Ձեր վստահելի աղբյուրը

Որևէ մեկ հակասություն չի կարող լինել այն գերատեսչությունում, որտեղ կա հրամանատարական ուղղահայաց ղեկավարում. զինված ուժերի ընդհանուր ղեկավարումն իրականացնում է ՀՀ նախագահը` որպես գերագույն գլխավոր հրամանատար, անմիջական ղեկավարումն իրականացնում է պաշտպանության նախարարը և զորքերի կառավարումն իրականացնում է գլխավոր շտաբի պետը: Այդ մասին Panorama.am-ի թղթակցի հետ զրույցում ասաց Պաշտպանության նախարար Սեյրան Օհանյանը` մեկնաբանելով իր և ԶՈւ Գլխավոր շտաբի պետ Յուրի Խաչատուրովի միջև հակասությունների մասին լուրերը:

«Այդ շահարկումները մեկընդմերթ սկսվում են այն դեպքերում, երբ որևէ արտակարգ պատահարներ (նկատի ունի բանակում արտակարգ միջադեպերը-հեղ.) են տեղի ունենում: Իհարկե, ցանկացած պատահար մեզ համար անընդունելի է, ցավալի է: Բայց ես գտնում եմ, որ նման դեպքերի նվազումը, կարգապահության ամրապնդումը և այդ ուղղությամբ կատարվող աշխատանքները չեն խոսում նրա մասին, որ կարող են ասենք զինված ուժերի ղեկավարություն պաշտոններից ազատվել: Բոլոր այն մարդիկ, ովքեր անմիջական պատասխանատվություն են կրում և նրանց թողտվության, պաշտոնական պարտականությունների կատարման թերանալու մեջ նրանք իրենց տույժը ստանում են, իսկ որոնք ընդգրկված են, մասնակից են հանցագործությունների, նաև ստանում են իրենց պատիժը», -մեզ հետ զրույցում հավելեց Պաշտպանության նախարարը:

Հարցին, թե ինչո՞ւ է այնուամենայնիվ, հատկապես Յ. Խաչատուրովի անունը շոշափվում նման միջադեպերից հետո, Սեյրան Օհանյանը պատասխանեց. «Ես չգիտեմ, ես ժամանակ չեմ ունենում օրվա ընթացքում ինչ-որ անուններ շոշափելու, որովհետև իմ աշխատանքն այնքան լարված է և նույն գլխավոր շտաբի պետի աշխատանքն այնքան լարված է ու հագեցած օրվա միջոցառումներով, որ ես ժամանակ չեմ ունենում դրա մասին մտածել»:

Նկատենք, որ վերջերս ՊՆ զինծառայող Լյուքս Ստեփանյանի մահվանից հետո տարբեր լրատվամիջոցներում տեղեկություններ տարածվեցին, որ Յուրի Խաչատուրովը շուտով պաշտոնանկ է արվելու: