Ձեր վստահելի աղբյուրը

 «Երեկ դատախազությունը որոշել է ևս 2 ամսով երկարաձգել Լևոն Գուլյանի սպանության գործով քննությունը»,- այսօր լրագրողների հետ հանդիպման ժամանակ հայտարարեց «Հելսինկյան ասոցիացիա» իրավապաշտպան կազմակերպության ղեկավար Միքայել Դանիելյանը, հավելելով, որ իրենց կազմակերպությունը որպես այդ գործով տուժողի իրավահաջորդի ներկայացուցիչ, միջնորդություններ է ուղարկել Երևան քաղաքի դատախազության քննիչ Հրանտ Չախոյանին բացարկ հայտնելու վերաբերյալ, սակայն դա մերժվել է: Նրա խոսքով, այս տարվա հուլիսի 25-ին իրենք դիմում են գրել դատախազությանը, որտեղ նշվում է, որ Գուլյանի գործով որպես վկա անցնող Մարինե Գրիգորյանը և Հայկ Մելքումյանը Շենգավիթի ոստիկանությունում խոշտանգվել և անօրինական անազատության մեջ են գտնվել:

Դրանից հետո Հրանտ Չախոյանը ծանուցագրով իր մոտ է հրավիրում այդ երկու վկաներին: Ծանուցագրում նշված է լինում, որ նրանք կանչվում են Գուլյանի գործով, սակայն, ըստ Դանիելյանի, Մարինե Գրիգորյանին, փաստաբանների ներկայությամբ, Չախոյանը հարցեր է տալիս, թե ինչո՞ւ է Մարինեն դիմել Հելսինկյան ասոցիացիա, ինչո՞ւ է Միքայել Դանիելյանը զբաղվում այդ գործով և ինչո՞ւ է նա ստիպել, որ Մարինեն դիմում ներկայացնի դատախազություն:

Սեպտեմբերի 3-ին, ապա նաև 6-ին Հելսինկյան ասոցիացիայի ղեկավար Մ. Դանիելյանը հրավիրվում է ՀՀ գլխավոր Դատախազության հետաքննության և նախաքննության օրինականության նկատմամբ հսկողություն իրականացնող վարչություն, որտեղ դատախազ Մնացականյանը հայտնում է նրան, որ նա հրավիրվել է ասոցիացիայի դիմումի կապակցությամբ բացատրություն տալու համար: Նա նշում է, նաև որ դատախազությունը քրեական գործի նյութեր է նախապատրաստում, չմանրամասնելով, թե ինչ քրեական գործի մասին է խոսքը:

«Ես հասկացա, որ Գլխավոր դատախազությունը որոշել է քրեական գործ հարուցել իմ դեմ, որ ինչ որ կերպ մեզ հեռացնի Գուլյանի գործից: Մենք լուրջ ճնշում ենք գործադրում դատախազության վրա և նրանք որոշել են այդ կերպ հարցերը լուծել»,- հայտարարեց Մ. Դանիելյանը, հավելելով, որ մինչ օրս «Գուլյանի գործով առաջընթաց չկա, մեր միջնորդությունները մերժվում են և ոչ մի բան չեն մեզ չեն ներկայացնում»:

Հարցին թե, ինչ հիմքով հնարավոր է գործ հարուցել Հելսինկյան ասոցիացիայի ղեկավարի դեմ, Միքայել Դանիելյանն ասաց. «երկու հոդված մենք գտել ենք, որոնցով կարելի է քրգործ հարուցել: Մեկը դա զրպարտության հոդվածն է, մյուսը` արդարադատությանը խոչնդոտելը: Սա մեր կարծիքն է»: