Ձեր վստահելի աղբյուրը

Հանրապետությունում սկսվել են գարնան գյուղատնտեսական աշխատանքները: Բնակլիմայական պայմանները, թվում է, թե առայժմ նպաստավոր են գարնանային աշխատանքների և ագրոտեխնիկական միջոցառումների կատարման համար:
Գյուղատնտեսական նշանակություն ունեցող Արարատյան դաշտավայրում գարնանացանի աշխատանքները նոր ոգևորվածությամբ և նոր թափով են սկսվել: Կատարվում են այգեբացի աշխատանքներ, ընթացքի մեջ են խաղողի վազերի այգեբացի, պտղատուների էտի ձևավորման, ծառերի բների մաքրման և սպիտակեցման աշխատանքները: Արարատյան դաշտավայրում այգեբացի աշխատանքներին զուգահեռ սկսվել է նաև վաղահաս կարտոֆիլի ցանքը:

«Տարին առայժմ բարեհաճ է, եղանակը՝ նպաստավոր, գյուղատնտեսական աշխատանքներ սկսելու համար՝ ճիշտ ժամանակը»,- Panorama.am-ի հետ զրույցում նշեց ՀՀ գյուղատնտեսության փոխնախարար Գառնիկ Պետրոսյանը:

Նրա խոսքերով՝ այս տարի գյուղատնտեսության նախարարությունը բավականին լուրջ միջոցառումներ է իրականացնում գարնանացանն ավելի կազմակերպված անցկացնելու, և գյուղացիական տնտեսություններին որոշակի լուրջ աջակցություն ցուցաբերելու ուղղությամբ:

Նշենք, որ օրեր առաջ գարնանացանի իրականացման գործում հողօգտագործողներին աջակցություն ցուցաբերելու և սերմացուի պահանջարկը մասամբ բավարարելու նպատակով ՀՀ կառավարությունը հաստատել է 2013 թ. գարնանացանի համար գարու, եգիպտացորենի, առվույտի և կորնգանի արտադրության զարգացման ծրագիրը, որի համաձայն արտերկրից և տեղական սերմնարտադրող կազմակերպություններից ձեռք կբերվի և գյուղացիական տնտեսություններին կտրամադրվի 850 տ գարնանացան գարու, 11 տ եգիպտացորենի, 37 տ առվույտի և 530 տ կորնգանի սերմացու: Կառավարությունը սերմացուների ձեռք բերման համար նախատեսել է ավելի քան 700 մլն դրամ (մոտ 1,7 միլիոն դոլար): http://panorama.am/am/society/2013/02/21/government/

Գ.Պետրոսյանը կարևորելով նաև կառավարության կողմից դիզելային վառելիքի և ազոտական պարարտանյութի տրամադրումը գյուղացիական տնտեսություններին, նշեց, որ արդեն ներկրվում է պարարտանյութի հերթական խմբաքանակը, որի մեկ պարկը գյուղացիներին կտրամադրվի 6000 դրամով, մինչդեռ շուկայում այն վաճառվում է 9000-9500 դրամ: Ինչ վերաբերում է դիզվառելիքին, ապա 1 լիտրը գյուղացիներին կտրամադրվի 350 դրամով:

Այս տարի հանրապետությունում, ընդհանուր առմամբ, կկատարվի 34-35 հազար հա գյուղատնտեսական մշակաբույսերի գարնանային ցանք: «Դա լիուլի բավարարում է հանրապետության ներքին պահանջարկը»,- ասաց Գ.Պետրոսյանը:

Փոխնախարարի խոսքերով՝ դեռ վաղ է կանխատեսումներ անել, բայց այս պահի դրությամբ ամեն ինչ լավ է, նույնիսկ հրաշալի, և գարնանացանի հետ կապված որևէ խնդիր չկա: «Մեր դիտարկումներով Արարատյան դաշտավայրի հացահատիկի ցանքատարածությունները գերազանց վիճակում են, իսկ բարձրադիր գոտիներում դրանք դեռևս ձյան ծածկույթի տակ են և միայն 20-25 օր հետո կարող ենք այնտեղ դիտարկումներ իրականացնել, որպեսզի հստակ պատկերացում ունենանք: Ամեն ինչ կարծես թե գնում է բնականոն հունով, բայց գյուղատնտեսությունն ունի անկանխատեսելի իրավիճակներ: Ուստի միայն ապրիլի վերջին կարող ենք կոնկրետ ռեալ իրավիճակը գնահատել, ինչպես նաև կանխատեսումներ անել, քանի որ ցրտահարությունների հիմնական վտանգը Արարատյան դաշտավայրում մինչև ապրիլի 20-22-ը պահպանվում է»,-ասաց Գ.Պետրոսյանը:

Ինչ վերաբերում է գարնանացանի աշխատանքներին, ապա փոխնախարարը նշեց, որ ունեն նաև որոշ մտահոգություններ` կապված կարտոֆիլի մշակման հետ: «Հիմա տեսնում ենք կարտոֆիլի ցանքերի կրճատման միտում»,- նշեց նա:

Նշենք, որ անցած տարի կարտոֆիլի ցեց էր հայտնաբերվել Արարատի և Արմավիրի մարզերում, ինչի արդյունքում գյուղացիները կարտոֆիլի բերքի լուրջ կորուստներ ունեցան: Գ.Պետրոսյանի խոսքերով` հիմա հողօգտագործողների մի մասը մտահոգված է, որ հետագայում ևս խնդիրներ կունեն, ուստի սահմանափակում են իրենց ցանքատարածությունները և ձեռնպահ են մնում կարտոֆիլի մշակությունից:

«Մենք հողօգտագործողներին խորհուրդ ենք տալիս` չխուսափել կարտոֆիլի մշակությունից, քանի որ Արարատյան հարթավայրում մշակվող վաղահաս կարտոֆիլը կարևոր նշանակություն ունի՝ շուկայում կայուն մատակարարում ապահովելու առումով: Եւ բոլոր այն վայերերում, որտեղ հնարավոր է կարտոֆիլ մշակել, պետք է ցանքս իրականացնել: Իհարկե, խոսքը չի վերաբերում այն հողատարածքներին, որտեղ անցած տարի կարտոֆիլի ցեց է ի հայտ եկել»,- ընդգծեց Գ.Պետրոսյանը:

Փոխնախարարը նախալեռնային գոտու հողօգտագործողներին նույնպես խորհուրդ է տալիս վաղահաս կարտոֆիլի տնկանյութ ձեռբ բերեն, քանի որ հուլիսի վերջին և օգոստոսի վերջին կարտոֆիլի պահանջարկն ավելի մեծ կլինի: Նրա խոսքերով` Արարատյան հարթավայրում ցեցի հնարավոր վնասներից խուսափելու համար բերքահավաքն ավելի շուտ կիրականացվի` հունիսի վերջին և հուլիսի սկզբին, և բնական է, որ կարտոֆիլի պահանջարկի հետ կապված մինչև սեպտեմբեր խնդիրներ կառաջանան: «Դա պետք է հաշվի առնեն մեր ֆերմերները և այդ հնարավորությունը պետք է օգտագործեն: Հակառակ դեպքում ստիպված կլինենք դրսից նորից կարտոֆիլ ներկրել»,- ասաց Գ.Պետրոսյանը:

Փորձեցինք նաև պարզել, թե մարզերում գյուղատնտեսական աշխատանքները ինչ փուլում են գտնվում: Գրեթե բոլոր մազպետարաններից հայտնեցին, որ ընթանում են նախապատրաստական աշխատանքներ: Որոշ մարզերում գարնանացանի աշխատանքները կսկվեն մեկ կամ երկու օրից, որոշներում էլ` 15-20 օրից:

Կոտայքի մարզպետարանի աշխատակազմի գյուղատնտեսության և բնապահպանության վարչության պետ Մհեր Եղիազարյանը մեզ հետ զրույցում նշեց, որ ներկայումս մարզի Նաիրիի տարածաշրջանի ցածրադիր գոտում և Աբովյանում ընթանում են ծառերի էտման աշխատանքներ: «Եթե եղանակային պայմանները բարենպաստ լինեն, ապա 10-15 օրից մարզում կսկսվեն գարնանացանի աշխատանքները: Ընդհանուր առմամբ՝ գարնանացանի նախապատրաստական աշխատանքները նորմալ են ընթանում, ներկայումս լուծում ենք պարարտանյութի, դիզելային վառելիքի, գարնանացան գարու սերմացուի հետ կապված խնդիրները»,- նշեց Մ.Եղիազարյանը:

Նշենք, որ մինչև գարնանացանի սկսվելը մարզերի գյուղացիական տնտեսությունները ՀՀ կառավարության կողմից կստանան սուբսիդավորված դիզվառելիք, պարարտանյութ և սերմացու:

Կոտայքի մարզպետարանի աշխատակազմի գյուղատնտեսության և բնապահպանության վարչության պետի տեղեկացմամբ, մարզ ներկրելու համար արդեն հայտավորված է 175600 լիտր դիզվառելիք, 1500 տոննա ազոտական պարարտանյութ, 85 տոննա գարու սերմնացան:

Հարցին, թե որքանո՞վ են պատրաստ գարնանացանի աշխատանքներին, Մ.Եղիազարյանը նշեց. «Ոչ լիարժեք, քանի որ բազմաթիվ խնդիրներ կան՝ կապված գյուղտեխնիկայի հնության հետ, բայց ընդհանուր առմամբ, պատրաստ ենք»:

Նա տեղեկացրեց, որ այս տարի գարնանացան կկատարվի շուրջ 12 հազ. հա հողատարածության վրա: Ցանքատարածությունները, ըստ նրա, նախորդ տարվա համեմատ մոտ 400-500 հա ավելի է:

Վայոց ձորի մարզպետարանի գյուղատնտեսության վարչության պետ Բաբկեն Մկրտչյանը հայտնեց, որ 3-4 օրից մարզի ցածրադիր գոտում, մասնավորապես, Արենի համայնքում կսկսվեն գարնանացանի աշխատանքները: Այս տարի գարնանացանի աշխատանքներ կիրականացվեն 25-20 հա-ի վրա:

Նրա խոսքերով՝ մարզ ներկրելու համար արդեն հայտավորված է 632 հազար լիտր դիզվառելիք, 480 տոննա ազոտական պարարտանյութ, 40 տոննա գարու, կորնգանի և առվույտի սերմացու: Բ.Մկրտչյանը հայտնեց, որ ներկայումս Կառավարության տրամադրած սերացուի համար գումարներն են հավաքագրում:

«Այս պահի դրությամբ եղանակային պայմանները հուսադրող են: Եթե կլիմայական փոփոխությունները չլինեն, ապա ամեն ինչ նորմալ կընթանա: Մեզ տրամադրել են բոլոր պայմանները, եթե եղանակը չխանգարի, ապա նորմալ գարնանացան կանենք»,- ասաց Բ.Մկրտչյանը: