Ձեր վստահելի աղբյուրը

Մարդու իրավունքների և ժողովրդավարության ինստիտուտի հիմնադիր, քաղաքագետ և քաղաքացիական ակտիվիստ Արմինե Առաքելյանը շարունակում է պնդել, որ հոգեբուժարանում իրեն դաժան ծեծի են ենթարկել:

Բայց Panorama.am-ի թղթակցի հետ զրույցում Առաքելյանն ասաց, որ իրավական պատասխանատվության չի պատրաստվում ենթարկել իրեն ծեծողներին:

«Ձեռքերս շղթայված, կապած տարել են ու որևէ բուժօգնություն չեն ցուցաբերել: Մի մահճակալ կար, ոտքերս ու ձեռքերս կապել են, շատ պինդ ու հերթով գալիս ծեծում էին: Նրանց մեջ կանայք էլ կային, սպիտակ հագուստներով էին», -պատմեց Առաքելյանը:

Արմինեն, հիշեցնենք, մայիսի 17-ին Հանրապետության հրապարակի շատրվաններն էր մտել, որին ԱԻՆ փրկարար ծառայության աշխատակիցները Ոստիկանների հետ միասին դուրս էին բերել ու, պաշտոնական հաղորդագրության համաձայն, հանձնել հոգեբուժարանի աշխատակիցներին:

Արմինեն ասաց, թե իրեն տարել են «Նուբարաշենի» հոգեբուժարան. «Գալիս ծեծում էին ու տարբեր արտահայտություններ անում, սրսկեցին երկու անգամ: Հոգեբանորեն ու ֆիզիկապես ճնշման տակ էի: Նեղվում էի ֆիզիկական ցավերից»:

Նրա խոսքով, չի հիշում, թե ինչպես են տարել հոգեբուժարանից, բայց հետո ՄԻԺԻ-ի երիտասարդները պատմել են, որ ոչ մի կերպ հնարավոր չի եղել պարզել, թե որտեղ է գտնվել ինքը:

Այդուհանդերձ, Առաքելյանը ասաց, որ չի պատրաստվում դիմել իրավապահներին. «Իրավունքի գերակայություն չկա Հայաստանում: Իմ պայքարը քաղաքացիական է, շարունակելու եմ պայքարս: Կամ իլյուզիաների մեջ ենք, կամ էլ փորձում ենք կեղծ ասենք՝ գիտեք արդարադատական համակարգ կա, որ ասեմ աշխատում է, ես էլ վստահում եմ, դիմելու եմ որ այդպես լինի: Ինչքան ուղեղ ու միտք ունես, կարող ես ստեղծագործել: Եվ այդտեղ է, որ իրենք տուպիկի առաջ են կանգնում: Որևէ համակարգ, որը բռնության, անարդարության վրա է հիմնված, թե Հայաստանում, թե այլուր, չի կարող երկար գոյատևել»:

Հանրապետության հրապարակի շատրվաններից առաջացող ջրավազանի մեջ մտնելը Արմինեն բացատրում է իր կամքի ազատ արտահայտմամբ.

«Քայլում էի Հանրապետության հրապարակում, որոշել էի, պիտի գնայի Պատմության թանգարան, մտա լողացա, չորացա: Իմ համար սիմվոլիկ են՝ ինքնիշխանություն, հայրենիք, ազատություն: Ինչո՞ւ պետք է ինչ-որ մեկին հաշիվ տամ այդ քայլիս համար: Ի՞նչ օրենք եմ խախտել Հրապարակը անցնելով և ավազանում լողանալով: Ի՞նչ կարգ է խախտվել: Թող բացատրեն: Ինչո՞ւ այդպես հակադարձեցին: Դա է հարցը: Թող շարունակեն հալածել, ես պայքարելու եմ»:

Արմինեն 1999-ին հիմնադրել է ՄԻԺԻ-ն, եկել է Շվեդիայից և վերջնականապես Հայաստանում հաստատվել 2001-ին: Նախկինում եղել է ԵՄ փորձագետ, հիմա չի աշխատում:

Իր խոսքով, շատ է վիրավորվել, երբ իրեն վիրավորական խոսքեր են ասել ուժայինների ծառայողները. «Ոչ ոք ինձ չի բացատրել, թե որտեղ է տանում, ո՞վ պետք է բացատրեր: Ինձ ոչ ոք ոչինչ չի բացատրել: Իմ պայուսակս առգրավված է եղել, որևէ բան ինձնից չեն ուզել, որևէ բան չեն բացատրել: Եթե նստում ես շատրվանին չորանալու, ինչո՞ւ պիտի գան ձեռնաշղթա կապեն երկու ժամ արևի տակ, հոսանքապատ երկաթի վրա պահեն ու փորձեն հոգեբանական ճնշում բանեցնեն: Սա «սուպերվումենի» հարց չի, ես շատ համեստ եմ, բայց ես իմ արժեքներն ունեմ, որը մարդու իրավունքների արժեքներն են: Դրանով ապրել եմ փոքրուց մինչև այսօր: Ընտրել եմ՝ որտեղ եմ գալիս ապրելու, գիտեմ՝ ինչ եմ անում»:

Այժմ Արմինեն աչքի հետ կապված խնդիրներ ունի, ասում է՝ կապտուկներն անցնում են:

«Նուբարաշեն» հոգեբուժարանի տնօրեն Սամվել Թորոսյանը Panorama.am-ի հեռախոսազանգերին չպատասխանեց, Առողջապահության նախարարությունից հերքեցին Առաքելյանի հայտարարությունները, որ «Նուբարաշեն»-ում իրեն ծեծել են:

«Արմինե Առաքելյանի հարազատները ներկա են եղել այնտեղ, խնդրել են, որ դուրս գրեն, տանեն ինքը հոգեկան խնդիրներ չունի: Քույրը գրավոր թողել է բջջային հեռախոսահամարը՝ պարտավորվելով խնդիրներ լինելու դեպքում դիմել բուժօգնության», -փոխանցեցին ԱՆ-ից՝ նշելով, որ հոգեբուժարանում ծեծ չի եղել:

Այսօր Մարդու իրավունքների պաշտպանի աշխատակազմը տեղեկացրեց, որ Առաքելյանի հայտարարությունների մանրամասն  ուսումնասիրության հիման վրա ՀՀ Մարդու իրավունքների պաշտպանի կողմից նախաձեռնվել է սեփական նախաձեռնությամբ հարցի քննարկման ընթացակարգ:

«Քննարկման ընթացակարգի շրջանակներում Պաշտպանը դիմել է ՀՀ գլխավոր դատախազին՝ խնդրելով սեղմ ժամկետում քննարկել ՀՀ քրեական դատավարության օրենսգրքով սահմանված կարգով վարույթ նախաձեռնելու հարցը: Նշվածի կապակցությամբ պարզաբանումներ ստանալու նպատակով համապատասխան գրություն է ուղարկվել նաև Առողջապահության նախարարին», -նշված է ՄԻՊ աշխատակազմի տարածած հաղորդագրության մեջ: