Ձեր վստահելի աղբյուրը

 «Ժողովուրդ» օրաթերթը տարածել է հայտարարություն՝ ի պատասխան ՀՀ դատական դեպարտամենտի այսօրվա հաղորդագրության, համաձայն որի` «Ժողովուրդ» օրաթերթը անիրավաչափ կարծիքներ տարածելով` փորձում է մոլորեցնել հանրությանը: 

«Ի գիտություն դատական դեպարտամենտիև մյուսների պարզաբանում ենք.
1.Դատական դեպարտամենտը դատարանի փաստաբանը չէ, ուստի իրավասու չէ հանդես գալու որպես նրա շահերի պաշտպանի դերում: Եվ անհասկանալի է, թե ինչն է հայտարարություն տարածելու բուն նպատակը:

2.Հ Հ քաղ. դատ. օր. 97 հոդ. համաձայն, դատարանը, գործին մասնակցող անձի միջնորդությամբ կամ իր նախաձեռնությամբ միջոցներ է ձեռնարկում հայցի ապահովման համար, եթե նման միջոցներ չձեռնարկելը կարող է անհնարին դարձնել կամ դժվարացնել դատական ակտի կատարումը կամ հանգեցնել վեճի առարկա հանդիսացող գույքի վիճակի վատթարացմանը:
Դատարանը նախ պետք է համոզված լինի, որ միջոցներ չձեռնարկելը կարող է անհնարին դարձնել դատական ակտի կատարումը:

3.  Մեր օրաթերթը Հանրապետությունում լուրջ պահանջարկ վայելող պարբերական է: Եվ դժվար է պատկերացնել, թե 3 միլիոն ՀՀ դրամի համար մենք, դատական քննության ընթացքում, կհրաժարվենք մեր պրոֆեսիոնալ գործունեությունից և այլ նպատակների համար կօգտագործենք մեր գույքը: Ավելին, մենք կատարել ենք մեր մասնագիտական պրոֆեսիոնալ պարտականությունը՝ էթիկայի բոլոր նորմերի պահպանմամբ և չենք պատրաստվում լռել:

4. Հայցի ապահովվման համար արգելանք դնելը, ինքնին, ոչ այլ ինչ է, եթե ոչ հարկադրանքի միջոց (գույքի օգտագործման իրավունքի սահմանափակում): Դատարանը կարող էր հայցի ապահովման միջոցներ չձեռնարկել, քանի որ դատական ակտի կատարումը դժվարացնելը հիմնավորող որեւէ փաստարկ չուներ:

5. Այն, որ դատական դեպարտամենտը տեղյակ է դատարանի կայացրած որոշումներից, մեզ հիմք է տալիս պնդելու, որ նա իր մասնակցությունն ունի «արդարադատության իրականցմանը»:

6. Ինչ վերաբերում է մեր գործողություններին` հայցի ապոհովման միջոցը վերացնելու միջնորդությանը, ապա այն սահմանված է ՀՀ քաղ դատ. օր. 101 հոդվածով:

Ուստի մեկ անգամևս տեղեկացնում ենք, որ վաղը ժամը 11.30-ին Աբովյան 22ա հասցեից (Աբովյան-Սայաթ-Նովա խաչմերուկի մոտ) կմեկնարկի բողոքի երթ` դեպի Երեւանի Կենտրոնև Նորք-Մարաշ վարչական շրջանների ընդհանուր իրավասության դատարանի շենք: Երթի մասնակիցները դատարանին կներկայացնեն միջնորդության փաստաթուղթ`պահանջելով, որ «Ժողովուրդ» օրաթերթի և լրագրող Սոնա Գրիգորյանի վրա դրված գույքի 3 մլն դրամանոց արգելանքը հանվի:

Իհարկե, զարմանալի չէ, թե ինչու է դատական դեպարտամենտը ատամներով պաշտպանում Խաչիկ Խաչատրյանին: Դատարանն ու դատական դեպարտամենտը գերադասում են հաճոյանալ օլիգարխին և նրա քաղաքական կնքահայրերին»,- ասված է հայտարարության մեջ: