Ձեր վստահելի աղբյուրը

Panorama.am-ում սկսում ենք շարք, որի շրջանակներում անդրադարձ կկատարվի օրենսդիրի հատկապես այն անդամներին, ովքեր հասարակության լայն շրջանակներին հայտնի են դարձել պատգամավոր ընտրվելուց հետո միայն: Կփորձենք հատկապես մանրամասներ ներկայացնել վերջիններիս` մինչ պատգամավոր դառնալը ծավալած գործունեության, դրսևորած հասարակական-քաղաքական ակտիվության, ինչպես նաև տեղեկություններ` իրական և հայտարարագրված ունեցվածքի վերաբերյալ: Շարքի առաջին հերոսը ԲՀԿ խմբակցության անդամ Միքայել Մելքումյանն է, ով թեև ձգտում է ամենուր ներկայանալ իր գիտական գործչի իմիջով, սակայն հարազատ բուհի միջավայրում վայելում է կաշառակեր դասախոսի համբավ:

Պատգամավորը նախապես համաձայնել էր հարցազրույց տալ և պատասխանել իր անձին վերաբերող բոլոր հարցերին, բայց երբ բանը հասել է անցյալի մութ գործարքների մասին հարցադրումներին, վերջինս վրդովված ընդհատել է զրույցը և դուրս է հրավիրել լրագրողին: Փաստորեն ԲՀԿ-ականների վերին էշելոններում իր «պատրաստվածությամբ հայտնի» օրենսդիրը պատրաստ չի եղել պատասխանել ստանդարտ լոբինգից դուրս հարցերին: Իսկ դրանք վերաբերում էին հետխորհրդային տարիներին նրա անցած ճանապարհին՝ առևտրաարդյունաբերական բորսա, պետական համակարգ, համալսարանական և գիտական գործունություն, կուսակցական աշխատանք (ԱԺՄ-ից մինչ ԲՀԿ հիմնադիր անդամ) և այլն:

Մեզ հետաքրքրում էր՝ ինչո՞վ է փայլել երիտասարդ գիտաշխատողը գործադիր իշխանությունում, ինչպե՞ս է պետգույքի կառավարման փոխնախարար Մելքումյանը դիմացել այս ու այլուր պետգույք սեփականաշնորհելու գայթակղություններին, կամ դիմացե՞լ է արդյոք:

Հարցերից անակնկալի եկած պատգամավորը, իհարկե փորձ արել է համոզել, թե իր զբաղեցրած պաշտոնը երբեք չի ծառայել իր մերձավորի կամ սեփական շահերին, անգամ պնդել է, թե չունի սեփականություն, ինչ ունի չունի՝ բաց ոււ թափանցիկ ներկայացրել է ԿԸՀ հայտարարագրում :

Այդուհանդերձ «ոչ մի շարժական և թանկարժեք գույք չունեցող» պատգամավորի անցյալի հետքերով մի փոքր գնալով` արեցինք հետաքրքիր բացահայտումներ. պարզեցինք, թե բոլորիս քաջ հայտնի դեմքերից քանի~ քանիսն են իրենց գիտական թեզերը գրելիս հույսը դրել տնտեսագետ պրոֆեսոր Միքայել Մելքումյանի վրա, իսկ նրանք ոչ ավելի, ոչ պակաս պատգամավորներ, գործարարներ ու չինովնիկներ են:

Առանձին թեմա է արդեն ՀՈՒՅՍԻ կշիռը, որ փողից բացի ինչով ասես չափվել է ռեզյումեներում գիտական աստիճան ունենալու կռիվ տվողների համար:

Մեզ հաջողվեց պարզել նաև, թե որն է Միքայել Մելքումյանի մյուս հիմնական զբաղմունքը՝ ԱԺ պատերից դուրս:

Պարզվում է պատգամավորը, ունենալով ահռելի տարածքներ Երևանի ցանկացած վայրում, այնքան խնայող է գտնվել սեփական փողերը տնտեսելու հարցում, որ համալսարանի իր ղեկավարած ամբիոնը դարձրել է «բիզնես կենտրոն»: Ժողինսիտիտուտ է հրավիրում նա իր «կլիենտներին», հանդիպում իր օբյեկտները վարձել ցանկացողների հետ, ոգևորված գներ է կրակում ու հետո բանակցում նրանց հետ, իսկ հետո, ասում են, իր գիտական աստիճանն է մեյդան բերում բիզնեսմեն պատգամավորը, որպեսզի հավատ ներշնչի կլիենտի մոտ:

Որքան էլ զարմանալի թվա համալսարանական, գիտական, պատգամավորական ակտիվ գործունեությամբ զբաղվող պատգամավորը անձամբ է իր հեռախոսահամարը փակցրել վարձակալությամբ տրվող սեփական տարածքների մուտքերի դռներին և անձամբ ինքն էլ զբաղվում է բրոկերությամբ:

Ի դեպ, սրանք բավականին պատկառելի գներ ունեցող տարածքներ են՝ Երևանի Կենտրոն և Արաբկիր համայնքներում, որոնք պատգամավորի մայրը` Գրետա Սահակյանը (կամ ինքը` պատգամավորը` մայրիկի անունով) սեփականաշնորհել է դեռևս իր փոխնախարար եղած ժամանակ: Ավելորդ չէ նշել, որ Միքայել Մելքումյանը ժամանակին իր պաշտոնական դիրքից օգտվելով՝ այդ ահռելի տարածքները սեփականաշնորհել է ծիծաղելի գներով:

Ասենք, Արմենիա լադայի հարևանությամբ 821 քմ տարածք է սեփականացրել` 5 մլն 733 հազ դրամով՝ 1 քմ-ի դիմաց վճարելով ընդամենը 6990 դրամ (Կոմիտասի 49 շենք ), Մոսկովյանի 33 հասցեում 176,9 քմ մակ.՝ 4 ,104,080 դրամով , այսինքն՝ 1 քմ 23,180 դրամով:

Կորյունի 19 ա հասցեում 53.1 քմ մակ.՝ 1 մլն դրամով , ստացվում է՝ 1 քմ-ի դիմաց վճարել է 18,800 դր :Եվ այս շարքը կարելի է շարունակել Նաիրի Զարյան, Հրաչյա Քոչար փողոցների հասցեներով:

Նշենք, որ Միքայել Մելքումյանը նույն տարիներին է կառուցել իր եռահարկ շքեղ առանձնատունը՝ ԱԺ-ին հարակից փողոցում (այստեղ խոշոր գործարարների առանձնատներ են ):

Հ.Գ. Հուսանք, առաջիկայում մեզ կհաջողվի պարզել նաև, թե ինչո՞ւ կամ ինչից հետո է տնտեսագիտության դոկտոր, պրոֆեսոր Միքայել Մելքումյանն իր հարազատ բուհում (ՀՊՏՀ) կաշառակեր դասախոսի համբավ վայելում:

Նախորդող` Նյարդայնացած պատգամավորը դուրս է հրավիրել լրագրողին (տեսանյութ)