Ձեր վստահելի աղբյուրը

«Բարև Երևան» կուսակցությունների դաշինքն այսօր դիմելու է վարչական դատարան` բողոքարկելու ԿԸՀ որոշումը: Այս մասին լրագրողների հետ հանդիպմանը հայտարարեց դաշինքի համամասնական ցուցակում ընդգրկված Դավիթ Սանասարյանը:
Հիշեցնենք, ԿԸՀ շաբաթ օրվա նիստում ԿԸՀ-ն մերժեց Լուսինե Պետրոսյանի դիմումի հիման վրա վարչական վարույթ ընդունել` պարզաբանելով,  որ «Դիմումատուն չունի դիմում ներկայացնելու իրավունք»:

Սանասարյանը հայտարարեց, որ վերահաշվարկը արդյունք տվել է, ճիշտ է ձայները չեն ավելացել, բայց Սանասարյանի խոսքով, բոլոր տեղամասերում ընտրություններն անցել են խախտումներով:

Դ. Սանասարյանը կարծիք հայտնեց, որ «Բարև Երևանը» պետք է վերցնի ավագանու մանդատներն ու աշխատի ավագանիում, նշեց, որ այժմ վերջնական որոշում չի կայացվել:

«Ես փաստում եմ, որ եթե անցած չորս տարիների ընթացքում լիներ ընդդիմադիր կեցվածք ունեցող որևէ մի պատգամավոր, ապա մենք կունենայինք ավելի լավ քաղաքապետարան»,-ասաց Սանասարյանը:
Հիշեցնենք, որ Երևանի ավագանու ընտրությունների մայիսի 5-ին քվեարկության արդյունքում ձայները մասնակիցների միջև բաշխվել են հետևյալ կերպ.

ԱՌԱՔԵԼՈՒԹՅՈՒՆԿՈՒՍԱԿՑՈՒԹՅՈՒՆ	2 690
ԲԱՐԳԱՎԱՃՀԱՅԱՍՏԱՆԿՈՒՍԱԿՑՈՒԹՅՈՒՆ	97 166
ԲԱՐԵՎԵՐԵՎԱՆԿՈՒՍԱԿՑՈՒԹՅՈՒՆՆԵՐԻԴԱՇԻՆՔ	35 721
ՀԱՅԱԶԳԱՅԻՆԿՈՆԳՐԵՍԿՈՒՍԱԿՑՈՒԹՅՈՒՆ	18 493
ՀԱՅՅԵՂԱՓՈԽԱԿԱՆԴԱՇՆԱԿՑՈՒԹՅՈՒՆԿՈՒՍԱԿՑՈՒԹՅՈՒՆ	15 997
ՀԱՅԱՍՏԱՆԻՀԱՆՐԱՊԵՏԱԿԱՆԿՈՒՍԱԿՑՈՒԹՅՈՒՆ	235 515
ՕՐԻՆԱՑԵՐԿԻՐԿՈՒՍԱԿՑՈՒԹՅՈՒՆ	15 732

Ըստ այդմ, ԲՀԿ-ն 17 անդամ կունենա ավագանիում, «Բարև Երևան»-ը՝ 6, իսկ ՀՀԿ-ն՝ 42:

Նշենք, որ ԿԸՀ հրապարակած տվյալների համաձայն, ՀՀ ընտրական օրենսգրքով սահմանված մայիսի 7-ից 10-ն ընկած ժամանակահատվածում ընդհանուր առմամբ 97 ընտրական տեղամասերի քվեարկության արդյունքների վերահաշվարկի աշխատանքների ավարտին թվով 47 տեղամասերի արդյունքներում կողմ ձայների որևէ փոփոխություն չի գրանցվել:
Մնացած 50 ընտրական տեղամասերում գրանցված ոչ էական փոփոխությունների արդյունքում` «Առաքելություն» և «Հայ Յեղափոխական Դաշնակցություն» կուսակցություններին կողմ քվեարկված քվեաթերթիկների թվերը նվազել են 2-ականով, «Բարգավաճ Հայաստան» կուսակցությանը կողմ քվեարկված քվեաթերթիկների թիվը նվազել է 23-ով, «Բարև Երևան» կուսակցությունների դաշինքին կողմ քվեարկված քվեաթերթիկների թիվը նվազել է 11-ով, «Հայ ազգային կոնգրես» կուսակցությանը կողմ քվեարկված քվեաթերթիկների թիվը նվազել է 6-ով, Հայաստանի Հանրապետական կուսակցությանը կողմ քվեարկված քվեաթերթիկների թիվն աճել է 3-ով և «Օրինաց երկիր» կուսակցությանը կողմ քվեարկված քվեաթերթիկների թիվը նվազել է 1-ով:
Վերահաշվարկի աշխատանքների արդյունքում անվավեր քվեաթերթիկների թիվն աճել է 47-ով:

Նախորդող հրապարակում`
ԿԸՀ-ն Լուսինե Պետրոսյանի դիմումի պահանջն էլ մերժեց (Տեսանյութ)