Ձեր վստահելի աղբյուրը

«Երկիրը, որում հիմա  գտնվում ենք, լիովին տարբերվում է այն երկրից, որը 25 տարի առաջ անդամակցեց Համաշխարհային բանկին»,- այսօր  Երևանում կազմակերպված «Ապագայի Հայաստանը» ֆորումի ժամանակ հայտարարեց Համաշխարհային բանկի Եվրոպայի և Կենտրոնական Ասիայի տարածաշրջանային փոխնախագահ Սիրիլ Մյուլլերը:

Նրա խոսքերով՝ երբ Հայաստանը միացավ Համաշխարհային բանկին, այն Խորհրդային Միության  արագ բարգավաճող հանրապետություններից էր, որը հայտնի էր իր գիտական և տեխնոլոգիական ձեռքբերումներով, սակայն 1992 թվականին թե՛ արտարժույթի լուրջ պակասի, թե՛ փլուզված արտադրության հետևանքով՝ կտրուկ անկում էին ապրում  իրական աշխատավարձերը: Բացի այդ, կային նաև փախստականների և երկրաշարժի հետևանքով անօթևան դարձած մարդկանց խնդիրներ, բայց այդ դժվար ժամանակահատվածում Հայաստանը որոշեց վճռական քայլեր ձեռնարկել. «Եւ երկիրը, որում հիմա  գտնվում ենք, լիովին տարբերվում է այն երկրից, որը 25 տարի առաջ անդամակցեց Համաշխարհային բանկին»:

Ըստ Սիրիլ Մյուլլերի՝ քանի դեռ Հայաստանը սկսում էր հարմարվել իր նոր անկախության հետ և հաղթահարում էր կառավարման հետ կապված լուրջ խնդիրներ, տնտեսության անցումային փուլում երկրում փորձում էին ներդրումներ կատարել, վերականգնել ենթակառուցվածքները: Այս մարտահրավերներն ունենալով հանդերձ, ըստ նրա, վճռական քայլեր ձեռնարկվեցին Հայաստանի կառավարության կողմից: «Մարդիկ, իհարկե, դժվարությունները վերցրեցին իրենց վրա և փորձեցին ավելի բարգավաճող երկրին համահունչ բարեփոխումներ իրականացնել, որոնց օժանդակում էին Համաշխարհային բանկն ու միջազգային հանրությունը, խթանեցին երկրի տնտեսական աճին: Խորհրդային Միության փլուզումից հետո 4-5 տարվա ընթացքում Հայաստանը կարողացավ արագ վերականգնվել սկզբնական ցնցումից»,- ասաց նա:

ԵԿԱ տարածաշրջանային փոխնախագահն ասաց, որ առաջին կառուցվածքային բարեփոխումները հիմք ստեղծեցին տնտեսական կայուն աճի համար, և սկսած 94 թ-ից՝ Հայաստանը տարեկան շուրջ 8 տոկոս տնտեսական աճ էր արձանագրում, իսկ մինչև 2005թ-ը իրական ՀՆԱ-ի աճը կազմել է 120 տոկոս: Աճը շարունակելու համար անհրաժեշտ էր, որ երկիրը թևակոխեր երկրորդ սերնդի բարեփոխումների փուլ:

Սիրիլ Մյուլլերն անդրադարձավ նաև 2008թ-ի տնտեսական ճգնաժամին, Հայաստանում ստեղծված իրավիճակին: Ըստ նրա ՝ այսօր ՀՀ կառավարությունը բարեփոխումների խիստ հավակնոտ ծրագիր է որդեգրել, ու ակնկալում են, որ հնարավորություն կունենան ավելի ուշ այն քննարկել ՀՀ վարչապետի հետ:

Նա նաև նշեց, որ Հայաստանն այս տարիների ընթացքում հաղթահարել է բավականին լուրջ մարտահրավերներ տարբեր ոլորտներում: «Հայաստանը 25 տարի վստահել է մեզ: Հուսով ենք, որ կկարողանանք ձեր վստահությունը ձևավորել նաև ապագա տարիներին, կկարողանանք ամուր հիմքեր ստեղծել ապագա գործընկերության համար»,-  ընդգծեց ՀԲ ներկայացուցիչը:
Ըստ Սիրիլ Մյուլլերի՝  սոցիալական ներդրումների հիմնադրամի ծրագիրը հնարավորություն է տվել ավելի քան 1000 միկրոծրագրեր ֆինանսավորել շուրջ 300 համայնքներում, իսկ դա հնարավորություն է տվել ներդրումներ կատարել նախակրթարաններում, ոռոգման և խմելու ջրի համակարգերում:

«25 տարվա ընթացքում մենք միասին աշխատել ենք տեղական և միջազգային գործընկերների հետ, որպեսզի կարողանանք Հայաստանին օգնել իր հավակնոտ ծրագրերի իրականացման ընթացքում: Իհարկե, նայելով ապագային՝ տեսնում ենք, որ դեռ շատ անելիքներ կան, Հայաստանում դեռ շատ կան խոցելի շերտեր, և մենք փորձում ենք մեր գործընկերների և կառավարության հետ հաղթահարել երկրի առջև ծառացած խնդիրները: Հայաստանն իրականացնելով բարեփոխումների ծրագիրը, կկարողանա մինչև 2025 թվականը դառնալ միջին եկամտով երկիր»,- ասաց Սիրիլ Մյուլլերը:

Ի դեպ,  նա հայտնեց, որ Համաշխարհային բանկն էլ շատ դասեր է քաղել նաև Հայաստանից, որոնք այնուհետև ներդրվել են այլ երկրներում. «Ուստի, երբ աշխարհը պատրաստվում է նոր արդյունաբերական դար թևակոխելու, հուսով ենք՝ Հայաստանը դրա առաջամարտիկներից կլինի»: