Ձեր վստահելի աղբյուրը

«Քաղաքացի-դիտորդ» նախաձեռնությունը հոկտեմբերի 2-ի ՏԻՄ ընտրություններում դիտորդական առաքելություն է իրականացրել 18 համայնքներում 230 դիտորդով:

«Կրկին ականատես ենք եղել այնպիսի խնդիրների, որոնք համակարգային են: Դրանից առավել տարածվածն ուրիշի փոխարեն քվեարկելն է: Մարդը գալիս է ընտրելու, տեսնում է իր փոխարեն արդեն քվեարկել են»,- «Մեդիա կենտրոն»-ում  «Դիտորդների գնահատականը հոկտեմբերի 2-ի ՏԻՄ ընտրություններին» թեմայով քննարկման ժամանակ նման կարծիք հայնեց  նախաձեռնության ներկայացուցիչ Արմեն Գրիգորյանը:

Նրա խոսքով, երեկ ընտրություններում իրենք գրանցել են նման 18 խախտում:

«ԿԸՀ-ն դա փորձում է ներկայացնել որպես մանր-մունր խախտում, բայց սա շատ լուրջ խախտում է ու համակարգային բնույթ ունի»,-կարծիք հայտնեց Գրիգորյանը:

Նախաձեռնության դիտորդները երեկվա ընթացքում զեկուցել են  190 խախտման մասին:

«Ընդհանուր առմամբ, հիմնական խախտումները զեկուցվել քվեարկության ընթացքում, երբ սահմանդրական փոփոխությունների ժամանակ հիմնական խախտումները զեկուցվում էին ժամը 8-ից հետո»,-ասաց նա:

Ա. Գրիգորյանի խոսքով, դիտորդների գործողություններն ընտրատեղամասերում  սահմանափակվում են:

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն էլ կարծիք հայտնեց, որ ընտրություններն ազատ չեն եղել:

«Այս ընտրություններն ազատ չեն եղել, ընտրողն ազատ չի կարողացել իր կամքը, տեսակետը ներկայացնել, որովհետև ճնշող գործոնները են եղել մինչև տեղամաս հասնելը, մարդուն բերման են ենթարկում, որպեսզի նա քվեարկի»,-ասաց նա:

Սաքունցի խոսքով, ընտրությունների գործընթացների  վրա որոշակի ազդեցություն են ունենում թաղային հեղինակությունները: