Ձեր վստահելի աղբյուրը

«Մենք պետք է հարգենք մեր ընդդիմախոսների մոտեցումները, և առավել ջանքեր պետք է գործադրենք` բացատրելու կուտակային կենսաթոշակային համակարգի առավելություններն ու անհրաժեշտությունը»: Այսօր Կենսաթոշակային երրորդ տարեկան միջազգային համաժողովում հայտարարեց ՀՀ վարչապետ Տիգրան Սարգսյանը:

Անդրադառնալով կուտակայինի դեմ պայքարողների կողմից բարձրացված հարցերին, վարչապետը նշեց, որ առաջինը վստահության խնդիրն է: Ըստ նրա` ընդդիմախոսներն ասում են, որ ավելի լավ է հիմա այդ հինգ տոկոսը սպառեն, քան կուտակեն ապահով ծերության համար, հատկապես, որ վստահ չեն, այդ գումարները 30 տարի հետո հասանելի են լինելու:

«Սա օբյեկտիվ հարցադրում է, քանի որ կան օբյեկտիվ հիմքեր դրա համար: Եթե մեր բնակչության 32 տոկոսը աղքատ է, և միջին խավը նոր է ձևավորվում, եկամուտները բավարար չեն: Դրա համար մենք ծրագրավորել ենք մեղմելու այս օբյեկտիվ դժգոհության հիմքը»,- ասաց վարչապետը:

Ըստ նրա, 2010թ-ին ընդունված օրենքը Հայաստանի պատմության մեջ կարելի է համարել բացառիկ, քանի որ երեք տարվա ժամկետ է տրվել և պետությանը, և քաղաքացիներին, և բիզնեսին` նախապատրաստվելու այս բարեփոխումների իրականացմանը:

«Մեզ միշտ մեղադրում են, որ մենք օրենքները ընդունելուց երկու-երեք ամիս հետո դնում ենք գործողության մեջ: Սա այն բացառիկ օրենքն է, որ երեք տարի առաջ ենք ընդունել և հնարավորություն ենք տվել նախապատրաստվել, այդ թվում` նաև մենք»,- ընդգծեց Տ.Սարգսյանը:

Նրա խոսքերով` պետությունը կուտակել է ֆինանսական միջոցներ, որպեսզի 2014թ-ի հունվարի 1-ից բարձրացնի թոշակները, բարձրացնի աշխատավարձերը, և երրորդ` բյուջեում ունենանք 20 մլրդ դրամ` կրկնապատկելու երիտասարդների խնայողությունները դարձնելով 10%:

Բացի այդ, ըստ նրա, ծրագրավորել են հինգ տարվա համար մինիմալ աշխատավարձի բարձրացում` դրանով ազդակ հաղորդելով բիզնեսին, որ նրանք պարտավոր են լինելու աշխատավարձը ՀՀ-ում ավելացնել փուլ առ փուլ:

Վարչապետը նշեց նաև, որ տնտեսական ճգնաժամից հետո 2013թ-ին առաջին անգամ հաջողվել է լուծել ֆունդամենտալ մի խնդիր, որպեսզի աշխատավարձերի աճը լինի ավելի բարձր, քան գնաճը: Արդյունքում` աշխատավարձերի աճը կազմեց` 6.5%, գնաճը` 5.8%: «Այս տարի գնաճը լինելու է ավելի ցածր, քան եկամուտների աճը: Դա նշանակում է, որ մեր քաղաքացիների համար հնարավորություն ենք ստեղծում, որ այդ հինգ տոկոսը նրանց համար ցավոտ չլինի»:

Տ.Սարգսյանը անդրադարձավ նաև կուտակայինին դեմ արտահայտվողների բարձրացրած հարցին, թե արդյոք այդ գումարները չեն փոշիանա` հիշեցնելով Խնայբանկի պատմությունը: Վարչապետը մատնանշելով համաշխարհային փորձը, նշեց, որ այդ խնայած միջոցները պետք է լինեն դիվերսիֆիկացված:

«Մեկ պետությունում չպետք է լինեն այդ գումարները, քանի որ եթե այդ պետությունը փլուզվեց, ուրեմն կորցնում եք ձեր փողերը: Դրա համար այդ միջոցները պետք է դիվերսիֆիկացված լինեն տարբեր պետություններից թողարկված պարտատոմսերի մեջ: Բացի այդ, դրանք պետք է լինեն հուսալի պարտատոմսեր, բարձր ռեյտինգ ունեցող: Վերջին 80 տարիներին, երբ ամբողջ աշխարհում սկսել են աշխատել կուտակային համակարգերը, չի եղել այդպիսի մի հիմնադրամ, որ սնանկացել է: Սա մեր ընդդիմախոսների հարցադրման պատասխանն է»,- ասաց վարչապետը` հավելելով, որ խիստ չափանիշներ են սահմանված ինչպես կառավարիչների նկատմամբ, այնպես էլ ակտիվների կառավարման հետ:

«Միակ տարբերակը, որ մեր քաղաքացիները կկորցնեն իրենց խնայողությունները, համաշխարհային կոլապսն է, բայց այդ դեպքում խնայողությունների հարցը առաջնային է, առաջնայինը ֆիզիկական գոյատևման հարցն է: Մենք հաշվի ենք առել աշխարհի լավագույն փորձը և այն գիտելիքները, որոնք կուտակված են հեղինակային կառույցներում այս ռեֆորմը առաջ տանելու համար»,- ընդգծեց վարչապետը:

Տ.Սարգսյանի խոսքերով` սա աշխարհի ամենաբարդ ռեֆորմն է, սակայն Հայաստանի զարգացման համար անհրաժեշտ են ռեֆորմներ:

«Ասում են` մենք ձեզ չենք վստահում, երկրի վիճակը լավ չէ, կա արտագաղթ: Այո, այդ ամենը ճիշտ է, բայց շտկելու ճանապարհը լավ ռեֆորմներն են, այլ ճանապարհ չկա: Ռեֆորմները ցավոտ են, քանի որ մենք ստիպում ենք մեր քաղաքացիներին փոխել իրենց վարքագծային կանոնները: Եթե մենք ամեն օր արթնանանք և անենք այն, ինչ անում ենք, ուրեմն կունենանք այն, ինչ ունենք, իսկ եթե ուզում ենք ունենալ այն, ինչ չունենք, ուրեմն` պետք է անենք այն, ինչ չենք անում: Հիմա մենք ասում ենք, որ հունվարից 1-ից 275 հազար երիտասարդ պետք է փոխի իր վարքագծի կանոնը, որը բերելու է այնպիսի փոփոխություններ, որ նախկինում չի եղել: Վարքագծային կաննոները փոխելով գնալու ենք առաջ»,- նշեց Տ . Սարգսյանը` հավելելով, որ այսպիսով նաև փոխվելու է պետության վարքագիծը, քանի որ 275 հազար երիտասարդ ամեն օր վերահսկելու է կառավարությանը:

«Հարգելի երիտասարդներ, այս ռեֆորմը հնարավորություն է տալու ձեր բարեկեցությունը բարելավել ոչ թե 30 տարի հետո, այլ այսօր, քանի որ մենք կունենանք երկար փողեր և դրանք տրամադրենք հիփոթեքային ընկերություններին, որպեսզի նրանք էլ կարողանան դրանք ձեզ տրամադրել և դուք էլ կարողանաք ձեռք բերեք բնակարան: Այս ինստիտուցիոնալ ռեֆորմը խթանելու է տնտեսական աճը, նոր մտածողություն է ներդնելու Հայաստանում: Դժվար է, բայց մենք պետք է գնանք առաջ», -ասաց նա: