Ձեր վստահելի աղբյուրը

Ինչպես ավելի վաղ տեղեկացրել էինք` ՀՀ կառավարությունը պահուստային ֆոնդից 20 մլն 500 հազար դրամ հատկացրեց ՀՀ առողաջապահության նախարարությանը` ԱԻՄ կուսակցության ղեկավար Պարույր Հայրիկյանի բուժումը շարունակելու համար: Ըստ ՀՀ առողջապահության նախարար Դերենիկ Դումանյանի` Պ. Հայրիկյանն իր բուժումը կշարունակվի արտերկրում:

Վերջինս, հիշեցնենք, օրերս facebook-յան իր էջում գրառել էր. «Կարմիր խաչի հիվանդանոցում եմ։ Ձեռքիս վիճակը գնալով վատանում է, ու այս համակարգչի ստեղնաշարը վեր է ածվում տանջանքի գործիքի…»: Կարելի է ենթադրել, որ Առողջապահության նախարարությունն այս գրառումը տեսնելով է որոշում կայացրել օգնել Պ.Հայրիկյանին հոգալու բուժումը, այն էլ` արտերկրում:

Կառավարության այս որոշումը, մեղմ ասած, վրդովեցրեց շատերին, Facebook-ը ուղղակի ողողվեց որոշման դեմ բողոքավոր մեկնաբանություններով. «20,5 միլիոն դրամանոց փամփուշտ...Կառավարություն ունենք, աշխարհը չունի...»,
«Ոչ մեկի դեմ ոչինչ չունեմ: Բայց կառավարությունը լավ կաներ փող փոխանցեր Տավուշի մարզի այն մարդուն, ով իր այգում վիրավորեց ադրբեջանցու գնդակից, ով պետք է գնա վիրահատության ու ոչ մեկ չի օգնում նրան…»,
«Հայրիկյանի գործով կալանավորված մարդիկ կան, դրանցից մեկը բավականին ունևոր էր ներկայանում, կինը որ մեքենայի վրա մատը դրել է, ամուսինը առել է, Հայրիկյան կարող էր հանգիստ դատի տալ ու կրած վնասի փոխհատուցում պահանջել էդ ունևոր մարդուց: Իրա համար 20 մլն դոլարն ինչ է որ: Երկու ամիս առաջ 8 մլն դրամ հենց ընենց տեղը գցեց ջուրը գնաց.... Ճիշտը դա կլիներ, թե չէ առողջապահության նախարարության հիմնավորումը շատ ծիծաղելու է....», «Տպագրիչների փողոցում տների գները շատ բարձր են ժողովուրդ ջան. Հայրիկյանի տունը Տպագրիչների վրա էր, չէ՞, ամառանոց էլ ունի»,
«Իսկ խեղճ ու կրակ տատիկ-պապիկներն ինչ ասեն, որ սկի մի կտոր հաց չունեն ուտելու, անտեր ու անօգնական քայլում են փողոցներում...թող էս իշխանություններն իրար մեջ գումար սփռելով ման գան...ողորմելիներ, մի օր մեկդ 100 մետր քայլի տեսնի ինչքան մարդ կա ում համար ոչ թե 20 միլիոնը այլ 20 դրամն է էական...ոչինչ, ոչ մեկ անպատիժ չի մնալու, եթե ոչ մարդկանց` գոնե Աստծո կողմից…»… մնացածները մեջբերելու կարիք չկա` բոլորն այս ոճի մեջ:

Տողերի հեղինակը ևս գրառում է կատարել` դիմելով անձամբ Պարույր Հայրիկյանին. «Դուք միշտ, իբրև թե, հանդես եք եկել այն դիրքորոշմամբ, որ Հայաստանում շատ բաներ է պետք փոխել, անօրինության դեմ եք պայքարել, մտահոգվել մեր հայրենիքի համար: Ես ուզում եմ, որ Դուք իմանաք, որ Հայաստանում կան հարյուրավոր երեխաներ, որոնք բուժման կարիք ունեն , որոնք քաղցկեղի դեմ պայքար են մղում և որոնց ծնողները չեն կարողանում 5-6 հազար դոլար հայթհայթել, որպեսզի փրկեն իրենց բալիկի կյանքը` մեր ՀԱՅԱՍՏԱՆԻ ապագա քաղաքացիների կյանքը: Որ այդ երեխաների ծնողները չեն կարողանում անհրաժեշտ դեղամիջոցները ձեռք բերել, չեն կարողանում բժշկի դիմել կամ տանել հետազոտման.... Ես ուզում եմ, որ Դուք իմանաք, որ Հայաստանի սահմանամերձ գյուղերում մարդիկ ծայրահեղ ծանր վիճակում են ապրում, չունեն տարրական ապրուստի միջոցներ, անգան գյուղտեխնիկա չունեն, որպեսզի հող մշակեն ու իրենց ընտանիքը պահեն... նրանք արտագաղթում են նաև այս պատճառով, իսկ սահմանամերձ գյուղերի երեխաների մեծ մասի երազանքը հեծանիվ ունենալն է.... Ես ուզում եմ, որ Դուք իմանաք, ու անգամ համոզված եմ, որ գիտեք` 20 մլն դրամով կարելի է շատ ու շատ խուլ, հաշմանդամություն ունեցող երեխաների համար լսողական սարքավորումներ գնել ու անվասայլակներ, որպեսզի նրանք կարողանանք գոնե մեկ-մեկ տանից դուրս գալ ու կրթություն ստանալ ներառական դպրոցներում:

Եվ ահա Դուք այժմ հնարավորություն ունեք հրաժարվելու այդ 20 մլն դրամից, որ Ձեզ Հայաստանի «մտահոգ» կառավարությունը հատկացրել է բուժման համար... Ես վստահ եմ, որ Դուք դրա կարիքը չունեք և վստահ եմ նաև, որ Ձեր կյանքին վտանգ չի սպառնում, այսինքն Դուք հանգիստ կարող եք հրաժարվել դրանից, քանի որ վերոհիշյալ հանգամանքները առկա են ու հազարավոր քաղաքացիներ ավելի շատ այդ գումարի կարիքն ունեն: Ապացուցեք, որ Դուք մտահոգ եք Հայաստանի ու դրա քաղաքացիների ապագայով... Դա շատ հեշտ է անել, հավատացնում եմ Ձեզ»…

Ստեղծվել է նաև բաց խումբ` «Ընդդեմ կառավարության որոշման», որի մասնակիցներից մեկն էլ առաջարկեց «այդ գումարի չափով կազմել օգտակար գործերի ցուցակ ու գնալ Կառավարության շենքի դեմ բողոքելու»:

Panorama.am-ը ներկայացնում է իր օգտակար գործերի ցուցակը, որում առաջնահերթ առանձնացրել է երեխաների առողջությունը. կայքում այս պահին «սպասում են հովանավորի» 45 հիվանդներ, որոնցից 32-ը անչափահասներ են: Նրանց բոլորին հնարավոր է բուժել, թեև առողջական խնդիրները բարդ են ու ժամանակ են պահանջում: Երեխաների մեծ մասը բուժվելուց, վիրահատվելուց հետո կկարողանան նորմալ քայլել, շարժվել, կկարողանան ապրել լիարժեք կյանքով: Օրինակ, 2004թ-ին ծնված Վաղարշակ Ադամյանին, ում ծնողները գործազուրկ են, հարկավոր է ընդամենը 6 հազար դոլար կամ` շուրջ 2.4 մլն դրամ, որպեսզի ոտքերի դեֆորմացումը վիրահատվի: Իսկ 2000թ-ին ծնված Լարիսան տառապում է վերջույթի 12 սմ կարճ լինելուց, հասկանալի է` չի կարողանում նորմալ քայլել…. Նրան վիրահելու համար անհրաժեշտ է ընդամենը 6700 ԱՄՆ դոլար կամ` շուրջ 2.5 մլն դրամ… Նշված կայքում նման երեխաների, ինչպես նաև մեծահասակների մասին տեղեկատվություն շատ կա, շատ են նաև օնկոլոգիական հիվանդություններով երեխաների մասին տեղեկություններ, որոնց ոչ բոլոր դեպքերում է կարողանում օգտակար լինել նույն Առողջապահության նախարարությունը:

Եվ ահա` ինչո՞ւ պետք է հարկատուներս վճարենք մի մարդու բուժման համար, այն էլ այդչափ ահռելի գումար, ով անգամ պետական ծառայող էլ չէ, երբ ամենևին սոցիալապես անապահով չէ ու ֆինանսական խնդիրներ, ինչպես գիտենք բոլորս, չունի: Վճարենք նաև այն դեպքում, երբ 2013թ-ի պետական բյուջեով թոշակառուների թոշակը անգամ 1000 դրամով չավելացավ, երբ գործազուրկ հաշմանդամները թոշակ են ստանում ծիծաղելի 10-20 հազար դրամ (լավագույն դեպքում), իսկ հազարավոր մարդիկ դեռ շարունակում են աշխատավարձ ստանալ ՀՀ-ում սահմանված նվազագույն աշխատավարձի չափով` 35 հազար դրամ:

Ինչպե՞ս կվարվի Հայրիկյանը...

Նախորդիվ` 
Կառավարությունը 20 մլն 500 հազար դրամ հատկացրեց Պարույր Հայրիկյանի բուժումը արտերկրում շարունակելու համար