Ձեր վստահելի աղբյուրը

«Երրորդ բնություն» ՀԿ կողմից իրականացվող «Հայաստանում ժամանակավոր կացարաններում բնակվող ընտանիքների բնակարանային սահմանադրական իրավունքների պաշտպանություն» ծրագրի շրջանակներում այսօր «Որբաթ» ակումբում բացվեց «Հազարավոր ընտանիքներ` խարխլված տնակներում» խորագրով ցուցահանդեսը:

Ցուցահանդեսի լուսանկարների հեղինակը ֆոտոլրագրող Անուշ Բաբաջանյանն է: Ցուցահանդեսում ներկայցված 70 լուսանկարներում հեղինակը պատկերել է տնակային ավանների իրական` ոչ մարդկային պայմանները:

«Երրորդ բնություն» ՀԿ նախագահ Ռաֆայել Մխիթարյանը լրագրողների հետ հանդիպման ժամանակ նշեց, որ այսօր, պաշտոնական տվյալների համաձայն, Հայաստանում կա մոտ 30 հազար անօթևան ընտանիք: Այդ ընտանիքներից 6035-ը բնակվում է ժամանակավոր կացարաններում, որոնք, հիմնականում, խարխլված տնակներ են:

Նա նշեց, որ առաջիկայում նախատեսում են հրապարակել այս ցուցահանդեսի լուսանկարների ալբոմը, որտեղ զետեղված կլինեն նաև քաղվածքներ բնակարանային իրավունքի վերաբերյալ: «Նպատակ կա ալբոմը տարածել իշխանությունների և քաղաքացիական հասարակության կազմակերպությունների շրջանում` ծառայեցնելու համար մարդու բնակարանային իրավունքների պաշտպանության դժվարին գործընթացներում, որպես լավագույն տարբերակ»,- հավելեց նա:

ֆոտոլրագրող Անուշ Բաբաջանյանի խոսքերով, այս ցուցահանդեսի նպատակն է հասարակության ուշադրությունը սևեռել ժամանակավոր կացարաններում ապրող մարդկանց խնդիրների վրա: Նա նշեց, որ նախատեսվում է ցուցահանդես կազմակերպել նաև գարնանը, քանի որ, նախատեսում է ձմռանը ևս լուսանկարել ժամանակավոր կացարաններում ապրող մարդկանց կենցաղը: