Ձեր վստահելի աղբյուրը

Գյումրիի նախկին քաղաքապետ Վարդան Ղուկասյանի դստեր սպանված ընկերոջ` երիտասարդ Կարեն Եսայանի գործով իրավահաջորդ մայրը` Անահիտ Իսկանդարյանը և նրա պաշտպան Վարդուհի Էլբակյանը պնդում են, որ Անիի տարածաշրջանի նախկին ոստիկանապետի որդին` այժմ կալանավորված Հարություն Սարգսյանն է սպանողը: Սակայն Հարությունի պաշտպան Լուսինե Սահակյանը համաձայն չէ և ինքն էլ իր հերթին պնդում է, որ հիմա «անմեղ մարդ է գտնվում կալանքի տակ»:

Հիշեցնենք` Վարդան Ղուկասյանի փեսան` Կարեն Եսայանը սպանվել էր իր նշանադրությունից առաջ, ապրիլի 12-ին: Եսայանի սպանության գործով ձերբակալվել է Անիի տարածաշրջանի նախկին ոստիկանապետ Սամվել Սարգսյանի որդին՝ Հարություն Սարգսյանը: Սպանության գործը հանձնվել է ՀՀ ոստիկանության քննչական գլխավոր վարչությանը: Հարուցվել է քրեական գործ ՀՀ քրեական օրենսգրքի 104 հոդվածի 1-ին մասով (կանխամտածված, դիտավորյալ սպանություն) և 235 հոդվածի 1-ին մասով (ապօրինի զենք-զինամթերք կրել, պատրաստել, օգտագործել): 

Panorama.am-ի թղթակցի հետ զրույցում տիկին Անահիտն ասաց, որ դժգոհ է նախաքննությունից, որովհետև վերջերս Անիի տարածաշրջանի նախկին ոստիկանապետը տեսակցել է կալանավորված որդու հետ, մինչդեռ կալանքի տակ գտնվող մեղադրյալի տեսակցությունների ու հեռախոսազանգերի վրա սահմանափակում կա դրված: Նախաքննական մարմնի այս գործողություններն էլ հիմք են հանդիսացել, որ նա նամակ գրի հանրապետության նախագահին:

«Դժգոհ եմ նախաքննությունից, ինքն է (նկատի ունի Հարություն Սարգսյանին-հեղ.) հենց խփողը, փորձաքննության եզրակացությունները բոլորն իր դեմ են: Ապացուցված է ամեն ինչով: Տեսախցիկներն էլ որ նայեք, ամբողջը կտեսնեք, ինչն ինչոց է», -ասաց տիկին Անահիտը:

Նրա պնդմամբ, մի շարք տեսաժապավենները, կրակած զենքի առկայությունը, բազում անհերքելի, ուղղակի ապացույցները, այդ թվում փորձագիտական եզրակացությունները վկայում են Հարություն Սարգսյանի անմիջական մասնակցությունը սպանությանը:

Կարեն Եսայանի սպանության գործով նախաքննական մարմնից դժգոհությունների շղթան շարունակում է նաև Կարեն Եսայանի իրավահաջորդի պաշտպան, Փաստաբանների պալատի փաստաբան Վարդուհի Էլբակյանը:
«Ճիշտ է նախաքննությունը դեռ չի ավարտվել, բայց ինչքանով որ ծանոթ ենք նախաքննական մարմնի գործողություններին, ունենք որոշակի դժգոհություններ: Այն, որ ոստիկանապետը թույլատրել է մեղադրյալի հորը տեսակցել որդու հետ տիկին Անահիտին տեղեկացրել էր քննիչը: Այս պարագայում օրենքի շրջանցում է տեղի ունեցել: Որքանով մեզ հայտնի է մեղադրյալը ցուցմունքներ էլ չի տալիս, և այս պահին որքանով էր նպատակահարմար, ճիշտ, որ թույլատրեցին հանդիպել որդու հետ: Եվ հիմա մենք չգիտենք, թե ինչ կարող է լինել դրա հետևանքը», -փոխանցեց Վարդուհի Էլբակյանը` ընդգծելով, որ ոստիկանության համակարգի նախկին պաշտոնյան, օգտագործելով համակարգում իր նախկին կապերը, ճնշում է գործադրում նախաքննական մարմնի վրա:

«Եթե այսօր նա նստում է քննիչի սենյակում և չի թույլատրում, որ վկայի հետ կատարվի հարցաքննություն, խոչընդոտում է հարցաքննությանը, դա միանշանակ խոսում է այն մասին, որ նա ճնշում է գործադրում նախաքննական մարմնի վրա: Այլ կարծիք լինել չի կարող: Իհարկե, նա իր կապերն է օգտագործում, այլապես ինչու է նրա հետ բացառություն արվել», -նշեց Վարդուհի Էլբակյանը:

Այն, որ Կարեն Եսայանի սպանության մեջ միակ կասկածվող Հարություն Սարգսյանը ցուցմունքներ չի տալիս, մեզ հետ զրույցում հաստատեց նաև նրա պաշտպան, Փաստաբանների պալատի փաստաբան Լուսինե Սահակյանը: Նրա խոսքով, իր պաշտպանյալը չի ընդունում իր նկատմամբ առաջադրված մեղադրանքը, իրեն մեղավոր չի ճանաչում և ցուցմունքներ չի տալիս: 

Մեր դիտարկմանը, թե տուժող կողմը պարբերաբար նամակներ է  ուղարկում նախագահին և պնդում, որ Հարություն Սարգսյանը մեղավոր է, Լուսինե Սահակյանը պատասխանեց կարճ. «Տուժող կողմը բարեխիղճ մոլորության մեջ է»:

Մեր մյուս հարցին, թե արդյոք կարո՞ղ է ասել, որ երկար ամիսներ ձգվող նախաքննությունը փակուղու մեջ է, Հարություն Սարգսյանի փաստաբանը պատասխանեց. «Չեմ կարող ասել, որովհետև նախաքննության նյութերին ծանոթ չեմ դեռ: Երբ նախաքննությունը կավարտվի, կծանոթանամ նյութերին և կասեմ` արդյոք փակուղու մե՞ջ է թե՞ ոչ: Բայց մի բան ակնհայտ է, որ հիմա կալանքի տակ գտնվում է անմեղ անձ»:

Վարդուհի Էլբակյանը, սակայն, նշում է, որ բնականաբար, Լուսինե Սահակյանի պաշտպանական մարտավարությունն է այդպիսին և ինքը համաձայն չէ նրա հետ:

«Ես ձայնագրություններն անձամբ եմ տեսել, որ Կարեն Եսայանին երկու օր անընդմեջ բոլոր ժամերին հետևել է Հարություն Սարգսյանի մեքենան: Այդ մասին ասում է նաև տուժողը` տիկին Անահիտը: Վերջին կադրը եղել է այն, որ նա, հենց նշանադրության օրը, կանգնեցրել է Կարեն Եսայանին, նստել է նրա մեքենան ու նրանք միասին գնացել են: Չգիտեմ էլ ինչ է պարզել նախաքննությունը, բայց գիտեմ, որ դրանից հետո Կարեն Եսայանին գտել են դաժանաբար սպանված: Այսօրվա ապացույցները մեզ համար բավարար են, որ պնդենք, որ սպանողը մեղադրյալն է», -փոխանցեց պաշտպան Վարդուհի Էլբակյանը: Բացի այդ, նրա խոսքով, ըստ փորձագետի եզրակացության, մեղադրյալի հագուստի վրայից կրակոցի հետքեր են հայտնաբերվել:

Տիկին Անահիտը մեզ հետ զրույցում նաև ասաց, որ Հարությունը հանցակիցներ է ունեցել: «էդ եղեռնը մի հոգու գործ չէր: Անպայման, ինքն էնդեղ մենակ չի եղել, երկու հոգի իրեն հետ են բերել էդ վայրից»,- ասաց Կարեն Եսայանի մայրը:

Այս առնչությամբ փաստաբան Էլբակյանը որևէ հստակ բան չի կարող ասել: «Այս պահին հաստատապես ոչինչ չեմ կարող հայտարարել, քանի դեռ չունենք գործի նյութերը: Երբ գործի նյութերը կունենանք, դրանից հետո ես հայտարարությամբ հանդես կգամ», -եզրափակեց փաստաբանը: