Ձեր վստահելի աղբյուրը

Բանակի զորամասերից մեկում դեկտեմբերի 10-ին զինծառայող Վանիչկա Հովակիմյանի մահվան փաստով հարուցված քրեական գործի շրջանակներում երեկ երեկոյան երրորդ անձն է կալանավորվել. նա վաշտի հրամանատար, կապիտան Արթուր Աթաբեկի Մուրադյանն է: Այդ մասին Panorama.am-ին տեղեկացրեց ՊՆ քննչական ծառայության պետ Արմեն Հարությունյանը:

Նրա խոսքով, Արթուր Մուրադյանի նկատմամբ մեղադրանքն առաջադրվել է ՀՀ քրեական օրենսգրքի 375 հոդվածի 1-ին մասի հատկանիշներով՝ «պետի (հրամանատարի) կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը»:

«Վանիչկա Հովակիյանի գործով նախաքննությունը շարունակվում է, կալանավորված են անձինք, որոնց գործողությունները, մեր կարծիքով, առաջացրել են ծանր հետևանքներ, կատարվել են միջանձնային փոխհարաբերությունների կանոնագրքային խախտումներ: Տեղի է ունեցել շորթման փաստ մի զինծառայողի կողմից Վանիչկա Հովակիմյանի նկատմամբ»,- գործը ներկայացրեց Հարությունյանը:

Օրերս «Լրագրողներ հանուն մարդու իրավունքների պաշտպանության» ՀԿ նախագահ, իրավապաշտպան Ժաննա Ալեքսանյանը, որը զբաղվում է բանակում գրանցված մահվան դեպքերն ուսումնասիրելով, հայտարարել էր, որ բանակում զինծառայողների մահվան գործերով սպաները չեն պատժվում: «Շատ հազվադեպ է լինում, որ քրեական գործերով դատարանում սպաներ դատապարտվեն, հիմնականում շարքային զինծառայողներ են: ՊՆ-ում այսպիսի ներքին դիրքորոշում կա, որ հրամանատարներն անձեռնմխելի են ու չեն պատժվում», -ասել էր Ժաննա Ալեքսանյանը:

ՊՆ քննչական ծառայության պետը մեր խնդրանքով անդրադառնալով իրավապաշտպանի այս հայտարարությանը, ասաց, որ իրականում այդպես չէ ու հավելեց. «Կարող եք նայել յուրաքանչյուր քրեական գործ, որը քննվում է դատարանում: Իրավիճակն այդպես չէ: Յուրաքանչյուր հանցագործություն պետք է քննվի անպայման ոչ թե նրա համար, որ մեղավոր սպա գտնենք: Ում արարքում հանցակազմ հայտնաբերվում է, նրանք էլ մեղադրվում են»:

Ի դեպ, Արմեն Հարությունյանն ասաց, որ պատրաստված չէ, մեր զրույցի պահին  դեռ չեն ամփոփվել արդյունքները  և այս պահին  չի կարող ասել բանակում գրանցված մահվան գործերով կատարված քննությունների մասին, որոնք գրանցվել են այս տարվա ընթացքում:

Հարակից հրապարակումներ

Զինծառայողի մահվան համար մեղադրվող երկու զինծառայողները կալանավորվել են

Զինծառայողին ինքնասպանության հասցնելու մեջ կասկածվողներից մեկը ձերբակալվել է, մյուսը փախել զորամասից

Զինծառայողի մահը միջանձնային հարաբերությունների խախտման հետևանք է. ՊՆախարար