Ձեր վստահելի աղբյուրը

Նկարիչ Կայծ Վանիկյանը (ծն. 1961 թ., Երևան) իր հերոսների հետ փնտրում է արժեքներ` մոռացված անցյալում, մարդկային հոգու որակներ, որոնք իրականում երբեք չեն փոխվում, բայց և կարող են դուրս մղվել հիշողությունից, որից էլ ծնվում ու խորանում է շրջապատի քաոսը:

Այդ մոռացվածը հետ բերելու ազնիվ մղումով նա ստեղծում է կերպարներ, որոնցում քնքշությունն ու թախիծը, հեզությունն ու համբերությունը իրենց դարձնում են հնաբույր, զերծ ագրեսիայից ու անտարբերությունից, բայց ապրող, զգացող էակներ:

Նկարիչը փնտրում է գոյություն չունեցողը, իր գույնի լույսը արտահայտում է մարդու ներքին էներգիան, որը և կերպարներին քնարական շունչ է հաղորդում: Գունային թանձրաշերտերը, հարուստ ֆակտուրան դինամիկ վիճակներ են ստեղծում, մութ ֆոները միանգամից լուսավորվում են դեղինի ամենատարբեր արտահայտություններով` կտավներն ասես մայրամուտի արեւալույսով ողողված, իրենց պայծառությամբ տրամադրող մթնոլորտ են ստեղծում. նկարիչը գունային սյուժե է հորինում` դեղինի սիմֆոնիա:

Իր նկարչության ազդեցությունները ակնհայտորեն գալիս են վաղ և միջին Վերածննդի շրջանից (Մազաչո, Ռեմբրանտ): Ոճը, գունաձևերը, սլացիկ, հպարտ կեցվածքները հատուկ են Վերածննդի վարպետների գործերին:

«Կայծ Վանիկյանը անցել է հոգևոր ինքնամաքրման ճանապարհ: Դիմում է ոչ միայն աստվածաշնչյան թեմաների, առաքյալներին, այլև պարզ մարդկանց, որոնք իրենց հոգու խորքում նույն զգացումը, նույն կրակը, նույն տվայտանքը ունեն և նրանք ոչինչ չունեն, գլուխը դնելու տեղ չունեն, սակայն և շարժում են նկարչի հետաքրքրասիրությունը, որովհետև մաքուր են, ու ինքն էլ անկեղծորեն է պեղել այդ ներաշխարհը: Եվ ահա ուզում է նրանց վերադարձնել նախնական պարզ, բայց մոռացված վիճակները: Իր ստեղծած կերպարները ճշմարիտ են, որովհետեւ արվեստագետի ներսից, հոգուց են ծնվել: Այս ամենի մեջ ոչ այնքան իմաստ, որքան խորհուրդ է պետք փնտրել» ասել է արվեստաբան Սարո Սարուխանյանը:
աղբյուրը՝ azg.am

Կայծ Վանիկյանը մասնակցել է միջազգային մի շարք ցուցահանդեսների: Նկարների մեծամասնությունը գտնվում են աշխարհի տարբեր անկյուններում և մասնավոր հավաքածուներում:

Հայկական արվեստ շարքը նպատակ ունի նորելու մեր հիշողությունն ու հարգանքը` հանդեպ հայ արվեստի վարպետների ու դասականների:

Շարքի նախորդ հրապարակումները`

«...Սերտ կապ կա Արարչի և քանդակագործի միջև»... Գետիկ Բաղդասարյան (լուսանկարներ, տեսանյութ)

Կրթվել է Արևմտյան արվեստի լավագույն ավանդույթներով… Դավիթ Միրզոյան (լուսանկարներ)

Հայրենասիրությունը միայն արվեստագետների ու մտավորականների մենաշնորհը չէ… Լևոն Ասլանյան (լուսանկարներ)

«Ես չեմ ընտրել իմ արվեստը, այն իմ արյան կանչով է»… Անուշ Եղիազարյան (լուսանկարներ)

«… Իմ նկարները ես եմ»… Հասմիկ Ավետիսյան (լուսանկարներ)

ՄԱԿ-ի կազմակերպված ցուցահանդեսում նրա կտավը լավագույնն է ճանաչվել... Վեսո (լուսանկարներ)