Ձեր վստահելի աղբյուրը

Հայաստանի և Եվրոպական Միության միջև նոր համաձայնագրի ստորագրումը կարող է նոր մակարդակի բարձրացնել կողմերի համագործակցությունը: Այս մասին այսօր Երևանում անցկացվող ՀՀ-ԵՄ առևտրի, տնտեսական և համապատասխան իրավական հարցերով համագործակցության ենթակոմիտեի տասնչորսերորդ նիստում հայտարարեց Հայաստանում ԵՄ պատվիրակության ղեկավար Պյոտր Սվիտալսկին:

Նա կարևորեց այն հանգամանքը, որ նիստը տեղի է ունենում այն ժամանակ, երբ մանդատ տրամադրվեց Հայաստանի և ԵՄ-ի միջև նոր համաձայնագիր ստորագրելու շուրջ բանակցությունների մեկնարկի համար:

«Սա շատ կարևոր զարգացում է: Թեպետ համաձայնագրի ազդեցությունը կարող է սահմանափակ լինել, մասնավորապես, այն առումով, որ վերաբերում է առևտրի հարցերին, սակայն համաձայնագիրը կարող է շատ շահեկան դերակատարում ունենալ և նպաստել, որպեսզի Եվրամիության և Հայաստանի հարաբերությունները ամրապնդվեն և բարձրացվեն նոր մակարդակի»,- ընդգծեց Պյոտր Սվիտալսկին:

Նա հույս հայտնեց, որ նոր համաձայնագրի շուրջ բանակցությունները կանցկացվեն կառուցողական միջավայրում և շատ շուտով կկնքվի հաձայնագիրը. «Սա կողմերի երկուստեք ցանկությունն է»:

Պյոտր Սվիտալսկին նշեց, որ առևտուրն ամեն ինչի հիմքն է ևԵՄ-ն առանձնակի ուշադրությամբ է վերաբերվում Հայաստանի հետ կապերի ձևավորմանը: Ըստ նրա՝ ԵՄ-ն Հայաստանից արտահանվող ապրանքների խոշորագույն շուկան է, և պատրաստ է նոր հնարավորություններ ընձեռել Հայաստանին:

«Հայաստանն արդեն իսկ օգուտներ քաղում է GSP+ ծրագրի մասնակցությունից բխող արտոնյալ կարգավիճակից, ինչ արդյունքում հայկական ապրանքներն արտոնյալ պայմաններով են մուտք գործում եվրոպական շուկաներ: Բայց ինչպես բոլորս գիտենք, ներուժը շատ ավելի մեծ է, և ես հուսով եմ, որ Հայաստանը լավ ռազմավարություն կմշակի իր ապրանքներն այնպես գովազդելու և ներկայացնելու, որ դրանք եվրոպական շուկայում մրցունակ լինեն»,-ասաց Հայաստանում ԵՄ պատվիրակության ղեկավար:

Նա միաժամանակ հավելեց, որ ԵՄ-ն նաև օտարերկրյա կամ արտաքին խոշորագույն ներդրողն է Հայաստանում, ուստի կարծում է, որ այս տարի Հայաստանում կատարվող ուղղակի ներդրումների ավելի քան 50 տոկոսը բաժին է ընկնելու ԵՄ երկրներին:

«ԵՄ-ն հանձնառու է Հայաստանում օտարերկրյա ներդրումների մակարդակի բարձրացմանը: Այս գործընթացում հաջողության հասնելու համար շատ պարզ բաներ են պետք: Օտարերկրյա ներդրողները պետք է իմանան, թե ինչի է ուզում Հայաստանը հասնել 10-15 տարուց: Բոլորս գիտենք, որ ԵՄ-ն պատրաստ է 1,5 միլիոն տրամադրել Հայաստանին՝ զարգացման տեսլականը մշակելու համար: Դա կօգնի ԵՄ ներդրողներին և ԵՄ-ին, որպես համագործակցությամբ աջակցող գործընկերոջ, որպեսզի ծրագրերը հղկվեն: Հուսով եմ՝ հայկական կողմն այդ հնարավորությունը կօգտագործի և այդ ծրագիրը բաց չի թողնի»,- նշեց Պյոտր Սվիտալսկին:

Հաջորդ կարևոր հարց, ըստ նրա, այն է, որ Հայաստանին անհրաժեշտ է թափանցիկ և կանխատեսելի իրավական օրենսդրական համակարգ. «Կարծում եմ, որ Հայաստանն այս ուղղով էլ կշարունակի առաջընթաց արձանագրել»:
Երրորդն այն է, որ պետք է լուրջ ջանքեր գործադրել կոռուպցիայի դեմ պայքարի ուղղությամբ:

«Որևէ օտարերկրյա ներդրում չի գա, եթե երկրի իմիջի վրա ստվեր են գցում կոռուպցիայի դեմ պայքարի անբավարարության խնդիրները: Մենք համատեղ ջանքեր ենք ներդնելու, որպեսզի լավագույն հնարավորություններն ընձեռենք օտարերկրյա ներդրումների համար»,- հայտնեց Պյոտր Սվիտալսկին: