Ձեր վստահելի աղբյուրը

Մեկ տարի առաջ Առինջում տարօրինակ հանգամանքներում մահացավ 20-ամյա Մարո Գուլոյանը: Նրա մահվան պատճառը, որով էլ հարուցված քրեական գործը կարճվեց, ինքնասպանությունն է, սակայն հարցականները պակասելու փոխարեն գնալով ավելանում են ու ամենագլխավորն այն է` ինչո՞ւ իրավապահները այդպես էլ համառորեն «չնկատեցին» խոսուն փաստերը առ այն, որ Մարոն իրականում ինքնասպան չի եղել ու այդպես էլ չհամաձայնեցին գործի քննությունը Կոտայքի մարզից տեղափոխել Երևան:

Հիշեցնենք, 2012թ-ի ամռանը Առինջ գյուղում քսան տարեկան Մարո Գուլոյանին հայտնաբերել էին խալաթի գոտիով կախված տան լոգարանում: Մարոն մահվան պահին ուներ 2 տարեկան երեխա և հղի էր երկրորդ երեխայով: Ըստ գործի նյութերի` նրա ամուսնությունը եղել է անհաջող, ամուսնու հետ անընդհատ վիճաբանություններ են եղել, անգամ բանը հասել է բռնության, սակայն Մարոն ոչ մի անգամ ոստիկանությանը չի դիմել: Ամուսինը` Գևորգը, խաղամոլ է եղել, չի աշխատել, մշտապես պարտքերի մեջ է եղել:

Թեև հարազատների և Կանանց ռեսուրսային կենտրոնի պահանջով ոչ միայն Մարոյի արտաշիրիմում անցկացվեց, այլև փորձաքննություն անցկացվել, որի ժամանակ ամուսնու ազգականուհին, ով, իբրև թե, հայտնաբերել է Մարոյին լոգարանում կախված, այդպես էլ չի կարողացել ապացուցել, որ իր խոսքերի մեջ ճշմարտություն կա, այդուհանդերձ 10 ամիս տևած կասկածելի հանգամանքների մատնանշմամբ համալրված նախաքննության ավարտը հօգուտ Աբովյանի քաղաքապետի ազգականներ Գուլոյանների համար էր` գործը կարճվեց: Կանանց ռեսուրսային կենտրոնի իրավաբանի բնորոշմամբ` քրեական գործը լի է ակնհայտ հակասություններով, չափազանց կասկածելի զուգադիպություններով ու անաչառ քննության իրականացման պարագայում գործով իրական եղելիությունը անկասկած կբացահայտվեր, սակայն Կոտայքի մարզը այդպես էլ չկարողացավ անաչառ քննություն իրականացնել:Այդ մասին տեղեկացվել է ՀՀ Ոստիկանության քննչական գլխավոր վարչությանն ու ՀՀ Գլխավոր դատախազությանը, այդուհանդերձ գործի քննությունը Կոտայքից Երևան տեղափոխելու պահանջին մեկ շաբաթ անց հաջորդեց քրգործի կարճման մասին որոշումը:

Եվ ահա Կանանց ռեսուրսային կենտրոնը տարածել է հաղորդագրություն, որով տեղեկացնում է բողոքի ակցիայի մասին.
«Մարո Գուլոյանն ինքնասպան չի եղել, իրավապահ մարմինները պարտավոր են պատշաճ քննություն իրականացնել գործով` անկախ բոլոր հանգամանքներից և ղեկավարվելով միայն օրենքով: Հասարակության իրազեկման և նրա աջակցության նշանակությունը չափազանց կարևոր է: Բա՛վ է պետությունից խնդրել պաշտպանել մարդու իրավունքները. այն պարզապես պարտավոր է դա անել:

Այդ պահանջը հունիսի 17-ին` ժամը 12:30-ին, կրկին բարձրացվելու է ՀՀ Գլխավոր դատախազության առջև, սակայն այժմ ոչ թե գրավոր, այլ բառի բուն իմաստով, իսկ նույն օրը` ժամը 14:30-ին` նաև Կոտայքի մարզի ընդհանուր իրավասության դատարանում (քաղաք Աբովյան), որտեղ տեղի կունենա Մարո Գուլոյանի գործով վարույթի կարճման մասին որոշման դեմ ներկայացված բողոքի քննությունը»,- մասնավորապես ասված է հաղորդագրության մեջ.... Մարոն չի մոռացվել:

Նախորդիվ`
20-ամյա Մարոյի «ինքնասպանության գործով» հարցականներն ու կասկածները շատ են, բայց վարույթը կարճվել է