![](https://panorama.am/news_images/516/1545862_1/arpi.thumb.jpg)
Կալանավորներին բարձրորակ սննդամթերք է տրվում. Ա.Միրզոյան
Քրեակատարողական հիմնարկներում պահվող անձանց տրվում է որակյալ սնունդ, ոչինչով չի տարբերվում այսօր խանութներում առկա սննդի որակից,-լրագրողների հետ զրույցում ասաց ՀՀ արդարադատության նախարարության քրեակատարողական վարչության նյութատեխնիկական ապահովման բաժնի պետ, արդարադատության փոխգնդապետ Արմեն Միրզոյանը՝ պատասխանելով դիտարկմանը, թե կալանավորները դժգոհում են ՔԿՀ-ներում տրվող սննդի որակից:
Նա մասնակցում էր «Իրավունքների պաշտպանություն առանց սահմանների» ՀԿ-ի կողմից 2015 թվականին իրականացրած հետազոտության հիման վրա պատրաստված «Մարդու իրավունքների բյուջետավորումը ՀՀ քրեակատարողական հիմնարկներում» զեկույցի շնորհանդես-քննարկմանը:
Հետազոտության նպատակն է եղել գնահատել ազատազրկված անձանց իրավունքների պաշտպանությունը պետության կողմից մշակվող և իրականացվող քաղաքականության արդյունավետության և դրան համապատասխան ֆինանսական հատկացումների տեսանկյունից: Հետազոտության արդյունքում պարզվել է, որ սննդի հետ կապված որակական և քանակական առումով խնդիրներ են հայտնաբերվել:
Ա.Միրզոյանի խոսքով, ձեռք բերվող յուրաքանչյուր ապրանք «Գնումների մասին» օրենքի համաձայն, ունի հավաստագիր, ստուգվում է փորձաքննության միջոցով:
Պատասխանելով հարցին, թե այդ դեպքում ինչո՞ւ են շատ կալանավորներ հրաժարվում ՔԿՀ-ի կողմից տրամադրվող սննդից և միայն տնից բերված ուտելիքով սնվում, նախարարության պաշտոնյան ասաց. «Դա իրենց ցանկությունն է, մարդիկ կան, ովքեր իրենց տան կերակուրն են ուզում: Բայց կրկնում եմ, որ բարձրորակ սննդամթերք է մատակարարվում»:
Ըստ նրա, եթե կալանավորը հրաժարվում է ՔԿՀ-ի կողմից տրամադրվող սննդից, և միայն տնից բերված սննդով է բավարարվում, կազմվում է արձանագրություն. «Տվյալ չափով քիչ է ձեռք բերվում, տնտեսած գումարն ուղղվում է այլ տեսակի սննդամթերքի ձեռք բերմանը, քանակի ավելացմանը»:
Ա.Միրզոյանը կարևորեց ՀԿ-ի կողմից իրականացված հետազոտությունը, նշեց, որ զեկույցում բարձրացված մի շարք խնդիրներ ուսումնասիրվում են նաև պետական գերատեսչության կողմից:
«Ամեն ինչ իրականացվում է «Գնումների մասին» օրենքի համաձայն, սահմանված չափաբաժինների, հատկացված ֆինանսավորման համապատասխան»,- ընդգծեց նա՝ հավելելով, որ ՀԿ-ի կողմից իրականացված հետազոտությունը որոշ չափով միակողմանի է:
Խոսքը, ըստ նրա, մասնավորապես հարցումների մասին է, որոնք իրականացվել են միայն դատապարտյալների շրջանում, չի համադրվել փաստացի եղած համակարգի հետ:
Նա վստահ է, որ համադրելու դեպքում պարզ կդառնար, որ որոշակի խնդիրներ «այնքան էլ այդպես չեն»:
Պատասխանելով հարցին, թե զեկույցի համաձայն, կան սննդամթերքի տեսակներ, որոնք թեև ճաշացանկում նշվում են, բայց դատապարտյալները չեն ստանում, Ա.Միրզոյանն ասաց. «Կառավարության որոշումով սահմանված են չափաբաժինները, տեսականին: Մեկ այլ որոշում էլ կա, որով սահմանվում է տվյալ տեսակներին փոխարինող սննդամթերք: Այսինքն, եթե չի ստանում միս, ստանում է մսի պահածո, որը սահմանված է կառավարության մեկ այլ որոշմամբ: Բոլորը ստանում են սահմանված սննդամթերք կամ դրան փոխարինող»:
Նա նաև բացառեց, որ տարիներ շարունակ գնումներ իրականացվում են նույն անձից:
«Թվով 32 չափաբաժին գնում է իրականացվում: Մասնակից կազմակերպությունները 21-ն են, արդյունքում շահողները շուրջ 8 կամ 10 կազմակերպություն են, որոնց մեծամասնությունը նոր են, նախկինում ՔԿՀ-ներին չեն մատակարարել»,- նշեց Արմեն Միրզոյանը:
Հարակից հրապարակումներ`
Լրահոս
Տեսանյութեր
![Արմեն Աշոտյանին բոլոր հնարավոր ձևերով գաղտնալսել են. Ռուբեն Մելիքյան](https://panorama.am/video_images/17/50546_1/f66bdda40b9d70_66bdda40b9db0.jpg)
![Շատ դժգոհ եմ այսօրվա դատական նիստից. Արսեն Բաբայան](https://panorama.am/video_images/17/50519_1/f66bc94d71a690_66bc94d71a6d0.png)