Ձեր վստահելի աղբյուրը

Պոռնոսկանդալի կենտրոնում հայտնված դերասանուհի Անժելա Սարգսյանի «տղամարդը»` Կարեն Արայանը, բերանի կարերը քանդել է, որպեսզի խոսի Մարդու իրավունքների պաշտպանի աշխատակազմի ներկայացուցիչների հետ. Այժմ նա պատրաստվում է նորից կարել բերանը և ավելին, հրաժարվել նաև ջրից: Այդ մասին Panorama.am-ին տեղեկացրեց Արայանի փաստաբան Կիմա Սարյանը:

Ավելի վաղ Panorama.am-ը տեղեկացրել էր, որ Կարեն Արայանը «Նուբարաշեն» ՔԿՀ-ում կարել է բերանը և հայտարարել անժամկետ հացադուլ: Արայանն այդպիսով` իր բողոքն է արտահայտում ապօրինի ազատազրկման և իր նկատմամբ առաջադրած անհիմն մեղադրանքի դեմ: Արայանը նաև Հայաստանի նախագահին, Գլխավոր դատախազին, Մարդու իրավունքների պաշտպանին, Արդարադատության նախարարին և ԱԺ նախագահին ուղղված բաց նամակ էր ուղարկել բանտից: «...Դատարանը նույնիսկ չի կարողանում վկաներին բերման ենթարկել դատական նիստերին և արդեն հինգերորդ ամիսն է, ինչ այդ պատճառով դատավարությունը հետաձգվում է ու չունի ընթացք: Մերժվել են իմ խափանման միջոց կալանքը վերացնելու և գործը կարճելու վերաբերյալ միջնորդությունները և 2011 թվականի հոկտեմբերի 5-ից մինչև այսօր ես գտնվում եմ ապօրինի կալանքի մեջ: Ուստի` ելնելով վերոգրյալից ես այսօրվանից կարել եմ բերանս ու հայտարարում եմ անժամկետ հացադուլ և պահանջում եմ արդարության վերականգնում: Ես հացադուլից դուրս կգամ այն ժամանակ, երբ կգտնվեմ ազատության մեջ», նամակում գրել էր Արայանը:

«Յոթ ամիս շարունակ Արայանը անհիմն կերպով գտնվում է անազատության մեջ և այժմ նրա կողմից բողոքի այս ակցիայի նկատմամբ իրավապահ մարմինները անտարբեր են և շարունակում են լռել», -նկատեց Կիմա Սարյանը` նշելով, որ երեկ է հանդիպել Արայանի հետ և նա իր ջրադուլ հայտարարելու մտադրության մասին հայտնել է իրեն:

Կարեն Արայանի մայրը Youtube-ում տեղադրված տեսանյութի միջոցով հանդես եկավ հայտարարությամբ: «Ինչքան կարելի է բարոյապես ճնշել մարդուն, մի փոքր ընտանիք ենք` ես ու իմ տղան: Մեր տան մեջ չկան համասեռամոլներ, չկա պոռնիկ, չկա աղանդավոր: Մենք դրա համա՞ր ենք տուժում այսօր: Բավական է, բավական է, էլ ուժ չկա»,-բարկացած նշել էր մայրը:

Նախօրեին ՄԻՊ աշխատակազմի ներկայացուցիչները հանդիպել էին Արայանի հետ, և Panorama.am-ի թղթակցի հետ զրույցում ՄԻՊ աշխատակազմի արագ արձագանքման բաժնի պետ Անդրեյ Աղամալյանը տեղեկացրել էր, որ Արայանի առողջական վիճակը նորմալ է և բժիշկները մշակում են նրա բերանի վերքերը:

Ըստ մեղադրական եզրակացության, Կարեն Արայանը մեղադրվում է Անժելա Սարգսյանի պոռնոգրաֆիկ բնույթի լուսանկարները տարածելու համար: Այս տարվա հունվարից ընթացող նրա դատավարությունը մինչ այժմ կոնկրետ արդյունքներ չի տվել` վկաները համառորեն չեն ներկայանում դատական նիստին:

Կարեն Արայանի` կալանքի տակ գտնվելու ընթացքում մեկ անգամ ևս Անժելա Սարգսյանի պոռնոգրաֆիկ լուսանկարները հայտնվել էին համացանցում: Կարեն Արայանի պաշտպան Կիմա Սարյանը Panorama.am-ի թղթակցի հետ զրույցում ասել էր, որ այդ լուսանկարները չնչին տարբերություն ունեն նախորդ անգամ համացանցում հայտնված լուսանկարներից. դրանց մեջ կան նաև նորություններ:

«Ես կասկածներ ունեմ, որ Անժելա Սարգսյանի պոռնոգրաֆիկ նկարների տարածման պատճառը Կարեն Արայանին, այսպես ասած, դաստիարակելն էր, իսկ թե ինչի՞ համար, դա ավելի շատ կարող են ասել իրավապահ մարմինները, որոնք էլ ստեղծել են այս գործը», -մեզ հետ զրույցում նշել էր փաստաբան Սարյանը:

Ո՞ր պաշտոնյաներն են հովանավորում Անժելա Սարգսյանին