ՏԿԱԻՆ-ի աշխատակիցները սահմանամերձ գյուղերում գիշերային հերթապահություն կիրականացնեն. Արմեն Երիցյան
ՀՀ տարածքային կառավարման և արտակարգ իրավիճակների նախարարությունը Ազգային ժողովի քննարկմանը կներկայացնի օրենքի նախագիծ, որը վերաբերում է Հայաստանի սահմանամերձ գյուղերում նախարարության կատարելիք ծառայությանը: Այս մասին այսօր Ազգային ժողովում 2016թ. պետական բյուջեի նախագծի քննարկման ժամանակ ասաց ՏԿԱԻ նախարար Արմեն Երիցյանը՝ պատասխանելով պատգամավոր Թևան Պողոսյանի հարցին:
«Տավուշի մարզի 24 սահմանամերձ գյուղերում նախարարությունը ծառայություն է կատարելու տարբեր ուղղություններով: Այդ գյուղերում կան ջրամբարներ, որոնց պահպանման խնդիրներն ենք լուծելու»,- ասաց Ա.Երիցյանը՝ հավելելով, որ Ազատամուտ համայնքում արդեն 32 հոգու աշխատանքի են ընդունել:
«Բացի այդ, գիշերվա ժամերին մեր տղաները կիրականացնեն հերթապահություն այն գյուղերում, որտեղ հնարավոր է լինեն դիվերսիաներ կամ Ադրբեջանից մարդիկ մտնեն»:
Ինչ վեաբերում է Տավուշի սահմանամերձ գյուղերում կառուցվելիք ապաստարաններին, Ա.Երիցյանը նշեց, որ այժմ այդ ուղղությամբ աշխատանքներ տարվում են, քննարկվում է գումարի չափը:
«Մենք փորձում ենք այդ գյուղերում անհատական ապաստարաններ կառուցել, կան դպրոցներ, որոնց նկուղներն ենք փորձում կարգի բերել: Մենք այս պաին հաշվարկ ենք անում և շուտով ֆինանսների նախարարությանը կներկայացնենք, թե որքան գումար է անհրաժեշտ ապաստարանների հարցը լուծելու համար»,- նշեց Արմեն Երիցյանը:
ԲՀԿ խմբակցության ղեկավար Նաիրա Զոհրաբյանը նույնպես բարձրացրեց Տավուշում ապաստարաններ կառուցելու հարցը:
«Դա կարևոր է: Օրինակ, Բերքաբերում գյուղապետն իր միջոցներով է կառուցել ապաստարան: Այս հարցը պետք է պետության առաջնահերթություններից լինի»,- նշեց պատգամավորը:
Արմեն Երիցյանը համաձայնեց՝ ասելով, որ ինքը ևս եղել է Բերքաբերում և զգացել դպրոց գնացող երեխաների և գյուղի մյուս բնակիչների անվտանգության անբավարար մակարդակը. «Մենք այնպես կանենք, որ գյուղի բնակիչներին ապաստարաններում պահենք: Այնտեղ դպրոցի հետ կապված խնդիր կա, դպրոցի վրա էլ են կրակում, այդ ուղղությամբ էլ ենք աշխատում ու ոչ միայն այդ գյուղում»:
Ն.Զոհրաբյանը անդրադարձավ նաև հակակարկտային կայաներին և նախարարին խնդրեց հստակ նշել՝ արդյոք Արմավիրի մարզում կա՞ն հակակարկտային կայաններ և ինչո՞ւ այնպիսի համաչափությամբ չեն տեղաբաշխված այդ կայանները, որ որևէ բնակավայրից դժգոհություն չլինի, որ այդ կայանների բացակայության պատճառով գյուղացին զրկվել է բերքից:
Ա.Երիցյանն ի պատասխան նշեց, որ ներկա դրությամբ հանրապետության ողջ տարածքում գործում է 472 հակակարկտային կայան, որը կազմում է ընդամենը 8-9 տոկոս, բնականաբար, դա բավարար չէ համաչափության համար:
«Մեկ հակակարկտային համակարգը արժե 3.5 միլիոն դրամ,այդ ուղղությամբ առաջարկներ ներկայացրել ենք»,- ասաց նախարարը:
Նաիրա Զոհրաբյանին հետաքրքրում էր նաև այն, թե նախարարության թեժ գծին ի՞նչ խնդիրներով են դիմում:
Արմեն Երիցյանը պատասխանեց. «Օրինակ՝ դուռը փակվել է, գնանք բացենք, կամ 89 տարեկան տղամարդը զանգում է, ասում է, որ գնանք իր պամպերսը փոխեք: 911 ծառայությունն ուզում ենք այնպես անել, որ լինի բարի ծառայություն: Էլ չեմ ասում, որ փոքրիկ երեխան կարող է զանգի ու ասի՝ եկեք մաթենատիկայիս խնդիրը լուծեք»: