Ձեր վստահելի աղբյուրը

Երևանում 14-ամյա տղայի հետ կատարվածը ցնցել է շատերին. ՊՆ-ի նախկին աշխատակից, կոչումով մայոր նախկին զինծառայող 70-ամյա Պավել Կ.-ն սեռական ոտնձգություն է կատարել 14 ամյա անչափահաս Կարենի նկատմամբ: 

Մեղադրական եզրակացության համաձայն, 70-ամյա ծերունուն մեղադրանք է առաջադրվել այն բանի համար, որ նախորդ տարվա սեպտեմբերին իր բնակարանում հյուրընկալել է կնոջ ազգականներ անչափահաս եղբայրներ Վահեին ու Կարենին ու սեռական ցանկությունները փորձել բավարարել երեխաներից մեկի միջոցով: Անչափահաս Վահեին բնակարանի պատշգամբում խնդրել է խաղալ գունավոր մետաղներով, իսկ Կարենին իր հետ տարել ննջարան, որտեղ էլ բռնություն գործադրելով սեռական ոտնձգություն իրականացրել երեխայի նկատմամբ: Ըստ մեղադրական եզրակացության, նախկին զինծառայողը համբուրել է երեխայի շուրթերը ու նույնն էլ ստիպել է անել երեխային (մեղադրական եզրակացության մեջ բավականին մանրամասն է ներկայացվում երեխայի նկատմամբ 70-ամյա Պավելի կատարած գործողությունները, որոնք նպատակահարմար չենք համարում հրապարակել-հեղ.): Ծերունու այս և մյուս արարքները, սակայն, երկար չեն շարունակվել. ննջարանի դուռը բացել է պատշգամբում խաղացող Վահեն ու ամեն ինչ վերջացել է:

Կատարվածից հետո հարուցվել է քրեական գործ ՀՀ քրեական օրենսգրքի 139-րդ հոդվածի 3-րդ մասի հատկանիշներով. «սեքսուալ բնույթի բռնի գործողությունները , որոնք կատարվել են անչափահասի նկատմամբ»: Այժմ մանկապղծության մեջ մեղադրվող կոչումով մայորը գտնվում է կալանքի տակ:

Երևանի դատարաններից մեկում դռնփակ դատական նիստում ընթացող դատական նիստն այժմ ավարտական փուլում է. մարտի 25-ին դատախազը հանդես կգա մեղարդական ճառով: Մանկապղծության համար մեղադրվող ամբաստանյալի փաստաբան Ժորա Խաչատրյանը Panorama.am-ի թղթակցի հետ զրույցում ասաց, որ չի արդարացնում իր պաշտպանյալի արարքը, իր համար էլ է այն անընդունելի, բայց մեղադրական եզրակացության որոշ դրվագների հետ համաձայն չէ: Նա ասում է, որ իր պաշտպանյալը բռնություն չի գործադրել և դա դատարանում հաստատել է նաև հարցաքննված երեխան: Ու այժմ փաստաբանն սպասում է, որ մեղադրող կողմը կվերաորակի առաջադրված մեղադրանքը:

«Մենք մշտապես պնդել ենք, որ հարկադրանք չկա, կամքին հակառակ գործողությունը չկա, հետևաբար 139 հոդվածի հանցակազմը չկա: Եթե ուզում են, ծայրահեղ դեպքում կարող են վերաորակել 141 կամ 142 հոդվածներով հանցակազմ` սեքսուալ բնույթի գործողություններ կատարելն ակնհայտ տասնվեց տարին չլրացած անձի հետ կամ անառակաբարո գործողություններ», -մեզ հետ զրույցում ասում է փաստաբանը:

Խաչատրյանն ասում է, որ իր պաշտպանյալը գործողությունը կատարելու պահին եղել է գիտակից վիճակում և առողջական ու հոգեկան խանգարումներ չի ունեցել: Բայց նա մանկապղծության մեջ մեղադրվող իր պաշտպանյալին պաշտպանելու է մինչև վերջ:

«Եթե առաջին ատյանի դատարանը անտեսի հանգամանքները ու ծանր պատիժ նշանակի, ապա մենք կգնանք Վերաքննիչ, այնուհետև Վճռաբեկ: Հետո էլ ձեռքներս կբարձրացնենք»,- նշում է նա: Պաշտպանի խոսքով, նախաքննական մարմինը ի սկզբանե բացասական դիրքորոշում է ունեցել ու հակված է եղել խիստ հանցակազմ վերագրել: «Քննչական մարմնի համար էլ էր ակնհայտ, որ բռնություն չի եղել, բայց քանի որ նման արարքի մասին է խոսքը, ապա և վերաբերմունքը եղել է բացասական, և հակված են եղել տանել դեպի խստացում», -նշում է պաշտպանը: 

Մանկապղծության մեղադրանքով Հայաստանում սա առաջին դեպքը չէ. «Ախթալայի լեռնահարստացուցիչ կոմբինատ»-ի նախկին տնօրեն Տեր-Պողոսյանը ևս մեղադրվում էր անչափահաս տղաների նկատմամբ սեռական բնույթի գործողություններ կատարելու համար և նրան մեղադրանք էր առաջադրվել ՀՀ քրեական օրենսգրքի 139-րդ հոդվածի 2-րդ մասի 3-րդ կետով և 3-րդ մասով (սեքսուալ բնույթի բռնի գործողություններ): Տեր-Պողոսյանի մեղքը հաստատվել էր դատարանում, և նա դատապարտվել 15 տարի ազատազրկման:

Հ.Գ. Նյութում տեղ գտած անունները պայմանական են