Ձեր վստահելի աղբյուրը

ՀՀ կառավարությունն այսօրվա նիստում հավանություն տվեց «Տեղեկատվական տեխնոլոգիաների ոլորտի պետական աջակցության մասին», «Շահութահարկի մասին» Հայաստանի Հանրապետության օրենքում լրացում կատարելու մասին» և «Եկամտային հարկի մասին» ՀՀ օրենքում լրացում կատարելու մասին» ՀՀ օրենքների նախագծերի փաթեթին:

Այսպիսով, ՏՏ ոլորտում գործող նորաստեղծ ձեռնարկություններին, որոնք կունենան ոչ ավելի քան 15 աշխատող, պետությունը կազատի բոլոր հարկատեսակներից՝ սահմանելով շահութահարկի զրոյական դրույքաչափ և թողնելով միայն եկամտահարկի նվազեցված 10 տոկոսանոց հարկը:

Ինչպես կառավարության նիստում նշեց ՀՀ էկոնոմիկայի նախարար Վահրամ Ավանեսյանը, տվյալ ընկերություններին տարբեր գործիքակազմերով՝ դրամաշնորհների միջոցով, կտրամադրվի նաև տեխնիկական աջակցություն:

«Ակնկալվում է, որ այս նախաձեռնության շնորհիվ Հայաստանում տարեկան կստեղծվի 40-60 նոր ձեռնարկություն»,- ընդգծեց նախարարը:

Վարչապետ Տիգրան Սարգսյանը հայտնեց, որ այս գաղափարը ծնվել է նախորդ տարվա դեկտեմբերին՝ Դիլիջանում կայացած ՏՏ բնագավառի ինովացիոն զարգացման թեմայով ֆորումի ժամանակ:

«Այն ժամանակ, երբ այս գաղափարը հնչեցրեցինք՝ խոստացանք, որ կարճ ժամանակահատվածում կպատրաստենք օրենքի նախագիծ և այն կներկայացնենք հանրության դատին: Ուզում եմ շեշտել, որ այս խնդիրը քննարկվել է նաև հանրապետության նախագահի մոտ և արժանացել է նախագահի հավանությանը, քանի որ այս որոշումն ունի քաղաքական բովանդակություն»,- ասաց ՀՀ վարչապետը:

Ըստ վարչապետի` Հայաստանում ՏՏ ոլորտն այս պահին իր զարգացվածությամբ հասել է մի այնպիսի աստիճանի, որ անհրաժեշտ են որակական նոր փոփոխություններ: Իսկ այդ փոփոխությունները, ըստ նրա, կբերեն նրան, որ Հայաստանը ՏՏ համաշխարհային քարտեզի վրա իր առանձնահատկություններով և հարաբերական առավելություններով գրավի իր հատուկ տեղը:

«Այս օրինագիծը այդպիսի նախադրյալներ ստեղծում է նաև այլ գործիքակազմի հետ միասին»,- ասաց վարչապետը` հիշատակելով Վենչուրային հիմնադրամը, որը մասնավոր ընկերությունները ստեղծելու են Համաշխարհային բանկի օժանդակությամբ:

Այդ հիմնադրամի միջոցները նույնպես կարող են ուղղվել Start-up բիզնեսների ֆինանսավորմանը:

«Այն, որ մենք այսօր ձեզ հետ բացառիկ հնարավորություն ենք ստեղծում այդ ոլորտի համար, ազատելով բոլոր տեսակի հարկերից՝ թողնելով միայն եկամտահարկը՝ ֆիքսված 10 տոկոսով, ազատելով շահութարկից, լրջագույն խթան է լինելու Start-up-երի համար: Սա այս ոլորտում կապահովի նոր առաջընթաց»,- հայտարարեց Տ. Սարգսյանը: