Գյուղացու ապրուստը հողին են հավասարեցնում. «Եկեք, օգնության հասեք»
Արագածոտնի մարզպետարանի վարչության պետը գյուղապետին սուտասան է որակում, Սադունց գյուղի բնակիչն իր հերթին է համայնքի ղեկավարին սուտասան ասում, ռուսական ռազմաբազայի հրամատարներից մեկն էլ իր հերթին մեղադրում է գյուղապետին…
Այս իրավիճակն այսպես է սկիզբ առել.
Արագածոտնի մարզի Սադունց գյուղում ռուսական սահմանապահ զորքերի զինավարժությունների հետևանքով ամբողջությամբ վնասվել է գյուղի բնակիչներից մեկի` 7 հա մակերեսով խոտհարքը: Ալիխան Բրոյանի 7 հոգանոց ընտանիքն ապրում է տնակում, երեք անչափահաս երեխա ունի, հայրը հաշմանդամ է: Նա կաթ է առաքում, օրական չորս հազար դրամ վաստակում, ընտանիքի օրվա հացի խնդիրը հոգում: Հույս ուներ, խոտը կհնձեր, կվաճառեր, մի կարիք կհոգար:
«Անցած տարի քյոռփես պաժառ տվեց դեզը, էս տարի էլ ըսենց եղավ: Հողի մեջ մի երեսուն հատ տանկեր են, մի 300 հատ էլ սալդատ, բահերով քանդում են, խրամատներ են փորում: Նույնը կրկնվել էր մի քանի օր առաջ: Մայրիկս երեխեքի հետ գնացել տեսել էր, լացելով սկսել էր տանկերի ուղղությամբ քարեր շպրտել, տանկը քշել էին մորս ուղղությամբ, երեխաներն ահավոր վախեցած էին»,-Panorama.am-ին պատմեց 38-ամյա Ալիխան Բրոյանը:
Էսօր տեսնելով կատարվածը, զանգահարել է գյուղապետին, Էդվարդ Սադունյանն ասել է, որ ինքը Երևանում է:
«Իմ սեփական հողն է, պասպորտն էլ ունեմ, բայց հորս անունով է»,-ասաց նա: Մի քանի օր առաջ փորձել է հանդիպել հրամանատարին, չեն թողել, ասել են գյուղապետը պետք է գա: Գյուղացին կասկածում է, որ Սադունյանը ոչ էլ զանգել է, հակառակ դեպքում միջադեպը չէր կրկնվի: Այսօր Սադունցի բնակիչը աջակցություն ակնկալիք ունի, թե ով կարող է օգնել, առայժմ հստակ չի պատկերացնում:
Սադունցի գյուղապետ Էդուարդ Սադունյանը Panorama.am-ը հավատացրրեց, որ ինքն այսօր եղել է դեպքի վայրում, տեսել է` ինչ է կատարվել (նույն պահին ու ավելի ուշ Ալիխան Բրոյանը պնդում էր, որ գյուղապետը Երևանից գյուղ չի հասել, հողամասը չի տեսել, ինքը հողի մոտ կանգնած գյուղապետին է սպասում):
«Ես սպասում եմ նաչալնիկ պալիգոնայի շեֆը գա, իրար հետ նայենք` ինչ ենք անում»,-ասաց Սադունյանը: Նա նշեց, որ ոչ թե վնասվել է 7 հա-ն ամբողջությամբ, այլ ընդամնեը 2 հա տարածք:
«Խեղճ ընտանիք է: Դե հիմա գյուղի ո՞ր բնակիչն է լավ ապրում, էդ մի կտոր հողի վրա են էլի»,-ասաց նա, ավելացնելով, որ խնդրի մասին ինքը տեղյակ է պահել մարզպետարանի հողաշինության-հողօգտագործման բաժնի պետ` Գևորգ Օհանյանին:
«Մենք կնքում ենք փաստաթուղթ, որ տեղյակ ենք տվյալ վայրում իրականացվելու է զինավարժություն, որպեսզի մարդ, անասուն չլինի, վնաս չլինի: Էս անգամ էլ կնքել ենք: Իրենք այդ տարածք մտնելու իրավունք չունեն, իրենց հատուկ հող է հատկացված»,-ասաց գյուղապետը:
Զորավարժարանի պետ Մաքս Շարդարուսկին Panorama.am-ի հետ զրույցում ասաց, որ գյուղացուն փոխհատուցելու մասին հարցերին կարող են պատասխանել միայն Գյումրիում: Իսկ մինչ այդ նա մեղադրեց գյուղապետին ու գյուղացիներին, որոնք ապօրինի կերպով զորավարժարանի տարածքում են հայտնվում, խանգարում են վարժությունների ընթացքը, չեն ցանկանում կատարել իրենց պարտականությունները:
«Աստված մի արասցե, եթե ինչ-որ բան պատահի, կասեն զինվորականներն են մեղավոր»,-ասաց ռուս զինվորականը:
Մարզպետարանի հողաշինության և հողօգտագործման վարչության պետ Գևորգ Օհանյանը Panorama.am-ի հետ զրույցի սկզբում միանշանակ պնդեց, որ այդ գյուղացին սեփականության վկայական չունի, իսկ օգնություն տրամադրելու վերաբերյալ հարցին` պատասխանեց` իհարկե ոչ: Գյուղացու խոսքերը` սեփականության վկայական ունենալու մասին փոխանցեցինք մարզպետարանի ներկայացուցչին:
Դրանից հետո մարզպետարանի պաշտոնյան զանգահարում է գյուղացուն`«քեզ ով է ասել հողդ անմշակ թողնես, որ նման բան լինի», ապա ասել է, որ սեփականության վկայականի տվյալները տրամադրի:
«Մարզպետարանից ինձ զանգեց, ասում է, ուզում ես ընենց անես, որ էդ հողն էլ քո ձեռքից վերցնենք: Ասում են, ինչի՞ չեք մշակել: Ես ուժ չունեմ, չեմ կարում վարեմ, ցանեմ, գոնե խոտն եմ հնձում, ընտանիքս եմ պահում, նպաստ էլ չեն տալիս, ոչ մի բանով չեն օգնում»,-ասաց Ալիխան Բրոյանը:
Եթե մարդը ուժ ու հնարավորություն չունի սեփականություն հանդիսացող հողը մշակի, դա որևէ մեկին իրավունք տալի՞ս է ավիրել ու փչացնել իր ապրոսւտի միջոցը,
Մարզպետարանի վարչության պետն ի պատասխան ասաց. «Խնդիրն այն է, որ եթե վարած ու ցանած լինեին, նրանք չէին մտնի էդ հողը»:
Բայց չէ՞ որ նախապես զինավարժությունների համար քարտեզ է գծվում, որտեղ կարելի է անցկացնել վարժությունները: Մարզպետարանի վարչության պետն ասաց, որ կփորձեն ինչով կարող են կօգնեն:
«Ես կկգնամ, կնայեմ, այդ հարցերը կկարգավորեմ, անպայման»,-ասաց վարչության պետը` միաժամանակ կասկած հայտնելով, որ հողը այդ գյուղացու սեփականությունը չի հանդիսանում:
Ավելի ուշ Ալիխան Բրոյանը տեղեկացրեց, որ «կոշով, բոլդուզերով» եկել են հողը քանդել, «եկեք, օգնության հասեք, հողս վարի տվին»:
Լրահոս
Տեսանյութեր
Չենք կարողանում տարբեր դաշտերով պայքարել Արցախի մշակութային ժառանգության պահպանման համար. Ղարախանյան
