Ձեր վստահելի աղբյուրը

Նախօրեին համացանցում արագորեն տարածված ԱԺ պատգամավորներ Վարդան Օսկանյանի և Լևոն Զուրաբյանի սրճարանային զրույցի ձայնագրությունը մեծ աղմուկ է բարձրացրել: Զրույցի ժամանակ քաղաքական գործիչները նախագահական ընտրություններին ընդառաջ ինչ-որ պայմանավորվածությունների են փորձում գալ:

ԱԺ «Բարգավաճ Հայաստան» խմբակցության պատգամավոր Վարդան Օսկանյանի ֆեյսբուքյան էջը, որն ամեն հարցի վերաբերյալ թարմացվում էր պատգամավորի տեսակետներով, առայժմ լռում է: Փոխարենը արդեն հայտարարություն են տարածել Լևոն Զուրաբյանն ու Նիկոլ Փաշինյանը, ում մասին զրույցի ընթացքում խոսք եղել է:

Մասնավորապես, Լևոն Զուրաբյանը իրենց զրույցը գաղտնալսելու մեջ մեղադրում է Ազգային անվտանգության ծառայությանը:

«Ռեժիմի կողմից քաղաքական հակառակորդներին լրտեսելու այս ճղճիմ արարքը հակասում է Հայաստանի Սահմանադրությամբ և օրենքներով ամրագրված ժողովրդավարական տարրական նորմերին ու ռեժիմին հերթական անգամ դնում է օրենքից դուրս: և թող չփորձեն խուսափել այս հանցանքի համար պատասխանատվությունից: Եթե հանցագործները անմիջապես չեն բացահայտվում, ուրեմն դա արել են հատուկ ծառայությունները: Այս օրինախախտման պատասխանատուները վաղ թե ուշ ամբողջ խստությամբ պատասխան են կրելու օրենքի առջև: Իշխանություններին պատասխանատվությունից խուսափելու հնարավորություն չտալու նկատառումով առաջարկում եմ դատախազությանը ընդունել սույն հայտարարությունը որպես հաղորդագրություն հանցագործության մասին և պահանջում եմ քրեական պատասխանատվության կանչել գաղտնալսման և դրա հիման վրա պատրաստված նյութի հրապարակման հեղինակներին։

Այս փաստը հաստատում է վաղուց արձանագրված այն իրողությունը, որ երկրի հատուկ ծառայությունները, փոխանակ զբաղվեն արտաքին վտանգներից երկրի անվտանգության ապահովման համար խիստ անհրաժեշտ հետախուզական և հակահետախուզական գործունեությամբ, հարկատուների միջոցները և սեփական ջանքերը հիմնականում ապօրինաբար ծառայեցնում են գործող իշխանությունների դիրքերի ամրապնդմանն ու ընդդիմությանը լրտեսելու, վարկաբեկելու և վնասազերծելու նպատակներին: 

Ռեժիմի կողմից նման բացահայտ ստոր մեթոդներին դիմելու և ներքաղաքական լրտեսությամբ զբաղվելու իրողության հրապարակայնացումը ցույց է տալիս, որ իշխանությունները այնքան վախեցած են նախագահական ընտրություններում հնարավոր մարտահրավերներից, որ դրանք չեզոքացնելու նպատակով պատրաստ են բռնվել անգամ փրփուրներից:

ԱԱԾ-ի կողմից պատրաստած և հրապարակված նյութի բովանդակության որևէ քննարկում կամ մեկնաբանություն համարում եմ բարոյապես և քաղաքականապես անընդունելի: Ավելին, դա կլինի ուղղիղ այն, ինչ որ պետք է հատուկ ծառայություններին այս ճղճիմ սադրանքը հաջողելու համար: Ուստի, ռեժիմի հատուկ ծառայությունների կողմից վատագույն գեբիստական ավանդույթներով պատրաստված և հրապարակված այս նյութի բովանդակության որևէ քննարկում, մեկնաբանություն կամ հաստատում քաղաքական և հասարակական գործիչների կամ լրատվամիջոցների կողմից ուղղակի հավասարազոր է լինելու համագործակցության հատուկ ծառայությունների հետ այս ապօրինի գործունեության մեջ», ասված է Զուրաբյանի հայտարարության մեջ:

ԱԺ ՀԱԿ խմբակցության մեկ այլ պատգամավոր Նիկոլ Փաշինյանն էլ իր հայտարարության մեջ պահանջել է անհապաղ քրեական գործ հարուցել:

«ԱԺ պատգամավորներ Վարդան Օսկանյանի և Լևոն Զուրաբյանի խոսակցության՝ համացանցում հայտնված ձայնագրության կապակցությամբ լրագրողների բազմաթիվ հարցումներին ի պատասխան հարկ եմ համարում հայտարարել.

ա) խստորեն դատապարտում եմ երկու պատգամավորների խոսակցության ապօրինի ձայնագրումը և տեղադրումը youtube-ում, որը խորհրդային ԿԳԲ-ի գործելակերպի արատավոր դրսևորում է, ինչը չպետք է տեղ ունենա մեր իրականության մեջ:

բ) ՀՀ իրավապահ մարմինները պարտավոր են անհապաղ քրեական գործ հարուցել ՀՀ Քրեական օրենսգրքի 146 հոդվածի հատկանիշներով՝ ձայնագրությունը իրականացրած և youtube-ում տեղադրած անձանց բացահայտելու և քրեական պատասխանատվության ենթարկելու համար

գ) մենք՝ Հայ ազգային կոնգրեսի, ընդդիմության ներկայացուցիչներս ընթացիկ ցավոտ հարցերը քննարկելիս պետք է պահպանենք զսպվածություն, տուրք չտալով էմոցիաներին՝ հանրության առաջ մեր ունեցած պարտավորությունները պատվով կատարելու համար

դ) ընթացիկ քաղաքական իրավիճակը թելադրում և պահանջում է Հայ ազգային կոնգրեսի առաջնորդ, ՀՀ առաջին նախագահ Լևոն Տեր-Պետրոսյանի առաջադրումը ՀՀ նախագահի թեկնածու, և սերժանտական կործանարար իշխանության հեռացման նպատակ ունեցող բոլոր քաղաքական ուժերի համախմբումը նրա թեկնածության շուրջ»,- ասված է Փաշինյանի հայտարարության մեջ: