Ձեր վստահելի աղբյուրը

Այսօր կայացավ Տնտեսական մրցակցության պաշտպանության պետական հանձնաժողովի (ՏՄՊՊՀ) հերթական նիստը:
Հանձնաժողովի Վերլուծության վարչության պետ Դավիթ Հովհաննիսյանը ներակայցրեց վարույթի արդյունքները:

Ըստ այդմ հանձնաժողովը, դեղերի շրջանառության ոլորտում գործող տնտեսվարող սուբյեկտների կողմից օրենքի հնարավոր խախտումների բացահայտման նպատակով, հարուցել է վարույթ, որն ընդգրկել է 25 տնտեսվարողների վարքագծի ուսումնասիրոթյուն:


Վարույթի ընթացքում ուսումնասիրվել են 2009թ.-ի հունվար-սեպտեմբեր ամիսններին 38 անուն դեղի ` արտադրության, ներկրման, իրացման ընդհանուր ծավալների, ինչպես նաև մինչև նոյեմբերի 15-ը յուրաքանչյուր դեղի 1 միավորի գնի կառուցվածքի վերաբերյալ տեղեկատվություն:


Ընկերություններից 4-ը իրացման գնի փոփոխության համար որպես հիմնավորում են նշել դրամի արժեզրկումը: Մինչդեռ, ըստ ՀՀ ԿԲ-ի տեղեկատվության, ԱՄՆ 1 դոլարի փոխարժեքը ամսական կտրվածքով սեպտեմբերին աճել է 1,91, հոկտեմբերին` 1,51 և նոյեմբերին` 0,4 տոկոսներով:


Այսինքն արտարժույթի փոխարժեքների աճի տեմպերը նույնիսկ նվազել են սեպտեմբեր-նոյեմբեր ամիսներին:

Նիստը ղեկավարող ՏՄՊՊՀ նախագահ Դավիթ Հարությունյանը նկատեց, որ նոյեմբերի 17-ին իրենց հանձնաժողովի իրականացրած ուսումնասիրությունները, ԶԼՄ-ների օգնությամբ և ընդհանրապես հասարակությունից ստացված բողոքների հիման վրա սկսեց վարույթ` պարզելու դեղերի շուկայում իրավիճակը:


«Ընտրվեցին մի քանի դեղատեսակներ, աշխատակազմն իրականացրել է ուսումնասիրություն` համագործակցելով Առողջապահության նախարարության, դեղագործակալության, պետական եկամուտների կոմիտեի, այլ մասնագետների հետ»,-նշեց Դ. Հարությունյանը:

«Մինչ այս ուսումնասիրությունը դեղերի շուկայում մեր հանձնաժողովը ևս մի քանի ուսումնասիրություներ էր կատարել, մասնավորպես մարտ-ապրիլին լայնածավալ ուսումնասիրություն է իրականացվել ճշտելու, թե այդ անգամ ո՞րն էր գների բարձրացման պատճառը: Ստուգումների արդյունքում պարզվեց, որ գների բարձարացումը մեծապես պայմանավորված էր արտարժութային շոկով:
Այդ ժամանակ հանձնաժողովն համարեց, որ գների բարձրացումը հիմնավորված էր»:

Այս անգամ էլ հարուցված վարույթը պարզել է, որ տնտեսվարող սուբյեկտները գների բարձրացումը պատճառաբանում են արժույթի փոփոխություներով` մասնավորաբար ԱՄՆ դոլարի և եվրոյի արժևորմամբ:


Հանձնաժողովն իր այսօրվա որոշմամբ աշխատակազմի մասնագետների նախնական գնահատականներով դեղերի ներկրմամբ և իրացմամաբ զբաղվող «Վագա ֆարմ», «Արգո ֆարմ», «Էսկուլապ», «Ամիկուս», «Ֆետիդա ֆարմ», «Նատալի ֆարմ», «Ալֆաֆարմ», «Արֆարմացիա» ընկերությունների գործողությունները որակեց հակամրցակցային համաձայնություն:


Վերոհիշյալ ընկերություններից յուրաքանչյուրին տուգանեց նախորդ տարվա հասույթի 2%-ի չափով` յուրաքանչյուրին ոչ ավելի քան 300 մլն դրամով:

Ըստ այդմ «Վագա ֆարմ»-ի դեպքում տուգանքը կազմեց ավելի քան 40 մլն դրամ, «Արգո ֆարմ»-ի` 21,5 մլն դրամ, «Էսկուլապ»-ի` 35,5 մլն դրամ, «Ամիկուս»-ի` 18,4 մլն դրամ, «Նատալի ֆարմ»-ի` ավելի քան 187 մլն դրամ, «Ֆետիդա ֆարմ»-ի` մոտ 112,5 մլն դրամ, «Ալֆաֆարմ»-ի` ավելի քան 113 մլն դրամ, «Արֆարմացիա»-ի` 40,5 մլն դրամ:

Ընկերություններին հանձնարարվեց 10-օրյա ժամկետում շտկել խախտում և ՏՄՊՊՀ ներկայացնել տուգանքի վճարումը հավաստող տեղեկատվություն: Վարույթի ընթացքում ձեռք բերված նյութերը կտրամադրվեն պետական եկամուտների կոմիտեին: