Ձեր վստահելի աղբյուրը

«Սա նույն ապօրինի որոշումն է, որ կայացրեց Հայաստանի Հանրապետության Արդարադատության խորհուրդը, սա այն որոշումն էր, որը պայմանավորված էր երկրի բարձրաստիճան պաշտոնյաների պատվերով»,- անդրադառնալով այսօր առավոտյան Կենտրոն և Նորք Մարաշ համայնքների առաջին ատյանի դատարանի դատավոր Պարգև ՕՀԱՆՅԱՆԻ լիազորությունները դադարեցնելու մասին կարգապահական հանձնաժողովի որոշմանը, հայտարարեց նախկին փաստաբան, այժմ ԱԺ պատգամավոր Զարուհի ՓՈՍՏԱՆՋՅԱՆԸ:

Հիշեցնենք, որ արդարադատության խորհուրդն այսօր առավոտյան հրապարակեց մայրաքաղաքի Կենտրոն և Նորք Մարաշ համայնքների առաջին ատյանի դատարանի դատավոր Պարգեվ Օհանյանի գործով որոշումը, որի համաձայն բավարարվել է կարգապահական հանձնաժողովի որոշումը կարգապահական պատասխանատվության ենթարկելու մասին և պետք է դիմել Հանրապետության նախագահին դատավորի լիազորությունները դադարեցնելու միջնորդությամբ: Որոշումը ուժի մեջ է մտնում հրապարակման պահից: Նկատենք, որ Պարգև Օհանյանը «Ռոյալ Արմենիա»-ի գործով արդարացման վճիռ էր կայացրել, ինչի պատճառով, ըստ շատերի, նման ճակատագրի արժանացավ:

Պատգամավորի խոսքերով, այն ուսումնասիրությունները, որոնք կատարվել էին դատական դեպարտամենտի աշխատակիցների կողմից և որոնք հիմք էին հանդիսացել կարգապահական վարույթ հարուցելու համար, անօրինական էին և սահմանված չեն եղել ոչ մի օրենքով: «Բոլորն էլ հասկանում են, որ այն դատավորը, որ համարձակվեց կայացնել արդարացման դատավճիռ և որը դուր չէր գալիս գործադիր իշխանությանը, պետք է նման հարված ստանար»,- նկատեց Փոստանջյանը հավելելով, որ չի բացառվում նաև, որ Պ. Օհանյանի դեմ քրեական գործ հարուցվի: «Ներկայիս գործադիր իշխանությունը հաշվեհարդար լինելու սկզբունքով է առաջնորդվում»,- բացատրեց նախկին փաստաբանը:

Նրա համոզմամբ, Պարգև Օհանյանի դեմ կատարվածը կանդրադառնա նաև մյուս դատավորների ազատության վրա: «Նրանք չեն համարձակվի աշխատել ազատորեն և պատվերի շրջանակներից դուրս»,- ամփոփեց Փոստանջյանը: