Ձեր վստահելի աղբյուրը

Պաշտպանության նախարարությունում ուսումնասիրել են ու իրենք էլ պարզել, որ վերջին տարիներին սահմանում զոհված զինծառայողները սոցիալապես անապահով ընտանիքների զավակներ են: Այդ մասին լրագրողի հարցին ի պատասխան այսօր ասուլիսում հայտարարեց պաշտպանության նախարար Սեյրան Օհանյանը` հավելելով, որ նման հանգամանք կա և իրենք էլ գիտեն այդ մասին:

«Վերջին տարիներին չգիտեմ՝ ինչպես է ստացվում, բայց այդ հանգամանքը կա: Հասկանալի է, որ սահմանում կանգնած զինծառայողների սխրանքի ու հերոսությունների շնորհիվ է, որ կարողանում ենք պաշտպանել մեր սահմանները: Վերջին տարիների ընթացքում մենք ունեցել ենք հերոսներ ու հրամանատարներ», -հավելեց ՊՆախարարը:

Նրա խոսքով, երկրի պաշտպանական գերատեսչությունում վերջին տարիներին լուրջ միջոցառումներ ձեռնարկվել են զորակոչերի ժամանակ զորամասերում արդարացի բաշխումներ կատարելու համար, ինչը արվում է վիճակահանության արդյունքում:

«Բաշխման ընթացքում ուշադրություն չենք դարձնում, թե որ ընտանիքներից են այդ երեխաները՝ հաշվի ենք առնում ֆիզիկական հատկանիշները, ուսման վայրը և այլն: Այդուհանդերձ այդ հարցը գտնվում է բանակի ղեկավարության ուշադրության կենտրոնում», -հավելեց Օհանյանը:

Նաև ընդգծեց, որ այդ ընտանիքները զորամասի հրամանատարության ուշադրության կենտրոնում են լինում, ինչպես նաև ստանում աջակցություն: