Ձեր վստահելի աղբյուրը

Աշխարհում այսօր նշում են ՁԻԱՀ-ի դեմ պայքարի համաշխարհային օրը: Առաջին անգամ ՄԻԱՎ/ՁԻԱՀ-ի դեմ պայքարի օրը նշվել է 1988 թվականի դեկտեմբերի 1-ին, այն կազմակերպել է Առողջապահության միջազգային կազմակերպությունը (ԱՀԿ): Այս օրը նշվում է ՄԻԱՎ/ՁԻԱՀ-ի խնդրի նկատմամբ հասարակության լայն խավերի ուշադրությունը գրավելու, կանխարգելման ոլոտում նոր կազմակերպություններ, խմբեր և անհատներ ներգրավելու համար:

«Կարևորելով ՄԻԱՎ/ՁԻԱՀ-ի դեմ պայքարի խնդիրներն ու հետևողական լինելով երկրում հիվանադության կանխարգելմանը, ներկայում ԱԺ-ում աշխատանքներ են իրականացվում ՄԻԱՎ/ՁԻԱՀ-ի դեմ պայքարին ուղղված օրենքում որոշակի շտկումներ մտցնելու ուղղությամբ»,-այսօր ՄԱԿ-ում օրվա կապակցությամբ անցկացված միջոցառման ժամանակ լրագրողների հետ զրույցում ասաց ԱԺ առողջապահական հարցերի մշտական հանձնաժողովի նախագահ Արա Բաբլոյանը:

Նա նշում է, որ բժշկագիտության ու այս հարցի շուրջ մոտեցումները զարգանալու շնորհիվ օրենքում որոշակի փոփոխություններ են պահանջվում.«Մի կողմից այդ փոփոխություններն ուղղված են լինելու կրթական ու կանխարգելման ծրագրերի ընդլայնմանը, որ հասարակությունն ու առավել ևս երիտասարդությունը ճիշտ իրազեկվեն, իսկ մյուս կողմից էլ՝ նպատակ կա աշխատել բուժական ու կանխարգելման ծրագրերը կատարելագործելու ուղղությամբ»:

Որոշ փոփոխություններ արդեն մշակվել են և շուտով շրջանառության մեջ կդրվեն: «Օրինակ ժամանակին կոշտ մոտեցում կար ոչ միայն հիվանդության, այլև՝ հիվանդների նկատմամբ: Այդ առումով, մենք պետք է փոփոխենք օրենսդրության մեջ այն կետերը, որոնք կարող են բերել խտրականության զարգացմանը: Միևնույն ժամանակ, երբ առաջին օրենքի համաձայն ստուգվում էին թեկուզ 3 ամսով Հայաստան եկողները, ապա այժմ գտնում ենք, որ դա անիմաստ է, քանի որ թեկուզ 1 ամսով երկիր եկողը կարող է վարակակիր լինել»,-ասաց Ա. Բաբլոյանը: Ըստ նրա, հարկավոր է կրթել ու իրազեկել հասարակությանը, որպեսզի հնարավոր լինի խուսափել վարակից:

Իսկ ՄԱԿ-ի մանկական հիմնադրամի ներկայացուցիչ, ՄԱԿ-ի ՄԻԱՎ/ՁԻԱՀ-ի թեմատիկ խմբի նախագահ Լեյլի Մոշիրին ասաց, որ այս հիվանդության դեմ հարկավոր է միասնական, համաշխարհային մակարդակով պայքարել, որպեսզի հնարավոր լինի հիվանդության թվի կրճատման ցանկալի արդյունքներին հասնել, քանի որ սա միջգերատեսչական խնդիր է ու բոլոր գերատեսչությունները, հասարակության բոլոր հատվածները, «բոլորն անխտիր» պետք է մասնակցեն այս գործընթացին՝ ՄԻԱՎ/ՁԻԱՀ-ի դեմ պայքարին: