Ձեր վստահելի աղբյուրը

Մենք միշտ էլ բաց կերպով ասել ենք, որ դեմ ենք Ռուսաստանի կողմից Ադրբեջանին զենք վաճառելուն,- «Deutsche Welle» գերմանական առաջատար պարբերականի հետ զրույցում նշել է ՀՀ նախագահ Սերժ Սարգսյանը:

Պատասխանելով լրագրողի հարցին, թե ինչպես է գնահատում Ռուսաստանի դերը ղարաբաղյան հակամարտության գոտում՝ հաշվի առնելով Ռուսաստանի կողմից Ադրբեջանին զենք վաճառելը և միաժամանակ Հայաստանի ռազմավարական գործընկերը լինելը, նախագահ Սերժ Սարգսյանը ասել է. «Ես երբեք չեմ ասել, որ Ռուսաստանը մեր հովանավորն է և, առհասարակ, որ որևէ երկիր եղել, կամ կարող է լինել մեր հովանավորը: Եվ Ռուսաստանն էլ երբեք Հայաստանի համար այնպիսի դեր չի կատարել, ինչպես Թուրքիան Ադրբեջանի համար»:

Սերժ Սարգսյանը նաև հավելել է, որ Հայաստանը միշտ էլ դեմ է հանդես եկել Ռուսաստանի կողմից Ադրբեջանին զենք վաճառելուն. «Այո, դա այդպես է: Ռուսաստանը մեր ռազմակավարական գործընկերն է, մենք Ռուսաստանի հետ ունենք ռազմավարական պայմանագիր: Դրանով հանդերձ մենք միշտ էլ բաց կերպով ասում ենք, որ դեմ ենք Ռուսաստանի կողմից Ադրբեջանին զենք վաճառելուն»:

Պատասխանելով լրագրողի հարցին, թե ինչու Հայաստանը չի ճանաչում Լեռնային Ղարաբաղի անկախությունը՝ Սերժ Սարգսյանը նշել է. «Որովհետև դա մեր կողմից կոմպրոմիս է: Եթե Հայաստանն այսօր ճանաչեր Լեռնային Ղարաբաղի անկախությունը, ապա դա կնաշանակեր, որ մենք հրաժարվում ենք այդ հակամարտության կարգավորման բանակցային գործընթացից: Եթե ճանաչենք Լեռնային Ղարաբաղի անկախությունը, ապա ինչի՞ շուրջ ենք բանակցելու: Սա, ի դեպ, նաև Ձեր նախորդ հարցի պատասխանն է առ այն, թե ինչ ենք մենք անում հակամարտության լարվածությունը կանխարգալելու համար: Մենք չենք ճանաչում Լեռնային Ղարաբաղի անկախությունը, որպեսզի իրավիճակն ավելի չբարդացնենք»:

Նախագահ Սերժ Սարգսյանը անդրադարձել է նաև ԼՂ հակամարտության կարգավորման բանակցային գործընթացին, ԵԱՀԿ Մինսկի խմբի ձևաչափին, ինչպես նաև Գերմանիայից և Եվրոպական միությունից ակնկալիքներին։

«Կարծում եմ Մինսկի խումբը օպտիմալ ձևաչափ է և չի կարելի ասել, թե այս տարիների ընթացքում որևէ արդյունք չի գրանցվել: Այդ ձևաչափի փոփոխությունը ոչինչ չի տալու, առավելևս այն դեպքում, երբ Մինսկի խմբում ընդգրկված են երկրներ և առաջին հերթին համանախագահ երկրները, որոնք ունեն բավականաչափ միջոցներ և հնարավորություններ՝ Լեռնային Ղարաբաղում իրավիճակի զարգացման վրա ազդեցության տեսանկյունից»,- նշել է Սերժ Սարգսյանը:

Վերջինս հավելել է, որ Մինսկի խմբի ձևաչափի փոփոխության գաղափարը պնդում է Ադրբեջանը: Գերմանիայից և ԵԱՀԿ-ից ունեցած ակնկալիքների մասով էլ Սերժ Սարգսյանը նշել է, որ համոզված է՝ ԵԱՀԿ-ն ունի մեծ գործիքակազմ, որը կարող է արդյունավետորեն կիրառել:

ՀՀ նախագահի խոսքով՝ համապատասխան մարմինները Հայաստանի կողմից տեղեկացվել են այն մասին, թե ինչ իրավիճակ է հակամարտության գոտում և ինչ զարգացումներ կարող են լինել:

«Մենք չենք կարծում, որ ռազմական գործողությունները լրիվ պատահականորեն բռնկվեցին: Մենք սպասում էինք դրանց: Տեղի ունեցավ այն, ինչ պետք է տեղի ունենար: Նմանապես էլ կրակի դադարեցումը հանկարծակի տեղի չունեցավ: Ադրբեջանցիները մեծ կորուստներ են կրել: Բացի այդ Ռուսաստանի զինված ուժերի Գլխավոր շտաբի պետը զանգահարել է Հայաստանի Գլխավոր շտաբի պետի ղեկավարին և տեղեկացրել, որ ադրբեջանցիները համաձայն են այդ հարցի շուրջ Մոսկվայում հայկական կողմի հետ հանդիպում ունենալ: Բնականաբար, եղել է նաև միջազգային հանրության աջակցությունը: Համապատասխան հայտարարություններով են հանդես եկել շատ պետություններ և միջազգային կառույցներ»,-նշել է Սերժ Սարգսյանը:  

ՀՀ նախագահը անդրադարձել է  նաև ղարաբաղյան հակամարտության գոտում խաղաղապահների տեղակայման խնդրին՝ նշելով. «Մենք երբեք այդ հարցին դեմ չենք արտահայտվել, բայց կարծում ենք, որ այդ հակամարտությունը պետք է ամբողջական ու վերջնական լուծում ստանա: Մենք պատրաստակամություն էինք հայտնել համապատասպան փաստաթուղթ ստորագրել, որը կնախատեսեր հակամարտության համապարփակ կարգավորում՝ այդ թվում նաև մեր երկու կողմերի միջև խաղաղապահների տեղակայում: Սակայն ադրբեջանցիները չցանկացան դա»: