Ձեր վստահելի աղբյուրը

Հայտնի իմպրեսիոնիստ Էդուրադ Մանեի «Օլիմպիա» կտավի նմանօրինակ ստեղծագործությունը Հարավային Կորեայում բարձրացրել է  դժգոհության մեծ ալիք և քաղաքական լուրջ սկանդալ: Նյուզռու.քոմ-ը, հղում անելով Yonhap-ին , գրում է, որ կտավում, որը ցուցադրվել է երկրի խորհրդարանում, նկարչը երկրի նախկին նախագահ Պակ Կին Հեին և նրա ընկերուհուն պատկերել է մերկ:

Մեկ ամիս առաջ իշխանությունից զրկված Պակ Կին Հեի կողմնակիցները հարձակվել և պատռել են «Կեղտոտ երազներ» կտավը:

Ստեղծագործությունը վնասելու համար ձերբակալվել է Հարավային Կորեայի նավատորմի 63-ամյա պաշտոնաթող ծովակալը: Նա հայտարարել է, որ վրդովվել է այն փաստից, որ նկարը ցուցադրվել է խորհրդարանի շենքում:

«Սենուրի» կուսակցության ներկայացուցիչները, որի ղեկավարն է հենց Պակ Կին Հեն, հայտարարել է, որ վիճելի կտավը ոչ միայն վիրավորել է երկու կանանց, այլ նաև երկրի հեղինակությունն է վնասել:

«Նկարիչները կարող են ազատորեն ծաղրել քաղաքական գործիչներին: Բայց եթե քաղաքական գործիչներն օգտագործում են արվեստի գործը քաղաքական նպատակներով, դրանց գեղարվեստական արժեքը կարող է խեղաթյուրվել»,- ասել է նախկին նախագահի կողմնակիցը:

Կին պատգամավորներին զայրացրել է այն, որ նկարը «սեռական օբյեկտիվացման» առարկա է ներկայացվել: 

Նկարիչ Լի Կու Հանգն  հանդես է եկել ի պաշտպանություն  իր «Կեղտոտ երազներ» կտավի: Նա նշել է, որ ցուցահանդեսում ներկայացված է 20 նկարչի աշխատանքներ, որոնց գործունեությունը երկար ժամանակ արգելված է եղել կառավարության հասցեին հնչեցրած քննադատությունների պատճառով:

Հարավային Կորեայում  նախագահի լավագույն ընկերուհու շուրջ  կոռուպցիոն սկանդալ է ծագել 2016 թվականի աշնանից:  Իրավապահները կասկածում են, որ նա, չզբաղեցնելով որևէ պետական պաշտոն, ազդել է նախագահի կողմից քաղաքական որոշումներ կայացնելու վրա, նաև օգտվելով երկրի ղեկավարի հետ ունեցած հարաբերություններից,  խաբեությամբ հարավկորեական ընկերություններից գումարներ է շորթել:  Այս սկանդալի հետևանքով երկրի խորհրդարանը դեկտեմբերի 9-ին իմփիչմենթ է հայտնել նախագահ Պակ Կին Հեին: