Ձեր վստահելի աղբյուրը

Սևանա լճից ջրի բացթողման տարեկան թուլատրելի քանակությունը 170 միլիոն խորանարդ մետրն է, մինչդեռ այս տարի նախատեսվում է 270 միլիոն խ/մ ջրի բացթողում: Սա չի կարող անհետևանք մնալ, կբերի լճի բացասական հաշվեկշռի և ջրի մակարդակի իջեցման: Այսօր կայացած մամուլի ասուլիսի ժամանակ այս մասին ասաց ԳԱԱ կենդանաբանության և հիդրոէկոլոգիայի գիտական կենտրոնի տնօրեն Բարդուղ Գաբրիելյանը:

«Վերջին տարիների ուսումնասիրությունները ցույց են տվել, որ ի հաշիվ լվացվող ափերի՝ Սևանա լճում կենսածին տարրերը և օրգանական նյութերն ավելացել են: Վիճակը մոտ է 1970- ական թվականներին, երբ տեղի էր ունենում լճի ճահճացում: Այսօր ճահճացումից փրկում է միայն ջրի մակարդակի բարձրացումը: Եթե Սևանի մակարդակն իջնի, կխթանենք ճահճացման գործընթացը: Տարիների աշխատանքը ջուրը կլցվի: Բացի այդ կունենանք ջրի որակի և ձկնաբուծական միջոցառումների վատացում: Մենք պետք է թեկուզ մի քանի սանտիմետրով բարձրացնենք Սևանը»,- ասաց բանախոսը:

Բարդուղ Գաբրիելյանը նշեց, որ իր տեղեկություններով, Սևանա  լճի ջուրն առավելապես օգտագործվելու է ոռոգման, ոչ թե ՀԷԿ-եր աշխատեցնելու նպատակով: Նրա խոսքով, սակայն, անթույլատրելի է ամեն տարի հեշտ ճանապարհով գնալ ու Սևանից ոռոգման ջուր վերցնել, ոռոգման հարցը պետք է հիմնովին և վերջնականապես լուծել:

«Սևանը պետք է հանգիստ թողնել: Եթե անգամ լճի մակարդակը սահմանվածից մի քանի սանտիմետր ավելի է բարձրացել, դա դեռ չի նշանակում, որ պետք է արհեստականորեն իջեցնենք այն՝ հասնելու օրենքով սահմանված մակարդակին: Դա կհանգեցնի անխուսափելի ճահճացման»,- կրկին շեշտեց Բարդուղ Գաբրիելյանը: