Ձեր վստահելի աղբյուրը

Պատժից պայմանական վաղաժամկետ ազատ արձակման համակարգում փոփոխություններ են սպասվում: Այդ մասին Panorama.am-ին տեղեկացրեց Արդարադատության նախարարության տեղեկատվության և հասարակայնության հետ կապերի վարչության պետ Լուսինե Մարտիրոսյանը:

Այսօր «Քաղաքացիական հասարակության ինստիտուտ» Հասարակական կազմակերպության տնօրեն Արման Դանիելյանը լրագրողների հետ հանդիպման ժամանակ հայտարարել էր , թե պայմանական վաղաժամկետ ազատ արձակման համակարգի խնդիրները, չնայած պատկան մարմինների խոստումներին, չեն լուծվում և ավելին, տարեց տարի դրանք խորանում են: Նա ասել էր, որ պայմանական վաղաժամկետ ազատ արձակման համակարգը չի գործում:

Մեր խնդրանքով մեկնաբանելով հայտարարությունը, Մարտիրոսյանն ասաց, որ արդարադատության նախարար Արփինե Հովհաննիսյանի հանձնարարությամբ, ներկայումս ՀՀ արդարադատության նախարարությունում աշխատանքներ են իրականացվում պատժից պայմանական վաղաժամկետ ազատման, պատժի չկրած մասն ավելի մեղմ պատժատեսակով փոխարինելու համակարգի կատարելագործման համար անհրաժեշտ օրենսդրական փոփոխությունների մշակման ուղղությամբ:

«Մասնավորապես, դրանց արդյունքում կպարզեցվի պատժից պայմանական վաղաժամկետ ազատման վերաբերյալ որոշում կայացնող մարմինների համակարգը, կսահմանվեն այն օբյեկտիվ չափանիշները, որոնց հիման վրա համապատասխան մարմինները պետք է որոշեն դատապարտյալին պայմանական վաղաժամկետ ազատելու հարցը, ինչպես նաև կհստակեցվեն յուրաքանչյուր մարմնի գործառույթները: Այս նպատակների իրագործման համար ՀՀ արդարադատության նախարարությունում այժմ ուսումնասիրվում են մինչ այս պահը եղած առաջարկները, որից հետո նոր նախագիծ կդրվի շրջանառության մեջ»,- մեզ հետ զրույցում փոխանցեց նախարարության տեղեկատվության և հասարակայնության հետ կապերի վարչության պետը: