Ձեր վստահելի աղբյուրը

Սահմանադրական դատարանում նախագահի ընտրության արդյունքները վիճարկող նախագահի թեկնածուների դիմումների քննության ընթացքում կողմերը ներկայացրին իրենց ասելիքը և հերթն միջնորդությունների ներկայացմանն էր: Րաֆֆի Հովհաննիսյանի ներկայացուցիչ Զարուհի Փոստանջյանը Սահմանադրական դատարանին միջնորդեց դատարան հրավիրել գործող նախագահ Սերժ Սարգսյանին:

«Նրան պետք է կարողանանք հարցեր տալ: Ընտրությունների կազմակարպիչ լինելու հանգամանքը պարտավոր ենք դատարանում պարզել ու իրենից պարզաբանումներ ստանալ», -միջնորդությունը ներկայացնելիս բացատրեց տիկին Փոստանջյանը:

Գործով երրորդ կողմ ներգրավված Սերժ Սարգսյանի լիազոր ներկայացուցիչ Դավիթ Հարությունյանը առարկեց միջնորդությանը և ասաց, որ դատարանը հետաքրքրասիրությունը բավարարելու տեղ չէ: «Բազմաթիվ հարցեր, որոնք այստեղ հնչում էին, որևէ առնչություն չունեն Սահմանադրական դատարանում քննվող հարցի վերաբերյալ: Ինչ վերաբերում է կազմակերպման մասին հարցին, ապա ես այդ մասին մանրամասն բացատրություն ներկայացրել եմ», -հավելեց Դավիթ Հարությունյանը:

Այս առարկությունից հետո Զարուհի Փոստանջյանը ի թիվս այլ միջնորդությունների ներկայացրեց նաև բոլոր 1988 ընտրատեղամասերի ընտրապարկերը: «Մենք միջնորդում ենք 1988 պարկերը բերել ու ստուգել դրանց պարունակությունը»,- հայտարարեց Փոստանջյանը: ԿԸՀ նախագահ Տիգրան Մուկուչյանն առարկեց այս միջնորդությանը:

Սահմանադրական դատարանի անդամ Ֆելիքս Թոխյանին սակայն, հետաքրքրում էր` «2 օր է մնացել որոշումը կայացնելու համար, մենք ո՞նց կարող ենք այդ միջնորդությունը կատարել, տեխնիկապես ուղղակի անհնար է», - տարակուսանք հայտնեց Ֆելիքս Թոխյանը:

Զարուհի Փոստանջյանը, սակայն, հղում անելով օրենսդրությանը ասաց, որ հնարավոր է ավելացնել ժամկետը և «բերել այդ պարկերն այստեղ ու պարզել, թե Սերժ Սարգսյանը ում էր խփում»

ՍԴ անդամ Կիմ Բալայանը նկատեց, որ Զարուհի Փոստանջյանը, որպես իրավաբան, չէր կարող նման միջնորդություն ներկայացնել, քանի որ դա տեխնիկապես անհնար է ապահովել: Իսկ Փոստանջյանն էլ պնդեց իրենը. «Այդ պարկերը ցանկության դեպքում կարող են բերվել Սահմանադրական դատարան»:

ՍԴ նախագահ Գագիկ Հարությունյանն ասաց, որ Սահմանադրությամբ նման վեճերի դեպքում նախատեսվում է ավելացնել 10 օր, որը նույնպես տեխնիկապես չի կարող ապահովել հնարավորություն այդ բոլորը ստուգելու, ուսումնասիրելու համար: «Այսինքն, դուք առաջարկում եք ուղղակի կատարել` խախտելով Սահմանդրությունը», -նշեց ՍԴ նախագահը:

Կողմերի միջնորդություններն ու դրանց վերաբերյալ դիրքորոշումները լսելուց հետո ՍԴ նախագահ Գագիկ Հարությունյանը հայտարարեց անորոշ ժամկետով ընդմիջում դրանց վերաբերյալ որոշում կայացնելու համար: Միևնույն ժամանակ, նա կողմերին զգուշացրեց, որ այս գործով ՍԴ-ն ունի ընդամենը մեկ օր ժամանակ գործով որոշում կայացնելու համար և հորդորեց նրանց եզրափակիչ խոսքը կազմել, որպեսզի դրա համար ժամանակ չծախսվի: