Ձեր վստահելի աղբյուրը

Եվրոպա լիգայի խմբային փուլի 5-րդ տուրում «Մանչեսթեր Յունայթեդը» սեփական հարկի տակ հյուրընկալել էր հոլանդական «Ֆեյենորդին»: Հանդիպում, որը մեծ նշանակություն ուներ մանկունյանցիների համար, ովքեր խմբում որոշակիորեն զիջել էին դիրքերը:

Պրեմիեր լիգայի 12-րդ տուրի «Արսենալի» հետ կայացած խաղից հետո, որին այդպես էլ չմասնակցեց Հայաստանի ֆուտբոլի ազգային հավաքականի կիսապաշտպան Հենրիխ Մխիթարյանը, մանկունյանցիների գլխավոր մարզիչ Ժոզե Մոուրինյոյի վրա բողոքի ալիք էր բարձրացել: Յուրահատուկը մամուլի ասուլիսում նշել էր, որ «Արսենալի» հետ խաղը Մխիթարյանի համար այնքան էլ հարմար չէր` իրեն դրսևորելու առումով: Նրան պետք էր յուրահատուկ խաղ…

Մոուրինյոն խոստացել էր, որ «Ֆեյենորդի» հետ խաղում հայ ֆուտբոլիստին ամբողջական հանդիպում անցկացնելու հնարավորություն կտա, քանի որ հոգեբանական տեսանկյունից սխալ կլիներ Հենրիխին 15-20 րոպեով խաղադաշտ դուրս բերելը: Մոուրինյոն խոստացավ և կատարեց խոստումը, քանզի հոլանդական թիմի հետ խաղում Մխիթարյանը մեկնարկային կազմում էր:

Ժոզեն կատարեց իր խոստումը, Մխիթարյանը հուսախաբ չարեց: 82 րոպե Հենրիխը փայլեց խաղադաշտում և հասցնում էր գրեթե ամեն ինչ: Մի քանի դրվագներում նա կարող էր գոլի հեղինակ դառնալ, սակայն չստացվեց: Փոխարենը ստացվեց նրա խաղը: Արդյունքում` «Մանչեսթեր Յունայթեդը» հաղթանակ տոնեց 4:0 հաշվով:

Մանկունյանցիների կազմում հաշիվը բացեց Ուեյն Ռունին: Իր թիմի առավելությունը կրկնապատկեց Խուան Մատան, իսկ հետո Զլատան Իբրահիմովիչի հարվածից հետո ինքնագոլի հեղինակ դարձավ հյուրերի դարպասապահ Բրեդ Ջոնսը: Հանդիպման վերջնական հաշիվը ձևակերպեց Մխիթարյանին փոխարինած Ջեսի Լինգարդը:  

«Մանչեսթեր Յունայթեդի» պաշտոնական թվիթերյան էջում անցկացված քվեարկության արդյունքում Հենրիխ Մխիթարյանն իրավամբ ճանաչվել է  հանդիպման լավագույն խաղացող: Հայ ֆուտբոլիստը ստացել է 11 հազար ձայն՝ առաջ անցնելով Ուեյն Ռունիից (3500) և Խուան Մատայից (1000):

Եվրոպա լիգայի A խումբը վաստակած 10 միավորով շարունակում է գլխավորել թուրքական «Ֆեներբախչեն»: Այս հաղթանակից հետո մանկունյանցիները վաստակեցին 9 միավոր և 2-րդ տեղում են: «Ֆեյենորդը» 7 միավորով 3-րդն է, իսկ խումբը եզրափակում է «Զարյան», որն ունի 2 միավոր: Վերջին տուրում «Ֆեյենորդը» կընդունի «Ֆեներբախչեին», «Զարյան»` «Մանչեսթեր Յունայթեդին»: