Ձեր վստահելի աղբյուրը

Գյումրու նախկին քաղաքապետ Վարդան Ղուկասյանի դստեր՝ Մանյա Ղուկասյանի փեսացու Կարեն Եսայանի սպանության գործով այսօր Շիրակի մարզի ընդհանուր իրավասության դատարանում մեկնարկել է 40 րոպե ուշացումով: Մինչ նիստի սկսվելը ամբաստանյալի հարազատները «ամոթ դատախազությանն և ոստիկանությանը», «Հարություն Սարգսյանն անմեղ է», «բռնել իրական մարդասպանին» և այլ վերտառությամբ ցուցապաստառներով հավաքվել էին դատարանի շենքի մուտքի մոտ՝ պահանջելով արդար դատավարություն, փոխանցում է «Հետք»-ը: 

Կարեն Եսայանի սպանության համար մեղադրվող Հարություն Սարգսյանին, որը ոստիկանության Անիի տարածաշրջանի նախկին պետի որդին է, մեղադրանք է առաջադրվել Քր. օրենսգրքի 104 հոդվածի 1-ին մասով՝ դիտավորյալ սպանություն և 188 հոդվածի 1-ին մասով՝ ապօրինի ձեռնարկատիրություն: Մեղադրանքի ծավալից հանվել էր Քր. օրենսգրքի 235 հոդվածով մեղադրանքը՝ ապօրինի զենք կրելու, պահելու վերաբերյալ:

Ըստ աղբյուրի, վիրավորական արտահայտություններ սկսեցին հնչել այն պահին, երբ նիստերի դահլիճ բերեցին Հարություն Սարգսյանին: «Տեսեք, տեսեք, մեր օրերի Ռամիլ Սաֆարովն է: Լավ նայեք, ժողովուրդ, այս տականքին»,- հայտարարել է սպանված Կարեն Եսայանի մայրը՝ Անահիտ Իսկանդարյանը: «Տիկին, ես ձեզ խորհուրդ կտամ չշտապել ու որակումներ չտալ: Նախ գտեք ձեր տղային սպանած իրական հանցագործին: Մի վաճառեք ձեր տղայի արյունը, նախ պարզեք, թե իրականում ով է սպանել նրան»,- տուժողի իրավահաջորդին խորհուրդ է տվել մեղադրյալը:

Դատական նիստի սկզբում ամբաստանյալն, օգտվելով դատավարական իր իրավունքից, խնդրել է ազատել ձեռքերը ձեռնաշղթայից: Բարձրագույն կրթությամբ, նախկինում չդատված 29-ամյա երիտասարդը, պատասխանելով դատավորի՝ կենսագրական տվյալներին վերաբերող հարցերին, հրաժարվել է, առանց իր փաստաբանի, ներկայության պատասխանել տուժողի իրավահաջորդի շահերը ներկայացնող փաստաբաններից Ա. Մելքոնյանի «բանակում ծառայե՞լ է, թե՞ ոչ» հարցին:

«Ես չեմ ուզում պատասխանել այդ հարցին առանց փաստաբանի, քանի որ ինձ բռնելու ժամանակ հարցրին, թե դու էս ինչ օրը եղել ես Վրաստանում, ասել եմ՝ այո, ու դա օգտագործել են իմ դեմ: Հիմա ես չգիտեմ, թե իմ այո-ն կամ ոչ-ը ինչպես կօգտագործեն, դրա համար էլ հրաժարվում եմ պատասխանել»,- պարզաբանել է մեղադրյալը:

Դատավորի այն հարցին, թե ֆիզիկապես առո՞ղջ է Հարություն Սարգսյանը, վերջինս նշել է, որ մինչև 2012թ. ապրիլի 12-ն առողջ էր: «Մինչև մսագործ Կարեն Բաբակեխյանի (Շիրակի մարզային ոստիկանության պետ) հետ հանդիպելս առողջ էի: Ղասաբ Բաբակեխյանի ձեռքի տակով անցնելուց հետո գլխիս վրա հայտնված ուռուցքները շարունակում են մնալ, ծեծ ու ջարդի մնացած հետքերն էլ իրենց զգացնել տալիս են դեռ», - հայտարարել է ամբաստանյալը:

Քանի որ Հարություն Սարգսյանի երեք փաստաբանից և ոչ մեկը չէր ներկայացել դատավարությանը, մեղադրյալը միջնորդել է դատարանին հետաձգել դատական նիստը: «Հետքը» փոխանցում է, որ Հարությունի հայրը դատարանին տեղեկացրել է, որ փաստաբանները բացակայում են հանրապետությունից և կվերադառնան հունվարի վերջին:

 Դատական հաջորդ նիստը նշանակվել է փետրվարի 5-ին: