժվել է, քանի որ տարածքը չի համապատասխանել միջազգային չափանիշներին:
Նախորդող հրապարակումներ՝
«Մշակույթի նախարարությունն իր ստամոքսային մտածողությամբ փորձում է պղծել մեր մշակույթը». պատմաբան
Գառնու տաճարը՝ սրճարանային դիտակետից
Մշակույթի նախարարը խոստացավ ու պաշտոնապես հայտարարեց
«Պիլոտային» սրճարան՝ «Գառնի» պատմամշակութային արգելոց-թանգարանի տարածքում
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
