Ձեր վստահելի աղբյուրը

Թուրքական հայտնի «Ջումհուրիեթ» պարբերականը, որի գլխավոր խմբագիր Ջան Դյունդարը ձերբակալվել էր նոյեմբերի 26-ին և ում դեմ Էրդողանը գործ է հարուցել լրտեսության մեղադրանքով (Թուրքիայից Սիրիա զենքի մատակարարումը բացահայտող հրապարակման համար), այն փոքրաթիվ թերթերից է Թուրքիայում, որն ազատորեն գրում էր Հայոց ցեղասպանության թեմայի շուրջ: Այս մասին փաստեց անձամբ Ջան Դյունդարը` ձերբակալությունից կարճ ժամանակ առաջ (նոյ. 16-ին) Հրանտ Դինքի հիմնադրամի կազմակերպած «Լրագրողների երկխոսություն» ծրագրի շրջանակներում հայ լրագրողների հետ հանիպման ժամանակ, որին ներկա էր նաև Panorama.am-ի թղթակիցը:

Panorama.am-ի այն հարցին, թե Ջումհուրիեթ թերթում արդյոք օգտագործվում է «ցեղասպանություն» տերմինը, Դյունդարը պատասխանեց. «Այս թերթում գրաքննություն չկա. դա վերաբերում է նաև ցեղասպանության թեմային. այսինքն՝ բոլորը կարող են գրել այն, ինչ մտածում են… Մեր թերթում կան լրագրողներ, ովքեր ընդունում են Հայոց ցեղասպանությունը, ինչպես նաև լրագրողներ, ովքեր այն չեն ընդունում: Մեկը առանց չակերտների է գրում ցեղասպանություն բառը, մյուսը`չակերտների մեջ. դա բացառապես կախված է լրագրողի ցանկությունից»:

«Բայց կարող եմ ասել, որ վերջին տարիներին, նախորդ տարիների համեմատ, ավելի ազատ է այս առումով: Երբեմն արձագանքներ ենք ստանում ընթերցողների կողմից, բայց դատական գործեր այս թեմայով նյութեր հրապարակելու համար դեռ չեն հարուցվել մեր դեմ»:

Ջումհուրիեթ թերթի ապրիլի 24-ի համարի առաջին էջում հայերեն գրված էր «Այլևս երբեք»: Այն հարցին, թե ինչով էր պայմանավորված այդ որոշումը, թերթի գլխավոր խմբագիրը պատասխանեց. «2015 ապրիլի 24-ին (այդ ժամանակ ես նոր էի ստանձնել Ջումհուրիեթի գլխավոր խմբագրի պաշտոնը) թերթն առաջին անգամ լույս տեսավ հայերեն տառերով շապիկով… Ապրիլի 24-ին փորձում էինք ցույց տալ, որ որպես թերթ կիսում ենք այդ ընդհանուր ցավը մեր ժողովրդի հետ… Մենք ցանկացանք, որ այդ ցավի հետ կապված մի բառ [հայերեն լեզվով] մնա նրանց մտքում: Իսկ ցեղասպանության հուշահամալիրի նկարը Հրանտ Դինքի հետ միասին Հայաստան այցելած ժամանակ ես էի նկարել… Մերժողականությունն առհասարակ մարդկության խնդիրն է: Անհրաժեշտ է, որ բոլորս էլ առերեսվենք պատմությունը», - ասաց Ջան Դյունդարը հանդիպման ժամանակ:

Ընդգծենք սակայն, որ նա իր խոսքում օգտագործում էր «ընդհանուր ցավ» և ոչ թե «ցեղասպանություն» եզրը:

Հանդես գալով որպես հայ և թուրք հասարակական ու մշակութային գործիչների երկխոսության ջատագով` Դյունդարը միևնույն ժամանակ նշեց, որ թուրք քաղաքական գործիչներն իր կարծիքով Հայաստանի հետ հարաբերությունների հաստատմանն ուղղված քայլեր ձեռնարկելու որևէ ցանկություն չունեն, հետևաբար նրանցից ոչինչ պետք չէ ակնկալել այս առումով:

Խոսելով Էրդողանի վարած քաղաքականության և նրա վերընտրման մասին` Դունդառն ասաց. «Մենք այս ամենը “պուտինացում” ենք անվանում. Էրդողանն ուզում է Պուտինին նմանվել - ձեզ շատ լավ ծանոթ մի ռեժիմի ենք գնում, և մենք հիմա ավելի շատ պետք է պայքարենք, քանի որ մեզ` լրագրողներիս վրա ընկած բեռն ավելի է մեծանում»:
…
Հիշեցնենք, որ «Ջումհուրիեթ» թերթի գլխավոր խմբագիր Ջան Դյունդարին Էրդողանն անձամբ լրտեսության և ահաբեկիչների հետ համագործակցելու մեղադրանք է ներկայացրել այն պատճառով, որ թերթը հրապարակել էր Թուրքիայի ազգային հետախուզության գործակալության կողմից բեռնատար մեքենաներով դեպի Սիրիա մատակարարվող զինամթերքի լուսանկարներ և տեսագրություն: Էրդողանը պահանջել է Դյունդարին ենթարկել ծայրագույն պատժի՝ ցմահ բանտարկության: