Ձեր վստահելի աղբյուրը

Երևանի թիվ 1 ընտրատարածքում դեկտեմբերի 2-ին մեծամասնական ընտրակարգով խորհրդարանական լրացուցիչ ընտրությունների արդյունքներով պատգամավոր ընտրված Ռոբերտ Սարգսյանը իր հասցեին հնչող տարբեր հայտարարությունները «ցինիզմ» է որակում: «Մարդ իրավունք չունի՞ աներձագ ունենա, ինչի աներձագը չի՞ կարող հայրենասեր կամ լավ մարդ լինի: Ես այդ ամենը համարում եմ, որպես ցինիզմ, ես չեմ ուզում իրանց ցինիզմին պատասխան տամ», -Panorama.am-ի թղթակցի հետ զրույցում ասել է Ռոբերտ Սարգսյանը:

-Տարոն Մարգարյանի աներորդին լինելու հանգամանքը չի՞ ազդել, որ դուք պատգամավոր ընտրվեք:
-Այն հանգամանքը, որ Տարոն Մարգարյանը իմ փեսան է, նաև իմ ընկերն է, միանշանակ ազդել է: Ու բոլոր իմ կուսակից ընկերների ու իմ համախոհների աշխատանքի արդյունքն է, որ մենք հավաքել ենք 18 805 ձայն: Իսկ մեր մրցակիցը հավաքել է 3000 ձայն: Այդքան մարդ եթե ինձ քվեարկել է, նշանակում է ես ընտրված պատգամավոր եմ ու ես պատասխան ունեմ տալու  իմ ընտրողների, նաև` չընտրողների, նաև` մեր ժողովրդի առջև: Իմ աշխատանքով ես դա կապացուցեմ իմ գործունեության ժամանակ:

-Ըստ պաշտոնական թվերի, դուք ստացել եք գրեթե նույնքան քվե, որքան այս ընտրատարածքում «մշտական» ունեցող նախկին պատգամավոր Ռուբեն Հայրապետյանը մայիսի 6-ի ընտրություններին (ստացել էր 19, 5 հազար): Ինչո՞վ եք դա բացատրում, այսինքն, դուք նույնքան հեղինակություն ունե՞ք, ինչ Հայրապետյանը:
-Մենք ունենք Հանրապետական կուսակցության անդամներ, մոտ հինգ հազար կուսակից, որոնք որ իրանց աշխատանքը կատարել են: Այսինքն, որ նայում եք Ռուբեն Հայրապետյանի թվերը և իմ թվերը, համարյա նույն թվերն են: Այսինքն` նույն աշխատանքը մեր թիմը նորմալ կատարել է: Իսկ եթե մենք նայում ենք մեր մրցակից թեկնածուի թվերը, համապետական ընտրությունների ժամանակ նա հավաքել է 3753 ձայն, այս անգամ պարոն Սաֆարյանը հավաքել է 3680 ձայն: Այսինքն, իր ընտրողը ճիշտ իրեն ընտրել է:

-Այսինքն, դուք ոչ թե անձի, այլ կուսակցությա՞ն հաղթանակն եք համարում դա:
-Համ կուսակցության հաղթանակ, համ անձի հաղթանակ, ինչի՞ չէ:

-Ի դեպ, Ռուբեն Հայրապետյանը ընտրություններից հետո կապվե՞լ է Ձեզ հետ, շնորհավորել է Ձեզ:
-Ռուբեն Հայրապետյանը մեր կուսակից ընկերն է, Ավանի հիմնադիր թաղապետն է: Իհարկե, նրա աջակլցությունը եղել է, նաև շնորհավորել է:

-Իսկ ինչպե՞ս է աջակցել:
-Աջակցությունը եղել է այնպես, ինչպես մեր մյուս կուսակից ընկերներն են աջակցել:

-Ավանում մեզ հետ զրույցներում շատերը, երբ խոսում էին Ձեր մասին, ասում էին` «Տարոն Մարգարյանի աներձագը»…:
-Ոմանք Տարոն Մարգարյանին են ճանաչում, ոմանք` ինձ են ճանաչում, ոմանք մեր ընկերներին են ճանաչում: Էս 18 հազար ընտրողին ես չեմ կարող անհատապես ճանաչել, այսինքն, ինձ ճանաչողները, իմ հետ շփվողները նաև փոխանցել են` ինչ մարդ եմ ես, նաև իմ նախընտրական ծրագիրն են ուսումնասիրել:

-Ավանում, պարոն Սարգսյան, մի նորամուծություն այս ընտրություններում եղավ` տաքսիներով մարդկանց անվճար ընտրատեղամասեր էին տեղափոխում: Ձեր շտաբներից նման հրահանգ եղե՞լ է:
-Ես ճիշտն ասած լսել եմ նման լուրեր ու անհիմն եմ համարում դրանք: Միանշանակ, նման հրահանգ չի իջեցվել:

-Լավ, պարոն Սարգսյան, ընտրական գործընթացում ձեր շտաբը խախտումների մասին ահազանգ ստացե՞լ է:
-Ոչ, եղել են շատ թափանցիկ, շատ արդար, չեմ ասի ակտիվ ընտրություններ: Բայց եթե լիներ ընտրակեղծիք, երևի կարձանագրեին հանձնաժողովի անդամները:

-Ձեր արդեն նախկին մրցակիցը հայտարարում էր Ավանում վախի մթնոլորտի մասին:
-Ի՞նչ վախ

-Այս կամ այն հիմնարկի աշխատողներին վախեցնելու, սպառնալու մասին:
-Բայց ո՞նց: Մենք բոլորս չափահաս մարդիկ ենք, որ մտնում ես քվեախցիկ ով կարող է քեզ վերահսկել` ոչ մեկ, ոչ մեկ: Թող սթից ըտենց բաներ չասեն: Մեծամասնական ընտրություններում Հանրապետականն առաջադրել է իր թեկնածուին, իսկ «Ժառանգությունն» էլ իր անդամին: Գնացել է ընտրապայքար: Ես բան չունեմ ասելու` ինքը (Ստյոպա Սաֆարյանը-հեղ.) կարող է լավ քաղաքական գործիչ է, բայց «Ժառանգության» անդամ է:

-«Ժառանգությունը» հեղինակություն չունի՞
-Եթե հեղինակություն ունենար, չէր հավաքի 3680 ձայն, այլ կհավաքեր 18 800 ձայն:

Պարոն Սարգսյան, ընտրությունների օրը թիվ 1 ընտրատարածքում լրագրողի նկատմամբ հարձակում տեղի ունեցավ, ինչպե՞ս եք դա գնահատում:
-Ե՞րբ, տեղյակ չեմ:

-Լուրերին չե՞ք ծանոթացել:
-Ոչ:

-Ձեր նախընտրական գովազդային պաստառները շարունակում են մնալ վահանակների վրա:
-Կհանենք

-Ե՞րբ
-Էս քանի օրը` հիմա դա ինչ-որ մի բանի խանգարո՞ւմ է:

-Դե օրենքն է խախտվում
-Խախտում չկա, օրենքը թույլ ա տալիս: Թող իրանց պատգամավորին էլ ավելի լավ տեսնեն, բոլորը ճանաչեն, որովհետև ես մնալու եմ ժողովրդի մեջ, լինելու եմ իրանց կողքին:

-Ընտրության գիշերը հրավառություն եք կազմակերպել…
Հ-րավառություն եղել է, բայց ես դրանից տեղյակ չեմ, չգիտեմ` ով է արել:

-Ձեզանից անկա՞խ են ուրախացել:
-Այո, անկախ ա եղել:

-Հանրապետական կուսակցության ղեկավար կազմից շնորհավորանքներ ստացե՞լ եք:
-Ստացել եմ, շնորհավորանքներ ստացել եմ:

-Վարչապետը զանգե՞լ է, շնորհավորե՞լ է:
-Չէ

-Պարոն Սարգսյան, Ձեր նախընտրական ծրագրում ասում եք, որ պայքարելու եք միջակության դեմ: Ի՞նչ է դա նշանակում:
-Միջակությունը դա միջակ այն պաշտոնյան է, որը ունի միջակ գիտություններ ու խոչընդոտում է մեր ժողովրդի աշխատանքին: Այ իրանց դեմ եմ պայքարելու: Կլնի դա վարչության պետ, կլնի դա բաժնի պետ, կլնի դա համատիրության նախագահ, մյուս-մյուսը այ իրանց դեմ եմ պայքարելու:

-Նույն ծրագրում նաև գրված է, որ պայքարելու եք հովանավորչության դեմ:
-Եկեք, գիտեք, իմ ժամանակը սուղ է ու դուք կարող է շատ հարցեր տաք:

-Չէ, ուղղակի, ուզում եմ Ձեր կարծիքն իմանալ` ո՞րն է հովանավորչությունը:
-Այսինքն` որ մեկը մեկին հովանավորում է, որ ինչ-որ աշխատանք կատարվի նրա համար: Դուք էլ եք լավ պատկերացնում, թե դա ինչ է:

-Իսկ չե՞ք կարծում, որ դուք Տարոն Մարգարյանի հովանավորչությամբ ընտրվեցիք պատգամավոր:
-Ոչ, միանշանակ, ոչ: Ես բազմիցս ասել եմ, որ Տարոն Մարգարյանը, մինչև իմ փեսա լինելը, իմ ընկերն էր, իմ կուսակից ընկերն է եղել:
Այսինքն, եթե Ավանից իմ թեկնածությունը չլիներ, մյուս ընկերոջ թեկնածությունը լիներ, մեկա ըտենց էր լինելու, մեկա ըտենց էին խոսալու: Վատ ա՞, որ մեր ընկերը հայրենասեր է, մեր ընկերը լավ մարդ ա, լավ ընտանիքի հայր ա: Ես վատ բան չեմ տեսնում: Ես պետական համակարգում առաջին կարգի մասնագետից հասել եմ մինչև կադաստրի ստորաբաժանման ղեկավար: Այսինքն, ես ծառայել եմ իմ ժողովրդին:

-Հովանավորչություն չի՞ եղել:
-Ոչ, եթե հովանավորչություն լիներ, առաջին կարգի մասնագետ չէի լինի, միանգամից ստորաբաժանման ղեկավար կլինեի: 2001-ից աշխատել եմ, 2007-ին միայն ինձ նշանակել են, այսինքն վեց տարվա աշխատանք:

-Պարոն Սարգսյան, արդեն որոշե՞լ եք Ազգային ժողովում ի՞նչ եք անելու, մասնավորապես, ո՞ր հանձնաժողովում եք Ձեզ տեսնում:
-Ճիշտն ասած, դեռ չեմ որոշել: Բայց որ որոշեմ, իմացեք, որ ես իմ աշխատանքը շատ ճիշտ, շատ պիտանի եմ կատարելու:

-Ձեզ որևէ հանձնաժողովում չե՞ք տեսնում:
-Կնայեմ հանձնաժողովները, նոր կմտածեմ: Նոր է վերջացել քարոզարշավը:

-Այսինքն, ծանոթ չե՞ք խորհրդարանի հանձնաժողովներին:
-Ծանոթ եմ: