Ձեր վստահելի աղբյուրը

«Չէինք սպասում, որ այսքան դրական փոփոխություններ կարելի է անել: Յոթ տարի է պայքարում էինք եռապատիկը, հնգապատիկը վերացնելու համար: Դուրս եկավ, որ կամք ունենալու դեպքում մեկ ամսում կարելի է անել»,- լրագրողների հետ հանդիպման ժամանակ ասաց «Աքիլես» ավտովարորդների իրավունքների պաշտպանության կենտրոնի նախագահ Էդուարդ Հովհաննիսյանը՝ խոսելով Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու օրենքի նախագծի մասին, որն այսօր կառավարության կողմից հավանության է արժանացել:

Նա նշեց, որ օրենքի նախագծում ներառված որոշ առաջարկների հեղինակն իրենց ՀԿ-ն է, միաժամանակ հավելելով, որ ոչ բոլոր առաջարկներն են ընդգրկվել:

«Կարևորները ներառվել են»,- ընդգծեց նա:

«Ակտուարների միավորման» նախագահ Աստղիկ Անանյանն էլ ասաց, որ առաջարկվող փոփոխությունները դրական են: Ըստ նրա, ՀՀ վարչապետի 2014թ. մարտի 27-ի որոշմամբ ստեղծված ճանապարհային երթևեկության կանոնների հաճախակի խախտման համար նախատեսված տուգանքի չափերի վերանայման աշխատանքային խումբն իրականացրել է մեծ աշխատանք, ուսումնասիրել է վիճակագրություն, միջազգային փորձ: «Խնդիր էր դրված, որ եթե խախտումը վտանգավոր է՝ բարձրացնել տուգանքըի չափը, իսկ եթե վտանգ չի ներկայացնում՝ նվազեցնել»,- ասաց նա:

Ասուլիսին ներկա արդարադատության նախարարի տեղակալ Արսեն Մկրտչյանի խոսքով, աշխատանքային խմբի կողմից կատարվել են ճանապարհային երթևեկության կանոների հաճախակի խախտումների դեպքերի, թվի, դրանց համար կիրառվող տուգանքի չափերի վիճակագրության, դրանց վերաբերյալ միջազգային փորձի ուսումնասիրություն, որոնց արդյունքում էլ կազմվել է փոփոխություններ կատարելու մասին օրենքի նախագիծը:

Նա նշեց, որ սահմանված արագության գերազանցման տուգանքների հաշվարկման ձևը կփոխվի. «Հանձնաժողովն աշխատանքի ընթացքում վիճակագրական ցուցիչներն ուսումնասիրելիս պարզել է, որ կարելի է այլ տուգանքի չափ կիրառել»: Ըստ Ա. Մկրտչյանի, հանձնաժողովն իր աշխատանքի ընթացքում հաշվի է առել հանրային վտանգավորության աստիճանը և քանի որ սարքավորումները հնարավարություն են ընձեռում ճշգրիտ արձանագրել իրավախախտումը, ներառյալ 1կմ/ժամ արագությունը գերազանցելու մասով, հանդես է եկել իր առաջարկներով:

Մասնավորապես, 1-20 կմ/ժ գերազանցելու դեպքում յուրաքանչյուր գերազանցած կմ/ժ-ի համար հազար դրամ տուգանք: Այսինքն, սահմանվածից երեք կմ/ժ գերազանցած վարորդը պետք է 3 հազար դրամ տուգանք վճարի, 14 կմ/ժ գերազանցողը՝ 14 հազար դրամ և այսպես շարունակ, մինչև 20 կմ/ժ-ի գերազանցումը: 21-30 կմ/ժ-ով սահմանված արագության գերազանցելու դեպքում առաջարկվում է կիրառել հաստատուն 30 հազար դրամ տուգանք: Ներկայումս գործող կարգով 1-ից 10 կմ/ժ-ով սահմանված արագությունը գերազանցելու համար նախատեսված է հաստատուն 10 հազար դրամի տուգանք, 11-ից 30 կմ/ժ գերազանցելու դեպքում՝ հաստատուն 30 հազար դրամ տուգանք: 31-50 կմ/ժ-ով սահմանված արագությունը գերազանցելու համար այժմ սահմանմված է 50 հազար դրամ տուգանք, որն առաջարկվում է դարձնել 100 հազար: 51 և ավել կմ/ժ-ով գերազանցելու համար գործող 70 հազար դրամի տուգանքն առաջարկվում է դարձնել 200 հազար դրամ:

Փոխնախարարի խոսքով, այս իրավախախտման առումով 2012-ին կազմվել 246 հազար 296 արձանագարություն, 2013-ին՝ 324 հազար 487, որոնցում 1-5 կմ/ժամ արագությունը գերազանցելու դեպքերը 2012-ին կազմել է 196 հազար 818 դեպք, 2013-ին 257 հազար 314 դեպք:

Գործող օրենսդրությամբ, երթևեկության կանոնների խախտման համար վարչական տուգանքները 30 օրվա ընթացքում չվճարելու դեպքում տուգանքի չափը եռապատկվում է, իսկ 60 օրվա ընթացքում չվճարելու դեպքում` հնգապատկվում:

«Աշխատանքային խումբը ուսումնասիրության ընթացքում պարզել է, որ օրենսդիրը նման կարգավորման մոտեցում է ցուցաբերել, քանի որ այդ ժամանակ գանձելիությունը ցածր է եղել՝ 25 տոկոս, իսկ այժմ գանձելիության տոկոսի բարձր ցուցիչի պայմաններում՝ 75 տոկոս, կարելի է փոփոխություն առաջարկել»,- ասաց արդարադատության փոխնախարարը:

Առաջարկվում է փոխել  կարգը և 30 օրվա ընթացքում տուգանքը չվճարելու համար սահմանել տուգանքի չափի 25 տոկոս ավելացում, իսկ 60 օրում չվճարելու դեպքում՝ 50 տոկոսի ավելացում:

Փոխնախարարն ասաց, որ հանձնաժողովն իր աշխատանքների ընթացքում հիմք է ընդունել վարչական իրավախախտման տուգանքների չափերը որոշելու համար կիրառել ցուցանիշներ՝ հաշվի առնելով հանրային վտանգելիության աստիճանի չափը, հանրային դաշտի վրա ազդեցություն. «Կան մի շարք իրավախախտումներ, որոնք ունեն հանրային մեծ ազդեցություն, առաջարկվել է որ տուգանքի չափը խստացնել»:

Կազմակերպությունների ղեկավարների կամ այլ պատասխանատուների կողմից անսարք ավտոմեքենան երթուղի հանելու համար կամ տվյալ ավտոմեքենան թույլտվություն չունեցող անձին ավտոմեքենան վարելու իրավունք տալու համար 20 հազար դրամ տուգանքն առաջարկվում է դարձնել 25 հազար: Տրանսպորտային միջոցներում կամ տաքսիներում վարորդների ծխելու համար սահմանված 5 հազար դրամ տուգանքն առաջարկվում է դարձնել 20 հազար:

Ավտոմեքենա վարելիս հեռախոսով խոսելու համար գործող երեք հազար դրամ տուգանքն առաջարկվում է դարձնել հինգ հազար:

Նախորդող հրապարակում՝

Կառավարությունն երթևեկության կանոնների խախտման տուգանքների փոփոխությունների մասին