Ձեր վստահելի աղբյուրը

«Նախագահի ելույթում հստակ անհանդուրժողականության մոտեցում կար կոռուպցիոն երևույթների նկատմամբ: Սա քաղաքական կամքի դրսևորման կարևոր երևույթ է»,- լրագրողների հետ հանդիպմանն ասաց ՀՀ արդարադատության նախարարի տեղակալ Սուրեն Քրմոյանը՝ խոսելով ՀՀ նախագահ Սերժ Սարգսյանի մայիսի 18-ին ԱԺ-ում ունեցած ելույթի՝ կոռուպցիոն երևույթների մասին  հայտարարության վերաբերյալ և պատասխանելով հարցին, թե ե՞րբ կտեսնեն կաշառակերության համար ձերբակալված դատավորներ:

Նրա խոսքով, նախագահի ելույթից բխող կառավարության ծրագրում համապատասխան միջոցառումներ են նախանշվել՝ թե կանխարգելիչ, թե քրեական պատասխանատվության անխուսափելիության հետ  կապված:

«Խոսքը չպետք է գնա աղմկահարույց կամ ոչ աղմկահարույց դեպքերի մասին, այլ խոսքը պետք է գնա նրա մասին, որ կոռուպցիոն հանցագործության մեջ մեղադրվող անձն անխուսափելիորեն ենթարկվի քրեական պատասխանատվության: Ցավոք սրտի, ունենք դեպքեր, որ քրեական գործեր են հարուցվել դատավորների, դատախազների  և տարբեր աստիճանի պետական ծառայողների նկատմամբ»,- ասաց փոխնախարարը:

Նա նշեց, որ հետևություն են արել նախագահի ելույթից, որ պետք է անխուսափելիորեն քրեական պատասխանատվություն գործի կոռուպցիոն բոլոր դեպքերի համար:

Ս. Քրմոյանն ասաց, որ կառավարության ծրագրում նախատեսել են քրեական գործերի քննության արդյունավետության երաշխիքներ, բոլոր բաժիններում նախատեսվել է մեծածավալ կանխարգելիչ աշխատանք:

«Քաղհասարակության հետ քննարկում ենք հատուկ քննչականի հենքի վրա ստեղծել մի մարմին, որ կոռուպցիոն հանցագործությունները միայն այդ մարմինը կքննի: Այդ մասով վերջնական որոշում չկա, բայց ծրագրում հատուկ թիրախավորել ենք»,- նշեց փոխնախարարը: